မောင်တောနယ်စပ် လုံခြုံရေး ရဲကင်းစခန်း ၁၆၀ ကျော်ချထား ရခိုင်ပြည်နယ် မြောက်ပိုင်း မောင်တောမြို့နယ်အတွင်း လုံခြုံရေးစည်း မကျိုးပေါက်ရန် နယ်စပ် ခြံစည်းရိုး တလျှောက် နယ်ခြားစောင့် ရဲကင်းစခန်းပေါင်း ၁၆၀ ကျော်ဖြင့် ဖြန့်ကျက် ဆောင်ရွက်နေ ကြောင်း သတင်းရရှိသည်။ လာမည့် သြဂုတ်လ ၂၅ရက်နေ့သည် ရခိုင်ပြည်နယ် မောင်တော- ဘူးသီးတောင် နယ်စပ်တလျှောက်ရှိ ရဲကင်းစခန်းများကို ARSA အကြမ်းဖက်အဖွဲ့က လူစုလူဝေးဖြင့် တိုက်ခိုက်ခဲ့သည့် တနှစ်ပြည့်မြောက် မည့်နေ့ဖြစ်သည်။ လက်ရှိအချိန်တွင် အကြမ်းဖက်သမားများသည် မောင်တောနယ်စပ် တလျှောက် ဒုက္ခသည်များ အသွင် ယူလျှက် ခိုအောင်း ကာ နယ်စပ်ဖြတ်ကျော်ပြီး တကျော့ပြန် တိုက်ခိုက်မည်ဆိုသည့် သတင်းများ ကြောင့် လုံခြုံရေး စီမံချက်များ လစ်ဟာမှု မရှိစေရန် ယင်းသို့ဆောင်ရွက်ထားရှိခြင်း ဖြစ်ကြောင်း ရခိုင်ပြည်နယ်ရဲတပ်ဖွဲ့မှူး ၊ ရဲမှူးကြီး အောင်မြတ်မိုးက ဧရာဝတီသို့ ပြောသည်။ ရဲမှူးကြီး အောင်မြတ်မိုးက “ လတ်တလော မောင်တောနယ်စပ်နဲ့ ပတ်သက်ပြီး နယ်စပ်ခြံစည်းရိုး တလျှောက်မှာ ရဲကင်း စခန်းပေါင်း ၁၆၀ ကျော် ဖြန့်ပြီးတော့ ဆောင်ရွက်နေတာရှိတယ်။ ဒီအတော အတွင်းမှာ မောင်တောမြို့နယ်ရဲတပ်ဖွဲ့၊ ခရိုင် ရဲတပ်ဖွဲ့၊ ဘူးသီးတောင်မြို့နယ် ရဲတပ်ဖွဲ့ ဖြန့်ခွဲပြီးတော့မှ လုံခြုံရေးအင်အား ၁၀၀၀ နီးပါးနဲ့ဆောင်ရွက်တာရှိတယ်” ဟု ဆိုသည်။ ၂၀၁၇ ခုနှစ် သြဂုတ်လ ၂၅ ရက်နေ့က ဖြစ်ပွားခဲ့သော မောင်တော အကြမ်းဖက်မှုကြောင့် ရခိုင်၊ မြို၊ သက်၊ ဒိုင်းနက် စသည့် တိုင်းရင်းသားများနှင့် ဟိန္ဒူဘာသာဝင်များ သောင်းချီ နေရပ်စွန့်ခွာ ထွက်ပြေးခဲ့ကြရသလို ဘင်္ဂါလီ အများအပြား မှာ တဘက်နိုင်ငံသို့ ဝင်ရောက် ထွက်ပြေးသွားကြ သည်။ လက်ရှိ နယ်မြေအခြေနေမှာ တည်ငြိမ်စပြုနေပြီ ဖြစ်၍ ဒေသခံတိုင်းရင်းသားများနှင့် ဘင်္ဂါလီရွာသား တို့မှာ အေးချမ်းစွာဖြင့် နိစ္စဓူဝ ပုံမှန်သွားလာ လှုပ်ရှားမှုများ ရှိနေသော်လည်း ၂၀၁၆ ခုနှစ် အောက်တိုဘာ အကြမ်းဖက်မှုနှင့် ၂၀၁၇ ခုနှစ် သြဂုတ်အတွင်းက ဖြစ်ပွားခဲ့သော အကြမ်းဖက်မှု ဖြစ်စဉ်များက ထိတ်လန့်ချောက်ချားစရာ ကောင်းသည့်အတွက် မောင်တောဒေသတွင်း နေထိုင်ကြ သည့် အားလုံးသော လူမှုအသိုင်းအဝိုင်းတို့ အကြား စိုးရိမ်ပူပင်သည့် ရင်တွင်းမီးတောက်များက ကိန်းအောင်းနေဆဲ အခြေအနေတွင် ရှိကြောင်း သိရသည်။ မောင်တောမြို့ပေါ်တွင်ရှိသည့် ဟိန္ဒူဒုက္ခသည် ကယ်ဆယ်ရေးစခန်းတာဝန်ခံ ဦးနီမောလ်က “ကျနော် တို့ လက်ရှိ အခက်အခဲက ကောလဟာလ သတင်းတွေကို ကြားသိနေရတဲ့ အတွက် စိုးရိမ်နေရပါ တယ်။ အကြမ်းဖက်သမားများ ဝင်လာတယ်။ ဟိုနေရာမှာ ခိုနေတယ် ။ ဟိုနေရာက ဝင်လာတယ် ။ အဲဒီသတင်းတွေကြောင့်ပဲ ဒီမှာနေတဲ့ လူတွေ စိုးရိမ်ပြီး နေလို့ထိုင်လို့ မရဘူး ဖြစ်နေရပါတယ်” ဟု ဧရာဝတီသို့ ပြောသည်။ ရခိုင်ပြည်နယ် မြောက်ပိုင်းအရေးနှင့် ပတ်သက်၍ လတ်တလော နယ်စပ်ဒေသတွင် အကြမ်းဖက်သမား များသည် လူသစ် စုဆောင်းပြီး သင်တန်းများ ပို့ချနေကြကြောင်း၊ စားနပ်ရိက္ခာနှင့် လက်နက်ခဲယမ်း များ စသည်တို့ စုဆောင်းကာ လှုပ်ရှားနေကြောင်းကို သတင်းများ ရရှိထားသဖြင့် ထပ်မံ၍ အကြမ်း ဖက် တိုက်ခိုက်မှုများ မဖြစ်ပွားစေရန် ကြိုတင်ကာကွယ် ထား သည့် လုံခြုံရေးဆိုင်ရာ အစီအမံများကို လည်း ဆောင်ရွက်ထားကြောင်း ရဲမှူးကြီး အောင်မြတ်မိုး က ဆက်လက် ပြောကြားသည်။ “တဖက်နိုင်ငံမှာလည်း ဒုက္ခသည် စခန်းတွေရှိပါတယ်။ အဲဒီအထဲမှာ အကြမ်းဖက်သမားတွေဟာ ဒုက္ခသည် အသွင်ယူပြီးတော့ ခိုအောင်းနေကြတယ်။ ပြီးတော့ တဖက်နိုင်ငံကနေ ဖမ်းဆီးရမိမှု ဖြစ်စဉ်တွေကို ပြန်လေ့လာကြည့်တဲ့အခါ လုပ်သေနတ်တွေ တော်တော်များများ မိတယ်။ မူးယစ် ဆေးဝါးတွေလည်း အတော်များများမိတယ်။ အကြမ်းဖက်နဲ့ ဆက်နွယ် ပတ်သက်တဲ့သူတွေ တော်တော်များများ ဖမ်းမိတာတွေလည်းရှိတယ်” ဟု ပြည်နယ်ရဲမှူးကြီး အောင်မြတ်မိုး ကပြောသည်။ အလားတူ မောင်တောမြို့ပေါ်နှင့် ဘူးတောင်မြို့နယ်တို့တွင်လည်း လုံခြုံရေး ရဲတပ်ဖွဲ့ အင်အား ၁၀၀၀ ခန့်ဖြင့် နေ့ကင်း၊ ညကင်း၊ လှည့်ကင်းများဖြင့် ဆောင်ရွက်နေကြသည့်အပြင် ယခင်က ပြစ်မှုဟောင်း နှင့် ကျော်ဇောသတင်း ရှိသူများကို လည်း စောင့်ကြည့်ကာ အရေးယူဆောင်ရွက်ခြင်း များရှိကြောင်း ပြည်နယ်ရဲ မှူးကြီးက ဆိုသည်။ ပြီးခဲ့သော ဇူလိုင်လအတွင်း စစ်တွေမြို့နယ်အတွင်းက ဘင်္ဂါလီဒုက္ခသည်စခန်းအပါအဝင် တခြားသော မြို့နယ်များက လုပ်သေနတ် အလက် ၃၀ ကျော်ကိုလည်း ဖမ်းဆီးရမိခဲ့ကြောင်း ရခိုင်ပြည်နယ် ရဲတပ်ဖွဲ့မှ သိရသကဲ့သို့ ယင်းလအတွင်းမှာပင် ကောက်ဘဇားရှိ ARSA အကြမ်းဖက် သမားတို့၏ လက်နက်စက်ရုံကို ဘင်္ဂလားဒေ့ရှ် အာဏာပိုင်များက ဖမ်းဆီးရမိ ခဲ့ကြောင်း Asia Times သတင်းက ဆိုသည်။ ရခိုင်ပြည်နယ်အတွင်း စစ်တွေမြို့နှင့် အခြားသောမြို့နယ်တို့တွင် မြန်မာနိုင်ငံ ရဲတပ်ဖွဲ့ဝင်များနှင့် တပ်မတော်တို့ ပူးပေါင်း၍ လုံခြုံရေးကိစ္စများကို ဆောင်ရွက်နေသလို လုံခြုံရေး လိုအပ်ချက်အရ သြဂုတ်လကုန်အထိ လုံခြုံရေး အစီအမံများကို တိုးချဲ့လုပ်ဆောင်သွားမည် ဖြစ်ကြောင်း ပြည်နယ်ရဲတပ်ဖွဲ့မှူးက ဆိုသည်။ The post မောင်တောနယ်စပ် လုံခြုံရေး ရဲကင်းစခန်း ၁၆၀ ကျော်ချထား appeared first on ဧရာဝတီ.
Source : https://ift.tt/2Ld71cs
via IFTTT
No comments:
Post a Comment