အာဏာသိမ္းတာ မဟုတ္ဘူး

အာဏာသိမ်းတာ မဟုတ်ဘူး နာဂအမျိုးသား ဆိုရှယ်လစ် ကောင်စီ-ကပ္ပလန်(NSCN-K) အဖွဲ့အစည်းအတွင်းတွင် ယခုလ ၁၇ ရက်နေ့က ဥက္ကဋ္ဌ အပြောင်းအလဲ ဖြစ်သွားခဲ့သည်။ ဤအပြောင်းအလဲကို တချို့က NSCN-K အတွင်း အာဏာ သိမ်းမှု ဖြစ်ခြင်းဟုလည်း ဆိုနေကြသည်။ သို့သော်လည်း အပြောင်းအလဲသည် သွေးထွက် သံယိုမှု မရှိဘဲ ပြီးဆုံးသွားခဲ့ပြီး NSCN-K ဥက္ကဋ္ဌ ဦးခါးငေါ် (Khango Konyak) ကို NSCN-K အဖွဲ့အစည်းအတွင်း က ဖြုတ်ချလိုက်ပြီး ကာကွယ်ရေးဝန်ကြီးဌာန ဒုတိယဝန်ကြီး ဦးယုံးအောင် (Yung Aung) အား ဥက္ကဋ္ဌ အဖြစ် တင်မြောက်လိုက်ကြသည်။ ဥက္ကဋ္ဌသစ်ဖြစ်သူ ဦးယုံးအောင်သည် ကွယ်လွန်သွားသည့် NSCN-K ဥက္ကဋ္ဌ အက်စ်အက်စ်ကပ္ပလန်၏ တူတော်စပ်သူဖြစ်ပြီး နာဂလူမျိုးများကြား ခေတ်ပညာတက် တယောက်ဖြစ်သည့်အတွက် NSCN-K ကို ဦးဆောင်နိုင်မည့် ပုဂ္ဂိုလ်ဟု ယုံကြည်ခြင်းကြောင်း NSCN-K ဘက်ဆိုသည်။ ထို့ကြောင့် ခေါင်းဆောင်သစ်နှင့် NSCN-K အနေဖြင့် ပြည်တွင်းငြိမ်းချမ်းရေး၊ အမျိုးသားရေးနှင့် ရှေ့ဆက်ဆောင်ရွက်မည့် အခြေအနေအချို့နှင့် ပတ်သက်ပြီး NSCN-K မှ ဗဟိုကော်မတီဝင်လည်းဖြစ် သာသနာရေးဝန်ကြီး လည်းဖြစ်သူ ဦးကျော်ဝမ်းစိန်ကို ဧရာဝတီသတင်းဌာနမှ အကြီးတန်း သတင်းထောက် ချစ်မင်းထွန်းက ဆက်သွယ်မေးမြန်း ထားသည်။ မေး ။ ။ အခု ဥက္ကဋ္ဌ အပြောင်းအလဲ လုပ်ထားတယ်ဆိုတော့၊ ဘယ်လို အခင်းအကျင်းတွေ လုပ်နေလဲ ဘာတွေ လုပ်ဆောင်သွားမလဲ သိချင်ပါတယ်။ ဖြေ ။ ။ ကျနော်တို့ ဥက္ကဋ္ဌ ပြောင်းလဲသွားတယ်ဆိုတော့ အခုချိန်မှာ ကျနော်တို့အတွင်းမှာ ရှိတဲ့ လူကြီး တွေပေါ့နော်။ ဘယ်သူက ဘာလုပ်ငန်းတွေ လုပ်ရမယ်၊ အဲဒီအပိုင်းပဲ ရှိသေးတယ်။ မေး ။ ။ အဖွဲ့အစည်း အတွင်းထဲမှာ ဘယ်လိုတွေ ဖြစ်သွားလို့ ဦးခါးငေါ်ကို ဥက္ကဋ္ဌတာဝန်ကနေ ဖြုတ်ချလိုက်တာလဲ။ ဖြေ ။ ။ ဒီဥက္ကဋ္ဌ (ဦးခါးငေါ်) ကို ကျနော်တို့ အပြောင်းအလဲ လုပ်လိုက်ရတဲ့ အကြောင်းအရင်းကတော့ သူက စစ်တပ် (NSCN-K တပ်ဖွဲ့) ဘက်မှာ သူလုပ်ခဲ့တာ တော်တော်ကြာခဲ့ပါတယ်။ ဒုတိယသမ္မတ နေရာမှာလည်း သူက ၂၀၁၁ ခုနှစ်လောက်က တာဝန်ယူခဲ့တယ်။ အဲနောက် ကျနော်တို့ အက်စ်အက်စ်ကပ္ပလန် ကွယ်လွန် (၂၀၁၇ ခုနှစ်) ပြီးနောက် သူ့ (ဦးခါးငေါ်) ကို ဥက္ကဋ္ဌ တင်မြောက်လိုက်တာပေါ့။ အဲလို တင်မြောက်လိုက်တဲ့အခါ ဒီ ၁ နှစ်ကျော်အတွင်းမှာ သူက ဦးဆောင်နိုင်တဲ့ အခြေအနေမရှိတဲ့ပုံစံမျိုး ဖြစ်သွားတယ်၊ ကျနော်တို့ NSCN အတွင်းမှာ ဝန်ကြီးဋ္ဌာနဆိုတာတွေလည်း ရှိတယ်၊ ပါတီလုပ်ငန်းတွေလည်း အများကြီး ရှိတာပေါ့၊ အဲလိုရှိတဲ့အခါမှာ သူက ဒါတွေကို ဦးဆောင်နိုင်စွမ်း မရှိတော့ဘူး။ ဒါ တချက်ပေါ့။ နောက်တခုက ဘာလဲဆိုတော့ သူက ဒုသမ္မတ၊ ဒုဥက္ကဋ္ဌပေါ့။ ဒါတွေလည်း ခန့်အပ်ဖို့ သင့်တယ်ပေါ့။ လူမရှိတာ လည်း မဟုတ်ဘူး၊ ခန့်အပ်ဖို့ လူတွေကိုလည်း ရွေးချယ်ပြီးတော့ ပေးအပ်ထားတာရှိတယ်။ အဲဒါ သူက မခန့်အပ်တဲ့ အပိုင်းတွေ ပါလာတယ်။ အဲနောက် ဝန်ကြီးတွေကိုလည်း တာဝန်တွေ မပေးနိုင်ဘူး။ အာဏာကို မပေးအပ်နိုင်ဘူး၊ ဒီဟာတွေ ဆောင်ရွက်ပါ၊ ဒီဟာတွေ လုပ်ပါဆိုတာ မရှိဘူး။ သူက အားလုံးသူ့ဆီမှာဘဲ ချုပ်လိုက်တာ၊ ချုပ်လိုက်တဲ့အခါကျတော့ ဒီမှာက ဘာမှလည်း လည်ပတ်လို့မရတော့ဘူး။ အဲလိုမျိုး အခြေအနေတွေလည်း ဖြစ်လာတယ်။ အဲလို ဖြစ်လာတဲ့အခါကျတော့ လူထုနဲ့ ဆက်ဆံတဲ့ နေရာမှာ တော်တော်လေး နည်းသွားတယ်။ အားလုံး သူက ချုပ်ကိုင်လိုက်တဲ့အခါကျတော့ ကျနော်တို့ အဖွဲ့အစည်း အတွင်းမှာ လည်ပတ်မှုပေါ့၊ စားရေး သောက်ရေးက အစပေါ့။ လည်ပတ်မှုတွေ အားလုံးက အခက်အခဲတွေ ဖြစ်ကုန်တာ၊ အဲဒါကြောင့်မလို့ လူမျိုးတခုကို မဦးဆောင်နိုင်တဲ့ ပုဂ္ဂိုလ် တဦးတယောက် ဖြစ်သွားတာပေါ့။ အဲလိုဆိုတော့ ကျနော်တို့က ကျနော်တို့ပါတီရဲ့ ဥပဒေ စည်းမျဉ်း စာအုပ်တွေရှိတယ်၊ အဲဒါ ပါတီဥပဒေ စည်းမျဉ်း စာအုပ်သည် ကျနော်တို့ပါတီ၊ အစိုးရရဲ့ စည်းမျဉ်းတွေရှိတယ်၊ အဲဒီမှာ ဥက္ကဋ္ဌ တဦးတယောက်ရဲ့ ခေါင်းဆောင်မှုက တဦးတယောက်တည်း အပေါ်မှာဘဲ လုပ်ခွင့်မရှိဘူးပေါ့။ အဲဒါနဲ့အညီ သူက အခုလို ရပ်နားခြင်း ခံလိုက်ရတယ်။ မေး ။ ။ ဒီကိစ္စက NSCN-K ထဲမှာ အာဏာ သိမ်းမှု တခုဖြစ်တယ်လို့ ပြောတာတွေ ရှိတယ်၊ အဲဒါက ဟုတ်လား။ ဖြေ ။ ။ အာဏာ သိမ်းမှု တခု ဖြစ်တယ်ဆိုတာတော့ ဘေးကနေပြောရင်တော့ အဲလိုတွေ ပြောတာက မှန်မယ်။ ဒါပေမယ့် အတွင်းရေးမှာ အာဏာသိမ်းတာတော့ မဟုတ်ဘူး။ ဒါက ကျနော်တို့ ဝန်ကြီးဋ္ဌာနတွေ အားလုံး ကျနော်တို့ ရာခိုင်နှုန်း ၉၉ က သဘောတူပြီးတော့မှ၊ နောက် ပါတီဘက်က လူကြီးတွေလည်း ရာခိုင်နှုန်း ၉၉ လောက်က သဘောတူညီပြီးတော့မှ သူ့ကို တာဝန်ကနေ ရပ်နားလိုက်ခြင်း ဖြစ်တယ်။ မေး ။ ။ အခု ဦးခါးငေါ်က အိန္ဒိယနွယ်ဖွား ခေါင်းဆောင် တချို့နဲ့အတူ ထွက်သွားတယ်ဆို တော့ တခြား အဖွဲ့အစည်းတခု ထူထောင်ပြီးတော့ ပြန်လာနိုင်သလား၊ ဘယ်လို ပုံစံမျိုးနဲ့ ဖြုတ်ချလိုက်တာလဲ။ ဖြေ ။ ။ အဲဒါကတော့ ကျနော်တို့အနေနဲ့ ဖြုတ်ချလိုက်တာကတော့ သူက အရပ်သား တယောက်အနေနဲ့ ဘဲ ကျနော်တို့ ထားလိုက်တော့တာ၊ အရပ်သား တယောက်၊ ပြည်သူတယောက်အဖြစ်နဲ့ ကျနော်တို့က သူ့ကို ရပ်နားလိုက်တာပေါ့။ ဆိုတော့ သူက ဒီမြန်မာပြည်ဘက်ခြမ်းမှာဆိုရင်တော့ မြန်မာပြည်ဘက်ခြမ်း နေနေ၊ အိန္ဒိယ ပြည်ဘက်ခြမ်း နေနေပေါ့၊ နာဂလန်း (အိန္ဒိယနိုင်ငံအတွင်းမှာရှိ) မှာ နေနေပေါ့၊ ဒါက သူ့အပိုင်း။ သူ့အိမ်ကတော့ နာဂလန်းမှာ ရှိတယ်။ အဲလိုဆိုတော့ သူက အရပ်သား တယောက်အနေနဲ့ သွားနေဖို့ဘဲ ရှိ တယ်။ အဲကနေ တဆင့် သူက တခြားသော ကျနော်တို့နဲ့ ပါတီခွဲခဲ့တဲ့ လူတွေရှိတယ်။ အဲဒီလူတွေနဲ့ ပူးပေါင်းသွားတာတို့၊ ဘာတို့ကတော့ ကျနော်တို့ကတော့ မသိတော့ဘူး၊ အဲအပိုင်းကတော့ ကျနော်တို့ တာဝန်လည်း မရှိတော့ဘူး။ တာဝန်လည်း မယူတော့ဘူး။ သိလည်း မသိတော့ဘူးပေါ့၊ နောက်အပိုင်းကတော့ ကျနော်တို့ မသိဘူး။ မေး ။ ။ အခု ဥက္ကဋ္ဌ အပြောင်းအလဲ ဖြစ်သွားတော့၊ NSCN-IM နဲ့ NSCN-K ကွဲနေတဲ့ဟာကရော ဘယ်လိုမျိုး ချိတ်ဆက်ပြီးတော့ ပူးပေါင်းသွားဖို့ရှိလဲ၊ ဒါမှ မဟုတ် ဒီတိုင်းဘဲ သီးသန့်စီ နာဂအရေးကို လုပ်မှာ လား၊ ဘယ်လို ပုံစံနဲ့ သွားဖို့ရှိပါသလဲ။ ဖြေ ။ ။ အဲဒါကျတော့ ကျနော်တို့ NSCN-K နဲ့ NSCN-IM ပေါ့၊ ဒီအကြားမှာ ပူးပေါင်းဖို့ကတော့ နိုင်ငံရေး လမ်းကြောင်းအရ၊ စဉ်းစားတွေးခေါ်မှုအရ အခု လောလောဆယ်မှာ ပေါင်းစပ်လို့တော့ မရဘူး။ အခု ကျနော်တို့ ဒီခေါင်းဆောင်သစ်ရဲ့ လက်ထက်မှာ ပေါင်းနိုင်တဲ့ လမ်းကြောင်းလည်းမတွေ့ရဘူး။ ဘာလို့ဆို ကျနော်တို့က အစတုန်းက ရပ်တည်ထားတဲ့အတိုင်းပဲ ရှိတယ်။ အခု ခေါင်းဆောင် အသစ် လဲတယ်ဆိုပေမယ့်လည်း အဲဒီအတိုင်းဘဲ ရှိတဲ့အခါကျတော့ သူတို့ (NSCN-IM)နဲ့ ပေါင်းတာတို့၊ ဘာလုပ်ဖို့၊ ညာလုပ်ဖို့ အဲဒါမျိုးတော့ မရှိဘူး အခုထိတော့။ မေး ။ ။ ဥက္ကဋ္ဌသစ်က ဦးကပ္ပလန် ရဲ့ တူလို့ သိရတယ်၊ သူက ဘယ်လို ဖြတ်သန်းခဲ့လဲ၊ ဘယ်တွေမှာ ပညာသင်ခဲ့လဲ၊ ဘာတွေ လုပ်ဆောင်ခဲ့လဲ၊သူ့အကြောင်းလေး သိချင်ပါတယ်၊ ဖြေ ။ ။ သူက အသက် ၄၅ နှစ်ရှိတယ်။ သူက မဏိပူရမှာ နိုင်ငံရေးသိပ္ပံကို သင်ကြားခဲ့တဲ့ ပုဂ္ဂိုလ် တဦးဖြစ်တယ်။ ၁၉၉၄ မှာ သူပြန်ရောက်ခဲ့တယ်။ ပြန်ရောက်ခဲ့ပြီးတော့ ၁၉၉၈ မှာ သူ NSCN-K အဖွဲ့ အစည်းထဲ ပြန်ဝင်တာပေါ့။ အဲကနေ ကျနော်တို့ NSCN-K ရဲ့ တာဝန် လုပ်ငန်းတွေကို စတင် ထမ်းဆောင်ခဲ့တာပေါ့။ သူအဲလို ထမ်းဆောင်ခဲ့တဲ့အချိန်မှာ အရူနားချား ပရာဒေ့ရှ်မှာ သူက လုံခြုံရေးပိုင်းဆိုင်ရာကို တာဝန် ထမ်းဆောင် ခဲ့တယ်။ အဲလိုဖြတ်သန်းလာခဲ့တယ်။ မေး ။ ။ ဦးယုံးအောင်ကို ဥက္ကဋ္ဌအဖြစ် ယုံယုံကြည်ကြည် ရွေးချယ်ခဲ့တာက ဘယ်လို အကြောင်းအရာတွေကြောင့်မလို့ ရွေးချယ်ခဲ့တာလဲ၊ သူကရော ဘယ်လောက်အထိ စွမ်းဆောင်နိုင်မယ်လို့ အဖွဲ့အစည်းထဲမှာ ယုံကြည်ထားလဲ။ ဖြေ ။ ။ သူက အတွေးအခေါ် ကောင်းတဲ့ လူတယောက် ဖြစ်ပါတယ်၊ ပညာရေးကဏ္ဍမှာဆိုလည်း သူသင်ကြားခဲ့တာက နိုင်ငံရေးသိပ္ပံဆိုတော့ အတွေးအခေါ် ကောင်းတယ်၊ အပြောအဆို ကောင်းတယ်၊ လူတိုင်းနဲ့ အကောင်းဆုံးဖြစ်အောင် သူက ဖြေရှင်းနိုင်တဲ့ ပုဂ္ဂိုလ်ဖြစ်တယ်၊ အကောင်းဆုံးဖြစ်အောင် သူက ပြောတတ် တယ်။ စိတ်သဘောထားမှာလည်း သူက ရိုးရိုး ရှင်းရှင်းနဲ့ပေါ့၊ အနာဂတ်မှာ ဖြစ်မယ့် ကိစ္စတွေ အားလုံးကို ပြဿနာ မဖြစ်အောင်ပေါ့၊ အကောင်းဆုံးသော နည်းလမ်းနဲ့ ဖြေရှင်းနိုင်ဖို့ ကြိုးပမ်းတဲ့ ပုဂ္ဂိုလ် ဖြစ်တယ်။ သူက အဲလိုမျိုး ပုဂ္ဂိုလ်ဖြစ်တဲ့အခါကျတော့ သူရဲ့ လက်အောက်မှာရှိတဲ့ တပည့်ပေါ့၊ ရဲဘော် ရဲဖက်တွေပေါ့၊ ကျေးရွာမှာ ရှိတဲ့၊ နယ်မှာရှိတဲ့ ပြည်သူလူထု အသီးသီးပေါ့၊ ခေါင်းဆောင် အသီးသီး အားလုံးကလည်း သူ့ကို ကြိုက်နှစ်သက်တယ်။ အဲလိုမျိုး သဘောထား ရှိတဲ့ ပုဂ္ဂိုလ်ဟာ အက်စ်အက်စ်ကပ္ပလန် လက်ထက်မှာ သူက ကာကွယ်ရေးဝန်ကြီးဋ္ဌာန ဒုတိယဝန်ကြီး အဆင့်ထိ တက်လှမ်းလာနိုင်ခဲ့တယ်၊ အဲလိုမျိုး ခန့်အပ်ခြင်းကို ခံရပြီးတော့မှ သူက တာဝန်ကို ထမ်းဆောင်လာခဲ့တယ်။ အဲလိုမျိုး ပုဂ္ဂိုလ်ဖြစ်တဲ့ အခါကျတော့ ကျနော်တို့ အားလုံး ပြန်ချင့်ချိန် ရွေးချယ်တာ ပေါ့။ အခုခေတ် အခါအရပေါ့၊ ရေစီးကြောင်းအရ ကျနော်တို့ နိုင်ငံရေး အခြေအနေကို ဖြေရှင်းနိုင်သလို စွဲဆောင်နိုင် တဲ့လူ၊ ဦးဆောင်နိုင်တဲ့လူ ဒီလူပုဂ္ဂိုလ်ထဲမှာ ဒီခေတ်ပညာတတ်ကို အဓိကထားပြီးတော့ ကျနော်တို့ ရှာတဲ့အခါ မှာ အခု ဦးယုံးအောင် ဆီမှာ အားလုံးရဲ့ သဘောထားတွေ ရောက်သွားခြင်း ဖြစ်တာပေါ့။ အဲအတွက်ကြောင့်မလို့ သူ့အပေါ်မှာ ကျနော်တို့ အားလုံးက သဘောတူပြီးတော့မှ တာဝန်ပေးထားခြင်း ဖြစ်တယ်။ ဆိုတော့ သူက ခေတ်သစ် လူငယ် ပညာတတ်ထဲမှာ ပါတယ်။ အတွေးအခေါ်ကောင်းတယ်၊ အမျှော် အမြင် ကျယ်တယ်ဆိုတော့ သူ့ရဲ့သက်တမ်းမှာတော့ သူ့ရဲ့ စွမ်းဆောင်နိုင်မှုက အားလုံး သဟဇာတ ဖြစ်အောင် ဦးဆောင်သွားနိုင်မယ်လို့ ကျနော်တို့ အားလုံးယုံကြည်ထားတယ်။ မေး ။ ။ မြန်မာနိုင်ငံမှာ လုပ်နေတဲ့ ငြိမ်းချမ်းရေးနဲ့ပတ်သက်ပြီး သူ ဘယ်လို စဉ်းစားမှု ရှိလဲ၊ NCA ထိုးနိုင်ရေးကို လာနိုင်တဲ့ အခြေအနေရှိလား၊ သူဘာတွေ လုပ်ဆောင်သွားဖို့ ရှိလဲ။ ဖြေ ။ ။ ဒီငြိမ်းချမ်းရေး ကိစ္စမှာတော့ ၂၀၁၂ ခုနှစ်က မြန်မာနိုင်ငံ အစိုးရနဲ့ အပစ်အခတ် ရပ်စဲရေး ထိုးတဲ့ အခါမှာ သူက ကာကွယ်ရေးဝန်ကြီးဋ္ဌာန ဒုတိယဝန်ကြီး နေရာ ရောက်သွားပြီး အဲဒီ အပစ်အခတ်ရပ်စဲရေး ထိုးတဲ့ အခါမှာလည်း သူလည်း ကိုယ်တိုင် ပါဝင်ခဲ့တယ်။ ကွယ်လွန်သွားတဲ့ ဥက္ကဋ္ဌကြီးကို အကြံဉာဏ်ပြုခဲ့တာလည်း အများကြီး သူလုပ်ခဲ့တယ်။ ဒါတွေက လုပ်သင့် လုပ်ထိုက်တဲ့ဟာတွေ ဖြစ်တယ်ပေါ့။ အဲလိုမျိုး ပုဂ္ဂိုလ်ဖြစ်ပါတယ်။ အဲလိုဆိုတော့ သူ့ရဲ့ လက်ထက်မှာလည်း မြန်မာနိုင်ငံတော် အစိုးရနဲ့တော့ အတက်နိုင်ဆုံး သူလည်း ငြိမ်းချမ်း အောင်၊ Peace ဖြစ်အောင် လုပ်သွားမယ်ဆိုတဲ့ သဘောရှိတယ်။ ဒါပေမယ့်လို့ NCA နဲ့ ပတ်သက်လာတဲ့ ကိစ္စ မှာတော့ အခုထိ သူကလည်း ဘာမှ မပြောသေးဘူး။ ဘာကြောင့်လဲဆိုတော့ ဒီကိစ္စဟာ နိုင်ငံရေး ကိစ္စလည်း ဖြစ်တာဆိုတော့ အားလုံးရဲ့သဘောတူညီချက် ရမှဘဲ သူကလည်း ဆုံးဖြတ်ချက်ပေးလို့ ရမယ်၊ သူ ဥက္ကဋ္ဌဖြစ်တိုင်း သူလည်း သူတဦးတယောက်အနေနဲ့ ဆုံးဖြတ်ချက် ပေးလို့တော့ အဆင်မပြေနိုင်ဘူး ထင်တယ်။ မေး ။ ။ NCA နဲ့ ပတ်သက်ပြီးတော့ လောလောဆယ်မှာ မဆုံးဖြတ်ရသေးဘူးဆိုတော့၊ ဒါနဲ့ပတ်သက်ပြီး တော့ သီးသန့် အစည်းအဝေး လုပ်ပြီးတော့ ဒါကို သွားသင့်/မသွားသင့် ဆွေးနွေးတာတို့ရှိလား၊ ဘယ်လိုပုံစံ မျိုး တွေ ဆောင်ရွက်နေတာ ရှိပါသလဲ။ ဖြေ ။ ။ ကျတော့ ဒီဟာကို ကျနော်တို့ ငြိမ်းချမ်းရေး ဖြစ်စဉ်မှာ ဘယ်လိုပုံစံနဲ့ သွားမလဲဆိုတာကို အားလုံး စုစည်းပြီးတော့မှ အစည်းအဝေး လုပ်ရမယ်၊ ကျနော်တို့ လုပ်ထုံ လုပ်နည်း ပုံစံအရပေါ့။ အဲလို လုပ်ပြီးမှဘဲ ကျနော်တို့ နိုင်ငံတော် အစိုးရကို ဘယ်လို အကြောင်းပြန်ပေးရမလဲ ၊ အဲလိုလာမယ် ထင်တယ်။ အဲလို ဖြစ်လာတဲ့ အခါမှဘဲ ဘယ်လို ပုံစံကိစ္စမှာ ဘယ်လို တုန့်ပြန်မလဲ၊ အဲလိုမျိုး သဘောထား ရှိတယ်။ အခုလောလောဆယ်မှာတော့ ကျနော်တို့ ဥက္ကဋ္ဌရဲ့ သဘောထားတော့ မသိရသေးဘူး။ မေး ။ ။ ခေါင်းဆောင် အပြောင်းအလဲ ဖြစ်တော့ NSCN-K ရဲ့ မဟာမိတ်ဖွဲ့ထားတဲ့ အခြေအနေကရော ဘယ်လိုရှိလဲ၊ ဖြေ ။ ။ ကျနော်တို့ မဟာမိတ်ဖွဲ့စည်းမှုမှာ ကျတော့ ဒီဝိဇီယားဆိုပြီးတော့မှ ရှိတယ်၊ ဝိဇီယားမှာကျတော့ အဖွဲ့အစည်းက အများကြီးတော့ မပါလာသေးဘူး၊ အဲဒါက ၃-၄ ဖွဲ့လောက်ဘဲ ရှိအုံးမယ် ထင်တယ်။ ပါဝင်ကျတဲ့ ဟာအဖွဲ့တွေကတော့ အိန္ဒိယမှာ ခိုလှုံလို့ မရတဲ့ အဖွဲ့အစည်းတွေပေါ့။ ကျနော်တို့ NSCN ရှိတဲ့ နေရာမှာ သူတို့ လာပြီးတော့မှ ခိုလှုံတဲ့အဖွဲ့တွေ ရှိတယ်။ အဖွဲ့အစည်း တချို့တွေရှိတာပေါ့။ ဒါတွေကျတော့ ဥက္ကဋ္ဌကနေပြီးတော့မှ ဘယ်လိုပုံစံနဲ့ ဖော်ဆောင်သွားမလဲ၊ လက်တွဲသွားမလဲ၊ ဒါကျတော့ ဥက္ကဋ္ဌအပေါ်မှာ တာဝန်ရှိတယ်၊ ကျနော်တို့လည်း ဒီအကြောင်းတော့ ဖြေကြားလို့တော့ မရဘူး။ မေး ။ ။ အရင်က အိန္ဒိယနဲ့ NSCN-K ၂၀၀၁ ခုနှစ်တုန်းက အပစ်ရပ် လက်မှတ်ထိုးခဲ့ဖူးတယ်။ ပြန်ပျက်သွား တယ်၊ အခု အိန္ဒိယနဲ့ ပြန်ပြီး ငြိမ်းချမ်းရေး ဆွေးနွေးသွားဖို့ ရှိလား။ ပြီးတော့ နယ်စပ် ဖြတ်ကျော်ပြီး အိန္ဒိယကို သွားတိုက်တဲ့ ကိစ္စတွေကရော စစ်ပွဲမဖြစ်အောင် ထိန်းပြီး ငြိမ်းချမ်းရေးကို ဘယ်လို ပုံစံနဲ့ ဆက်သွားမလဲ၊ လူထု မထိခိုက်အောင် ဘယ်လိုပုံစံနဲ့ သွားဖို့ စဉ်းစားထားတာ ရှိပါသလဲ။ ဖြေ ။ ။ ကျနော်တို့ အိန္ဒိယနဲ့ ငြိမ်းချမ်းရေး ပျက်ပြယ်သွားတာတော့ ၂၀၁၅ ကတည်းက ဖြစ်သွားတာပေါ့ နော်၊ အဲလိုဆိုတော့ ၂၀၁၅ ကနေ ရှေ့ ၂ လလောက်ကပေါ့၊ အဲဒီအထိတော့ တိုက်ပွဲတွေ ဖြစ်ခဲ့တာ ရှိခဲ့တယ်ပေါ့။ ဒါပေမယ့်လို့ နာဂလန်းပြည်နယ်၊ မွန်းခရိုင်မှာ ဖြစ်တာက နောက်ဆုံးပဲ ထင်တယ်။ အဲကနေ အခုထိတော့ တိုက်ပွဲဖြစ်တာတော့ မရှိတော့ဘူး။ အိန္ဒိယကို သွားပြီးတော့မှ အိန္ဒိယကို သွားပစ်တာ မဟုတ်ဘူး။ အိန္ဒိယမှာ ရှိတဲ့ စခန်းတွေကို အိန္ဒိယက ပစ်တယ်ဆိုတော့ ဒီဟာက တကဏ္ဍ ဖြစ်သွားတာပေါ့နော်။ အဲအတွက်ကြောင့်မလို့ ကျနော်တို့ ဒီဘက်ကနဲ့ ကျော်ပြီးတော့မှ သွားပစ်တာတော့ မရှိဘူး။ ဟိုဘက်မှာဘဲ ပစ်နေကြတာ အဲဒါတော့ ရှိတယ်။ ဒါပေမယ့် အခုလည်း ကျနော်တို့ ဆက်ပြီးတော့မှ တိုက်ပွဲ ဆင်နွဲဖို့တော့ ကျနော်တို့မှာ ဘာမှ အစီအစဉ်မရှိဘူး။ အိန္ဒိယတွေရဲ့ လှုပ်ရှားမှုအပေါ်မှာတော့ မူတည်မယ်လို့ ကျနော်တို့ထင်တယ်။ ဒါပေမယ့် ကျနော်တို့ဘက်က စစ်ကြေညာတာတို့၊ သွားတိုက်တာတို့၊ ခြုံခိုတိုက်တာတို့၊ အဲဒါမျိုး ကျနော်တို့ဘက်မှာတော့ လုပ်ဖို့ အစီအစဉ်မရှိဘူး။ ငြိမ်းချမ်းရေးကတော့ ကျနော်တို့ မြန်မာပြည်မှာ ငြိမ်းချမ်းသကဲ့သို့ အိန္ဒိယဘက်မှာရှိတဲ့၊ နာဂတွေ ရှိတဲ့ နယ်မြေတွေမှာတော့ NSCN-K အနေနဲ့ ငြိမ်းချမ်းစေချင်တယ်၊ ဒါကတော့ ရင်ထဲက ထွက်တဲ့ တကယ့် အမှန်အကန် စကားသံပေါ့လေ။ မေး ။ ။ NSCN-K က နာဂနိုင်ငံ ထူထောင်ရေးအတွက် အဓိက ဦးစားပေး လုပ်ဆောင်နေတယ်လို့ ပြောကြ တယ်၊ ဒါက လက်တွေ့မဆန်ဘူး ဒေသဖွံ့ဖြိုးရေးတွေ အရင်လုပ်သင့်တယ်လို့ ပြောကြတယ်၊ အဲဒါနဲ့ပတ်သက် ပြီး အခု ဥက္ကဋ္ဌအသစ်က ဘယ်လိုပုံစံ ကိုင်တွယ်သွားဖို့ ရှိသလဲ။ဘယ်လို လမ်းကြောင်းကို သွားမလဲ။ ဖြေ ။ ။ ဟုတ်ကဲ့၊ ဒီဥက္ကဋ္ဌ အသစ်ရဲ့ သဘောထားကို ကျနော်တို့ ကြည့်မယ်ဆိုရင် အဓိကတော့ သူက ငြိမ်းချမ်းအောင် ထားပြီးတော့မှ၊ ဖွံ့ဖြိုးမှုကို ဦးစားပေးပြီးတော့မှ မိမိရဲ့ လိုအပ်တဲ့ နိုင်ငံရေး ကိစ္စရပ်တွေကို ဆောင်ရွက်သွားမယ် အဲလိုပေါ့။ အစတုန်းက ကျနော်တို့ ဥက္ကဋ္ဌကြီး အက်စ်အက်စ်ကပ္ပလန် ဘယ်လို ဖောင်းဒေးရှင်း ချပေးထားသလဲ၊ အဲဒီ အတိုင်းဘဲ အဲလို ဆက်လက် သွားဖို့များတယ်။ The post အာဏာသိမ်းတာ မဟုတ်ဘူး appeared first on ဧရာဝတီ.
Source : https://ift.tt/2MMejJ1
via IFTTT