ပထမဆုံးအႀကိမ္ ျပဳလုပ္ခဲ့တဲ့ "ကမာၻ႔ဂီတ မူပိုင္ခြင့္ဆိုင္ရာ စာတမ္းဖတ္ပြဲ"

ပထမဆုံးအကြိမ် ပြုလုပ်ခဲ့တဲ့ “ကမ္ဘာ့ဂီတ မူပိုင်ခွင့်ဆိုင်ရာ စာတမ်းဖတ်ပွဲ” ဇူလိုင်လ ၁ ရက်နေ့က အဆိုတော် လင်းလင်းရဲ့ “Soccer House Cafe Shop” မှာ ကမ္ဘာ့မူပိုင်ခွင့် ဆိုင်ရာ စာတမ်းဖတ်ပွဲကို ပြုလုပ်ခဲ့ပါတယ်။ ဒီပွဲမှာ ကမ္ဘာ့မူပိုင်ခွင့်ဆိုင်ရာ လေ့လာဆန်းစစ်ချက်များ၊ ဂီတစီးပွားရေး ဂေဟစနစ်သစ်ဆိုတဲ့ အပိုင်းနှစ်ပိုင်းကို ကိုဝီ (ခ) ကိုသန့်ဇင်မြင့်က ဖတ်ကြားရှင်းပြခဲ့ပါတယ်။ ကိုဝီက အမေရိကန်နိုင်ငံမှာ လက်ရှိအခြေချနေထိုင်နေသူဖြစ်ပြီး ဂီတဝါသနာရှင်ဖြစ်တဲ့အတွက် ဂီတနဲ့ပတ်သက်တဲ့ အကြောင်းအရာများကို လေ့လာဆန်းစစ်ပြီး ဆောင်းပါးများလည်း ရေးနေသူတဦး ဖြစ်ပါတယ်။ “ကျနော် အဓိကပြောချင်တာကတော့ ဂီတမူပိုင်ခွင့်လို့ ပြောရင် အချက်အလက်ကို အခြေခံတဲ့ ဆန်းစစ်မှုက အရမ်းနည်းတယ်။ အထူးသဖြင့် အမေရိကန်နိုင်ငံရဲ့ ဂီတမူပိုင်ခွင့်ဆိုင်ရာကို စနစ်တကျ လုပ်ချင်တာကြောင့် ဒီပွဲလေးကို လုပ်ဖြစ်တာပါ” “ကျင်းပရတဲ့ ရည်ရွယ်ချက်ကတော့ ဂီတမူပိုင်ခွင့်လို့ အများကြီး ပြောပေမယ့် ပညာရပ်ဆိုင်ရာ တင်ပြချက် နည်းနည်း နည်းတယ်။ အထူးသဖြင့် အချက်အလက် အတိအကျနဲ့ ဘယ်သူတွေ မှားတယ်။ မှန်တယ်ဆိုတာ သူများ တိုင်းပြည်မှာ တကယ်လုပ်ပြီး အောင်မြင်ခဲ့တဲ့ စနစ်တကျ ဆန်းစစ်မှုတွေ လုပ်ချင်တာမို့ ဒီပွဲကို လုပ်တာလည်း ဖြစ်ပါတယ်” လို့ ကိုဝီက ပြောပါတယ်။ “ကျနော်တို့ နိုင်ငံမှာလည်း ဒီနည်းစနစ်အတိုင်း တချိန်မဟုတ် တချိန် အကောင်းဆုံး လုပ်ရင် အောင်မြင်မယ်လို့ ယုံကြည်ပါတယ်။ ကိုယ့်တို့ဆီမှာ Copy Right Law ရှိရင် ချမ်းသာမှာလား ဆိုရင် မဟုတ်ပါဘူး။ ခေတ်ကာလပေါ် မူတည်ပြီးတော့ ဂီတလုပ်ငန်းကိုလည်း တိုးတက်ပြောင်းလဲမှုတွေ လုပ်ကိုင်နိုင်ဖို့လိုအပ်ပါတယ်” လို့ ကိုဝီက ဆိုပါတယ်။ ကိုဝီက ဒီပွဲမှာကမ္ဘာသုံး အထူးသဖြင့် အမေရိကန်နိုငိငံမှာ လက်ရှိ အသုံးပြုနေတဲ့ ဂီတနဲ့ပတ်သက်တဲ့ Copyright, Patent, Plagiarism,Trade Mark တို့ကို အကျယ်တဝင့် ရှင်းလင်းပြောပြပါတယ်။ “ကမ္ဘာမှာတောင် ဂီတစီးပွားရေး၊ဂေဟစနစ်က အများကြီးပြောင်းလဲနေပါပြီ။ ငါးပွက်ရာ ငါးစာချ လုပ်တယ်လို့ ပြောနေကြပေမယ့် ငါးမရှိတဲ့နေရာမှာ ငါးစာချလို့ရော ဘာထူးမှာလဲ။ ဂီတဂေဟစနစ်ဟာ ကမ္ဘာမှာပါ ပြောင်းလဲနေပါပြီ။ ကျနော်အနေနဲ့ကတော့လေ အကြံပြုတာပဲ တတ်နိုင်တာပါ။ ဒီနိုင်ငံအတွက် ဂီတမူပိုင်ခွင့်ကိုတော့ တာဝန်ရှိသူတွေကို ဂီတသမားတွေကပဲ Posh လုပ်ကြရမှာပါပဲ” လို့ ကိုဝီက ဆိုပါတယ်။ အဆိုတော် လင်းလင်းကလည်း ဒီစာတမ်းဖတ်ပွဲအတွက် တတ်နိုင်သမျှ ပါဝင်အားဖြည့် နေရာပေးခဲ့ပြီး ဒါနဲ့ပတ်သက်လို့လည်း အခုလိုပြောပါတယ်။ “ကျနော်တို့ ရင်းနှီးခင်မင်မှုကတော့ ကြာပြီပေါ့နော်။ ဒီခေါင်းစဉ်လေးနဲ့ လုပ်ကြမယ်လို့ အားလုံး တိုင်ပင်ကြတယ်။ အဓိက သွားချင်တာက ဘာလဲဆိုတော့ Copyright တွေနဲ့ပတ်သက်တဲ့ဟာတွေ၊ မူပိုင်ခွင့်တွေနဲ့ပတ်သက်တဲ့ဟာတွေ အဲဒါတွေကို ဝုန်းဒိုင်းဆိုပြီး လုပ်လိုက်ရင် ကျနော်တို့ ရှင်းလင်း ပြတ်သား နားလည်ဖို့ မလွယ်ဘူးလေ။ တဖြည်းဖြည်းချင်းနဲ့ တဆင့်ချင်းစီ သွားတဲ့ပုံစံနဲ့ စလုပ်တဲ့ သဘောပါပဲ။ ဒီလိုလုပ်တဲ့နေရာမှာ ကိုယ်လုပ်မယ့်အရာကို ကိုယ်တိုင်လည်း နားလည်နေစေချင် တာပါ” လို့ အဆိုတော် လင်းလင်းက ပြောပါတယ်။ လင်းလင်းက အခုလို စာတမ်းဖတ်ပွဲများကို မကြာခဏ ပြုလုပ်သွားဖို့အစီအစဉ်ရှိတယ်လို့လည်း ဆိုပါတယ်။ ကမ္ဘာ့မူပိုင်ခွင့် ဆိုင်ရာစာတမ်းဖတ်ပွဲကို မာရဇ္ဇ၊ ဝေလ၊ ဇေယျာသော်၊ G Latt၊ တေးရေး မြင့်မိုးအောင်၊ ရွှေဂျော်ဂျော်၊ညီညီသွင်၊ မြတ်မင်း၊ ဇော်မျိုးထွဋ်၊ ရေဗက္ကာဝင်းနဲ့ ဂီတမျိုးဆက်သစ် လူငယ်များ၊ အသိပညာရှင်၊ အတတ်ပညာရှင်များ၊ ထုတ်ဝေသူများ တက်ရောက် ဆွေးနွေးခဲ့ကြ ပါတယ်။ The post ပထမဆုံးအကြိမ် ပြုလုပ်ခဲ့တဲ့ “ကမ္ဘာ့ဂီတ မူပိုင်ခွင့်ဆိုင်ရာ စာတမ်းဖတ်ပွဲ” appeared first on ဧရာဝတီ.
Source : https://ift.tt/2KBhFu1
via IFTTT