ျမန္မာျပည္ထြက္ ပဲ တန္ခ်ိန္ ၅ ေသာင္း အိႏၵိယ ဝယ္မည္

မြန်မာပြည်ထွက် ပဲ တန်ချိန် ၅ သောင်း အိန္ဒိယ ဝယ်မည် (မြတ်ပြည့်ဖြိုး) ================== အိန္ဒိယအစိုးရက ပြည်တွင်း စားသုံးမှု ဖူလုံရန်နှင့် ပဲဈေးကွက်ကို ထိန်းနိုင်ရန် အတွက် မြန်မာပဲတန်ချိန် ၅ သောင်းကို လာမည့်နှစ်တွင် တရားဝင် ဝယ်ယူမည်ဟု စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနမှ သိရသည်။ ကုန်သွယ်ရေးဦးစီးဌာနမှ တာဝန်ရှိသူတဦးက “အိန္ဒိယဘက်က ဝယ်ဖို့ စတင်ကမ်းလှမ်းလာတယ်။ အဲဒီအတွက် သဘောတူညီချက် နားလည်မှု စာချွန်လွှာ ထိုးဖို့ နှစ်နိုင်ငံ ညှိနှိုင်းနေဆဲ ဖြစ်ပါတယ်” ဟု ပြောသည်။ အိန္ဒိယနိုင်ငံသည် ယခုနှစ်တွင် ရာသီဥတု ဖောက်ပြန်မှုကြောင့် ပဲအထွက်နှုန်း လျော့ကျခြင်း၊ ပြည်တွင်းသို့ ပဲတင်သွင်းသည့် ကုမ္ပဏီများက ဈေးကစားသည့်အတွက် ပဲဈေးကြီးမြင့် ခြင်းများကို ထိန်းချုပ်နိုင်ရန် အတွက် မြန်မာနှင့် အာဖရိကနိုင်ငံများမှ ပဲများ ဝယ်ယူသွားမည်ဟု သိရသည်။ နှစ်နိုင်ငံ အစိုးရ အချင်းချင်း ချိတ်ဆက်ကာ ဆောင်ရွက်မည်ဖြစ်ပြီး၂၀၁၆ ခုနှစ်တွင် မတ်ပဲ နှင့် ပဲစင်းငုံ တန်ချိန် ၂၅၀၀၀ စီ ဝယ်ယူမည် ဖြစ်ကြောင်း သိရသည်။ မြန်မာအစိုးရက တရား၀င် ရောင်းချပေးနိုင်ရန် ကုမ္ပဏီမရှိသဖြင့် ပုဂ္ဂလိကဘက်မှ ရောင်းချပေးရမည် ဖြစ်ရာ မြန်မာနိုင်ငံ ပဲမျိုးစုံနှင့် နှမ်းကုန်သည်များ အသင်းကို ရောင်းချပေးရန် တာဝန်ပေးထားကြောင်း အဆိုပါအသင်း အတွင်းရေးမှူး ဦးမင်းကိုဦးက ရှင်းပြသည်။ ဦးမင်းကိုဦးက “အိန္ဒိယက ဝယ်ဖို့ စကမ်းလှမ်းတာကတော့ ဒီနှစ် အစပိုင်း ကတည်းကပါ၊ ကျနော်တို့ဘက်က ဒီနှစ်ပြည်တွင်းပဲ လက်ကျန်နည်းနေတာရယ်၊ Government to Government ရောင်းချဖို့ ချက်ချင်းကြီး ပြင်ဆင်ရမှာ နည်းနည်းအခက်အခဲ ရှိတာကြောင့် နောက်နှစ် ပဲစပေါ်ချိန်ကစပြီး ရောင်းချမယ်ဆိုပြီး ညှိနှိုင်းလိုက်တာပါ” ဟု ပြောသည်။ နှစ်နိုင်ငံအစိုးရချင်း တရားဝင်ရောင်းချမည့် ပုံစံဖြစ်သော်လည်း အဓိကအားဖြင့် ငွေပေးငွေယူကိစ္စ၊ တင်ဒါစနစ်ဖြင့် ရောင်းချမည့်ကိစ္စနှင့် FOB တန်ဖိုးများ သတ်မှတ်ခြင်းကိစ္စတွင် မြန်မာကုန်သည်များ အဆင်ပြေ လက်ခံနိုင်မည့်အချက်များအား ညှိနှိုင်း ဆွေးနွေးဆဲဖြစ်ကြောင်း သိရသည်။ “အိန္ဒိယဘက်က ဘဏ်တခုနှင့်တခု အချက်အလက် ပြည့်စုံလျှင် ငွေလွှဲတန်ဖိုးအရ ငွေပေးချေရန် ကတိက၀တ်ပြုတဲ့ ငွေလွှဲစာတမ်း စနစ်ကို သုံးချင်တယ်၊ ကုန်သည်တွေက အဲဒီစနစ်နဲ့ သိပ်အကျွမ်းတဝင် မရှိဘူး။ အဲဒါကြောင့် ဒီမှာ သုံးနေကျဖြစ်တဲ့ ငွေယူပြီးမှ ပစ္စည်းတင်ပေးတဲ့ စနစ်ဆိုရင် ကုန်သည်တွေအတွက် ပိုအဆင်ပြေမယ်” ဟု ဘုရင့်နောင်ကုန်စည်ဒိုင်မှ ပဲကုန်သည် ဒေါက်တာ မြတ်စိုးက ပြောသည်။ ရန်ကုန် ဘုရင့်နောင် ကုန်စည်ဒိုင်မှ သိရသော အချက်အလက်များအရ လက်ရှိဈေးကွက်တွင် မတ်ပဲ တတန်လျှင် ၁၆ သိန်း၊ ပဲစင်းငုံတတန်လျှင် ၁၃ သိန်းဖြင့် အရောင်းအဝယ် ပုံမှန်ဖြစ်နေပြီး ပြီးခဲ့သည့် ဇူလိုင်တလလုံး အိန္ဒိယဘက်က အဝယ်ရပ်သွားသဖြင့် တတန်လျှင် မတ်ပဲ ၁၈ ဒဿမ ၅ သိန်းမှ ထိုးကျခဲ့သွားသည့် ဈေးနှုန်းလည်း ဖြစ်သည်။ မြန်မာနိုင်ငံမှ မတ်ပဲ၊ ပဲစင်းငုံ၊ ကုလားပဲ တို့ကို အိန္ဒိယနိုင်ငံသို့ နှစ်စဉ် ပုံမှန်တင်ပို့ရောင်းချလျက်ရှိပြီး ယခုနှစ်တွင် အိန္ဒိယအစိုးရက မြန်မာနိုုင်ငံထွက် ပဲအား တရားဝင် ဝယ်ယူရန် ပထမဆုံးအကြိမ် ကမ်းလှမ်းခြင်း ဖြစ်သည်။ ပြီးခဲ့သည့် ဘဏ္ဍာရေးနှစ်က အိန္ဒိယနိုင်ငံနှင့် ကုန်သွယ်မှုပမာဏမှာ အမေရိကန်ဒေါ်လာ ၁၇၁၂ သန်းခန့် ရှိခဲ့သည့်အနက် ပို့ကုန်တန်ဖိုးမှာ အမေရိကန်ဒေါ်လာ ၉၀၄ သန်းခန့်ရှိကြောင်း စီးပွားရေးနှင့် ကူးသန်းရောငး်၀ယ်ရေး၀န်ကြီးဌာနက ထုတ်ပြန်ထားသည့်အချက်အလက်များအရ သိရသည်။
Source : http://goo.gl/KVj7o9
via IFTTT