အာဏာသိမ္းမႈ ႀကိဳးကိုင္သူဟု စြပ္စြဲခံရသူကို အေမရိကန္ လႊဲမေပးပါက ႏွစ္ႏုိင္ငံ ဆက္ဆံေရး ထိခိ

အာဏာသိမ်းမှု ကြိုးကိုင်သူဟု စွပ်စွဲခံရသူကို အမေရိကန် လွှဲမပေးပါက နှစ်နိုင်ငံ ဆက်ဆံရေး ထိခိုက်မည်ဟု တူရကီ သတိပေး ===================== မအောင်မြင်သော အာဏာသိမ်းမှုကို ကြိုးကိုင်သူဟု စွပ်စွဲခံရသည့် အစ္စလာမ် တရားဟောဆရာ ဖက်သူလာဂူလမ်ကို လွှဲပြောင်းပေးရန် အမေရိကန် တာဝန်ရှိသူများအား တူရကီလွှတ်တော် အမတ်များက တောင်းဆိုခဲ့ကြကြောင်း VOA သတင်းတွင် ဖော်ပြထားသည်။ အမေရိကန်မြေပေါ်တွင် ထိန်းသိမ်းထားနိုင်ရန် သို့မဟုတ် နောက်ထပ် မလှုပ်ရှားနိုင်စေရန်အတွက် အမေရိက တာဝန်ရှိသူများက အလေးဂရုပြု ဆောင်ရွက်စေလိုကြောင်း လက်ယာယိမ်း အမျိုးသား လှုပ်ရှားမှုပါတီ (MHP) မှ အမတ် တစ်ဦးဖြစ်သူ ကမီလ်အေဒင်က VOA သို့ ပြောဆိုသည်။ သူနှင့် အခြား တူရကီအမတ် သုံးဦးတို့သည် ဩဂုတ်လ ၁ ရက်နေ့တွင် အမေရိကန် တရားရေးဌာန တာဝန်ရှိသူများနှင့် တွေ့ဆုံခဲ့ကြပြီး ယင်းနောက်တွင် အမေမြေ လုံခြုံရေးဌာန၊ နိုင်ငံခြားရေးဌာနတို့နှင့် ဆက်လက် ညှိနှိုင်းကြမည်ဖြစ်သည်။ တူရကီ လွှတ်တော်ကိုယ်စားလှယ် အဖွဲ့ခေါင်းဆောင်၊ လွှတ်တော်နိုင်ငံခြားရေး ကော်မရှင်ဥက္ကဋ္ဌ တာဟာအော်ဇန်က ဂူလန်ကိစ္စ ဆွေးနွေးမှုတွင် အမေရိကန် တရားရေးဌာနက ပူးပေါင်း ဆောင်ရွက်မှု ရှိသည်ဟု ပြောကြားခဲ့သည်။ ဝါရှင်တန်ကသာ အန်ကာရာ (တူရကီ)၏ လွှဲပြောင်းပေးရန် တောင်းဆိုမှုကို ပယ်ချခဲ့ပါက အမေရိကန်-တူရကီ ဆက်ဆံရေးကို သာမက ကမ္ဘာတစ်လွှား အကြမ်းဖက်ဝါဒ တိုက်ဖျက်ရေးအပေါ်တွင်ပါ ဆိုးကျိုး သက်ရောက်မှု ရှိလာနိုင်သည်ဟု သမ္မတ အာဒိုဂန်၏ တရားမျှတမှုနှင့် ဖွံ့ဖြိုးရေးပါတီ (AKP)ဝင် တစ်ဦးဖြစ်သူ အော်ဇန်က သတိပေးခဲ့သည်။ ဂူလန်သာ အမေရိကန်မြေတွင် ဆက်ရှိနေပါက သို့မဟုတ် ထွက်ပြေးခွင့်ရခဲ့ပါက ဒေသနှင့် ကမ္ဘာအဝန်း တည်ငြိမ်မှုအပေါ် သက်ရောက်မှု ရှိလာနိုင်သည်ဟု အော်ဇန်က သတိပေးခဲ့သည်။ အမေရိကန်တွင် တရားဝင် နေထိုင်သူ ဂူလန်သည် ကုလသမဂ္ဂထက် ရုံးခွဲပိုများသော ကမ္ဘာဖြန့်ကြက် အကြမ်းဖက် အဖွဲ့အစည်း တစ်ရပ်ကို ဦးဆောင်နေသည်ဟုလည်း အော်ဇန်က ဝေဖန်ခဲ့သည်။ လွှဲပြောင်းပေးရန် တောင်းဆိုမှု မည်သည့်အခြေအနေ ရောက်နေပြီဆိုခြင်းနှင့် ပတ်သက်ပြီး အမေရိကန် နိုင်ငံခြားရေးဝန်ကြီးဌာန တာဝန်ရှိသူများက အတိအကျ မဖြေဆိုဘဲ ထိုကိစ္စကို တရားရေးဌာနက လေ့လာ ဆန်းစစ်နေသည်ဟုသာ နေ့စဉ် ပြန်လည်တုံ့ပြန် ဖြေကြားနေသည်ဟု VOA သတင်းက ဖော်ပြသည်။ အခြေအနေအရ အမည် မဖော်လိုသော အမေရိကန် သံတမန်များကလည်း ယခုကဲ့သို့ ဂူလန်အင်အားစု တစ်ခုလုံးကို အကြမ်းဖက် အဖွဲ့အစည်းအဖြစ် တံဆိပ်ကပ်ပြီး ဂူလန်ကို လွှဲပြောင်းပေးရန် တောင်းဆိုမှုသည် ဆယ်စုနှစ် များစွာ အရေးပါခဲ့သော နှစ်နိုင်ငံ မဟာဗျူဟာမြောက် ဆက်ဆံရေးအပေါ် ထိခိုက်လာမည်ကို စိုးရိမ်နေကြသည်။ ဂူလန်ကို ထောက်ခံသူ အင်အားစုမှာ တူရကီတွင် သန်းပေါင်း များစွာ ရှိနေသလို ထိုသူများသည် အာဒိုဂန်ကို အာဏာရှင်ဟု မှတ်ယူ ဆန့်ကျင်သူများ ဖြစ်သည်။ အာဒိုဂန်သည် အာဏာသိမ်းရန် ကြိုးပမ်းမှုကို အကြောင်းပြပြီး အရေးပေါ် အခြေအနေ ကြေညာကာ တင်းကျပ်စွာ အုပ်ချုပ်နေပြီး ဂူလန်နှင့် ပတ်သက်သည့် အင်အားစုများကို အရပ်ဘက်၊ စစ်ဘက်၊ ပညာရေး နယ်ပယ်စုံမှ ဖယ်ရှား သန့်စင်လျက်ရှိသည်။ မီဒီယာ အဖွဲ့အစည်း အချို့လည်း အပိတ်ခံခဲ့ရပြီး ဂျာနယ်လစ်အချို့ ထိန်းသိမ်းခံခဲ့ရသည်။ ''ကျွန်တော်တို့ ဆက်ဆံရေးကို အကြမ်းဖက် အဖွဲ့အစည်း တစ်ခုက ပြန်ပေးဆွဲ ဓားစာခံ လုပ်တာကို အမေရိကန်က ခွင့်ပြုလိမ့်မယ်လို့ မယုံကြည်ပါဘူး''ဟု အော်ဇန်က ပြောကြားခဲ့ပြီး အသက် ၇၅ နှစ်အရွယ် ဂူလန်မှာ အမေရိကန်၊ ပင်ဆီလ် ဗေးနီးယားပြည်နယ်တွင် လွတ်လပ်စွာ နေထိုင်ခွင့် ရနေပြီး နေ့စဉ် ရုပ်သံတွင် ပြောကြားခွင့်၊ သူတွေ့လိုသမျှ သူတိုင်းကို တွေ့ဆုံခွင့်ရနေခြင်းမှာ လက်မခံနိုင်ဖွယ် ဖြစ်သည်ဟု ပြောကြားခဲ့သည်။ ဂူလန်ကမူ အာဏာ သိမ်းမှုများတွင် ပါဝင်ခြင်း မရှိဟု ငြင်းဆိုထားသည်။ တူရကီသည် နေတိုးအဖွဲ့ဝင်နိုင်ငံ တစ်နိုင်ငံဖြစ်ပြီး IS ကိုတိုက်ခိုက်ရာတွင် အမေရိကန်၏ အရေးပါသော မဟာမိတ် နိုင်ငံဖြစ်သည်။ အမေရိကန် ဦးဆောင်သည့် မဟာမိတ်တပ်များသည် တူရကီ၊ အင်ဆာလစ် လေဆိပ်ကို အသုံးပြုပြီး IS ပစ်မှတ်များကို ဗုံးကြဲ တိုက်ခိုက်နေခြင်း ဖြစ်သည်။
Source : http://goo.gl/eVjgMB
via IFTTT