ရှစ်လေးလုံးပါတီ အမည်ပြောင်းမည် ရန်ကုန်၊ မတ် ၃၁ ၈၈ မျိုးဆက် ကျောင်းသားဟောင်း အများစုဖြင့် ဖွဲ့စည်းထားသည့် ရှစ်လေးလုံးပါတီကို အမည်ပြောင်းလဲရန် မတ်လ ၃၁ ရက်က ကျင်းပခဲ့သော ပါတီဖြစ်မြောက်ရေး ဗဟိုကော်မတီ အစည်းအဝေးက အကြမ်းဖျင်း ဆုံးဖြတ်ခဲ့ကြောင်း ဗဟိုကော်မတီဝင်တစ်ဦးဖြစ်သူ ကိုမင်းဇေယျက ပြောကြားသည်။ အဆိုပါ ဗဟိုကော်မတီ အစည်းအဝေးမှ အကြမ်းဖျင်း ဆုံးဖြတ်ချက်များကို ဧပြီလ ၁ ရက်တွင်ပြုလုပ်မည့် တစ်နိုင်ငံလုံးမှ နယ်ကိုယ်စားလှယ်များ ပါဝင်သော ပါတီမျက်နှာစုံညီ အစည်းအဝေး၌ အတည်ပြု ဆုံးဖြတ်မည်ဖြစ်သည်။ “အဓိကတော့ ပါတီနာမည်ရွေးတဲ့ကိစ္စကို ဆွေးနွေးတာပေါ့။ ဒါကို မနက်ဖြန် အတည်ပြုမယ်၊ နာမည်ကတော့ အကြမ်းဖျင်း ရွေးထားတာပဲ ရှိသေးတယ်”ဟု ၎င်းက ဆိုသော်လည်း ရွေးထားသည့်နာမည်ကို ထုတ်ဖော်ပြောဆိုခြင်း မရှိပေ။ ရွေးကောက်ပွဲကော်မရှင်၏ ကမ်း လှမ်းချက်အရ မတ်လ၂၆ ရက်၌ ရှစ်လေးလုံးပါတီဖြစ်မြောက်ရေး ဗဟိုဦးဆောင်ကော်မတီနှင့် ရွေးကောက်ပွဲ ကော်မရှင်တို့ နေပြည်တော်၌ အလွတ်သဘောတွေ့ဆုံ ခဲ့ကြပြီးနောက် ယခုကဲ့သို့ အမည်ပြောင်းရန် စဉ်းစားလာခြင်းဖြစ်သည်။ ဆက်လက်ပြီး ဧပြီ ၆ ရက်၌လည်း ပါတီဖြစ်မြောက်ရေး ဗဟိုဦးဆောင်ကော်မတီနှင့် ရွေးကောက်ပွဲ ကော်မရှင်တို့ ထပ်မံ တွေ့ဆုံမည်ဖြစ်ပြီး ဧပြီလ ၁ ရက် ဆုံးဖြတ်ချက်များကို ကော်မရှင်သို့ တင်ပြသွားမည်ဖြစ်သည်။ “ကော်မရှင်တွေ့တုန်းက ဆွေးနွေးထားတာတွေနဲ့ ဒီနေ့အကြမ်းဖျင်းဆွေး နွေးတာတွေကို မနက်ဖြန်ပြည်နယ်နဲ့တိုင်း ကိုယ်စားလှယ်တွေကို ချပြမယ်။ ဘာဆက်လုပ်မယ်ဆိုတာတွေကို သူတို့တိုင်ပင်ပြီး ၆ ရက်နေ့ကော်မရှင်နဲ့တွေ့ ပြီး ဘာဆက် လုပ်မလဲဆိုတာတွေပါ ပြောဖြစ်မယ်”ဟု ဗဟိုကော်မတီဝင်တစ်ဦးဖြစ်သူ ကိုရဲနိုင်အောင်က ဆိုသည်။ ရှစ်လေးလုံးပါတီအမည်ဖြင့် ရွေးကောက်ပွဲ ကော်မရှင်တွင် တရားဝင်ပါတီအဖြစ် ရပ်တည်ရန် မှတ်ပုံတင် လျှောက်ထားသော်လည်း သုံးလကျော်သည်အထိ တရားဝင်မှတ်ပုံတင် မကျသေးပေ။ ရှစ်လေးလုံးပါတီဟူသော အမည်နှင့်ပတ်သက်၍ အငြင်းပွားမှုများ ရှိနေခဲ့ပြီး ထိုအမည်သည် ၈၈ အရေးတော်ပုံ၏ အစဉ်အလာနှင့် နိုင်ငံရေး အနှစ်သာရများကို အပိုင်စီးသလိုဖြစ်နေသည်ဟု နိုင်ငံရေး စိတ်ဝင်စားသူများက အပြင်းအထန် ဝေဖန်နေကြသည်။ လက်ရှိမြန်မာနိုင်ငံတွင် နိုင်ငံရေး ပါတီပေါင်း ၉၀ ကျော် ရှိသော်လည်း တစ်နိုင်ငံလုံးကိုလွှမ်းခြုံ၍ အင်အားကောင်းသောပါတီမှာ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီနှင့် လက်ရှိအစိုးရကို ဦးဆောင်နေသော အမျိုးသားဒီမိုကရေစီအဖွဲ့ချုပ် NLD ပါတီတို့သာရှိပြီး တတိယ အင်အားကောင်းသော ပါတီတစ်ခု ပေါ်ပေါက်ရန် နိုင်ငံရေးလောကမှ မျှော်လင့်နေချိန်တွင် ယခုကဲ့သို့ ရှစ်လေးလုံးပါတီအမည်ဖြင့် မှတ်ပုံတင်လာခြင်းဖြစ်သည်။ ဝေလင်း
Source : https://goo.gl/q1gsq4
via IFTTT
No comments:
Post a Comment