ဝေဖန်မှုတွေ ခံနေရတဲ့ “Reflection – ရောင်ပြန်” ရုပ်ရှင် မြန်မာနိုင်ငံရဲ့ ထိပ်တန်း မင်းသမီး ၄ လက် ပါဝင် သရုပ်ဆောင်ထားပြီးလတ်တလောမှာ ရုံတင်ပြသနေတဲ့ “Reflection – ရောင်ပြန်” ရုပ်ရှင်ဇာတ်ကားဟာ ပရိသတ်အချို့ရဲ့ ဝေဖန်မှုတွေ ခံနေရပါတယ်။ ဒီဇာတ်ကားဟာ Fashion နဲ့ Action ကို အသားပေးပြီး ဒါရိုက်တာလူမင်းက ရိုက်ကူးထားတဲ့ ရုပ်ရှင် ဖြစ်ပါတယ်။ ဒီဇာတ်ကားမှာ အဓိက သရုပ်ဆောင် မင်းသမီး ၄ ဦး ပါဝင်ပြီး မင်းသား မပါတဲ့ထူးခြာတဲ့ မြန်မာ့ရုပ်ရှင်ဇာတ်ကားလို့ ဆိုပါတယ်။ ဇာတ်ကားမှာ အဓိက သရုပ်ဆောင်များ အဖြစ် အကယ်ဒမီ မင်းသမီးကြီး ထွန်းအိန္ဒြာဗို၊ အကယ်ဒမီ အိန္ဒြာကျော်ဇင်၊ အကယ်ဒမီ ဝတ်မှုံရွှေရည် နဲ့ ပက်ထရစ်ရှာ တို့က ပါဝင် သရုပ်ဆောင် ထားကြပါတယ်။ ဒီဇာတ်ကားက ရုံတင်ပြသဖို့ Red Carpet Show မှာကတည်းက သရုပ်ဆောင် မင်းသမီး ၄ ဦး ပွဲကို တက်ရောက်လာခဲ့တဲ့ ဖက်ရှင်ဒီဇိုင်းများနဲ့ ပတ်သတ်လို့လည်း ပရိသတ်များရဲ့ ဝေဖန်မှုကို အပြင်းအထန် ခံခဲ့ရတာ ဖြစ်ပါတယ်။ အဆိုပါ ဇာတ်ကားကို သရုပ်ဆောင်မင်းသမီး အိန္ဒြာကျော်ဇင်ရဲ့ ကိုယ်ပိုင်ထုတ်လုပ်ရေးဖြစ်တဲ့ “သုဒြာ ရုပ်ရှင်ထုတ်လုပ်ရေး” ကနေ ပထမဆုံးထုတ်လုပ်ရိုက်ကူးတဲ့ ရုပ်ရှင်ဇာတ်ကား ဖြစ်ပါတယ်။ ဒီဇာတ်ကားမရိုက်ကူးခင်ကတည်းက ဇာတ်ကားကန်တော့ပွဲမှာ အိန္ဒြာကျော်ဇင်က ဒီဇာတ်ကားက အဓိက ဖက်ရှင်နဲ့ အက်ရှင်ပိုင်းကို ဦးစားပေးရိုက်ကူးသွားမှာလို့ အသိပေးပြောကြားခဲ့ပါတယ်။ “Reflection” ရုပ်ရှင်ကားအတွက် ကုန်ကျစရိတ် သိန်း၂ ထောင် နီးပါး ကုန်ကျခံ ရိုက်ကူးခဲ့တယ်လို့ သိရပြီး မင်းသမီး တဦးစီတိုင်းရဲ့ ဖက်ရှင် မိတ်ကပ်အတွက် Stylist တဦးချင်းစီက သေချာဖန်တီးပေးခဲ့ပါတယ်လို့ ပါဝင်ကြတဲ့ သရုပ်ဆောင်များက ဆိုထားကြပါတယ်။ ဒါပေမယ့် ရုပ်ရှင်ဇာတ်ကားရုံတင်ချိန်မှာတော့ ပရိသတ်က ဖက်ရှင်ပိုင်းကို ဦးစားပေးလွန်းခြင်း၊ အက်ရှင်ခန်းများမှာ မသေသပ်ခြင်း၊ စကားပြောတာ အပြင်လောကနှင့် ကွာခြားလွန်းနေခြင်း စတဲ့ ဝေဖန်မှုတွေ ပြောဆိုနေကြတာ ဖြစ်ပါတယ်။ ဒါ့အပြင် ဒီဇာတ်ကားဟာ နိုင်ငံခြားရုပ်ရှင်ဇာတ်ကား တခုမနဲ့ ပုံစံတူနေတယ်ဆိုပြီး ပရိသတ်အချို့ ဝေဖန် ထောက်ပြမှုများလည်း ရှိနေပါတယ်။။ မင်းသမီး အိန္ဒြာကျော်ဇင်ကတော့ ဝေဖန်မှုတွေကို လက်ခံပါတယ်လို့ အင်တာဗျူးတခုမှာ ဖြေကြားခဲ့ဖူးပါတယ်။ Facebook သုံးစွဲသူများ အကြားမှာတော့ ဒီဇာတ်ကားကို အစအဆုံး Review ပြန်ရေးပြီး ဝေဖန်ထောက်ပြထားတဲ့ post တခု ပျံ့နှံ့နေပါတယ် ။ မြန်မာ့နှစ်ဆန်းတရက်နေ့ မှာ ရုံတင်လာတဲ့ ဒီဇာတ်ကား ကတော့ လတ်တလော ပရိသတ်ဝေဖန်မှု အမြင့်ဆုံး ရုပ်ရှင်ဇာတ်ကားတကားလည်း ဖြစ်နေပါတယ်။ The post ဝေဖန်မှုတွေ ခံနေရတဲ့ “Reflection – ရောင်ပြန်” ရုပ်ရှင် appeared first on ဧရာဝတီ.
Source : https://ift.tt/2HbDRNH
via IFTTT
No comments:
Post a Comment