ဖိအားမ်ား တိုးလာခ်ိန္ အျပဳသေဘာေဆာင္ ေဖာ္ျပရန္ မီဒီယာကို တပ္ခ်ဳပ္ တိုက္တြန္း

ဖိအားများ တိုးလာချိန် အပြုသဘောဆောင် ဖော်ပြရန် မီဒီယာကို တပ်ချုပ် တိုက်တွန်း တိုင်းပြည် ဒီမိုကရေအသွင်သို့ ကူးပြောင်းသည့် အချိန်မှာ သတင်းမီဒီယာသမားများက မှန်မှန်ကန်ကန် တိတိကျကျ ရေးသားဖို့ လိုကြောင်း တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က စာနင်းဇင်းကောင်စီဝင်များနှင့် နေပြည်တော်တွင် တွေ့ဆုံပွဲ တိုက်တွန်းလိုက်သည်။ ယင်းသည် ရခိုင်ပြည်နယ်ရှိ ရိုဟင်ဂျာ ခေါ် ဘင်္ဂလီများကို ကျူးလွန်သော ရာဇဝတ်မှုဖြင့် မြန်မာ့တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် သက်ဆိုင်ရာ တပ်မတော်အရာရှိကြီးများအား တရားစွဲဆိုရန် နိုင်ငံတကာ လွတ်ငြိမ်းချမ်းသာခွင့်အဖွဲ့ (AI) က တောင်းဆိုချိန်နှင့်လည်း တိုက်ဆိုင်နေသည်။ ဇွန်လ ၂၈ ရက်နေ့က နေပြည်တော်ရှိ ကာကွယ်ရေး ဦးစီးချုပ်ရုံး ဘုရင့်နောင် ရိပ်သာတွင် မြန်မာနိုင်ငံ သတင်းမီဒီယာ ကောင်စီဝင်တို့နှင့် တွေ့ဆုံရာတွင် ဗိုလ်ချုပ်မှူးကြီး မင်းအောင်လှိုင်က တခြားနိုင်ငံများတွင်လည်း မိမိတို့တိုင်းပြည် အကျိုးစီးပွားနှင့် ပတ်သက်လာလျှင် အထိမခံဘဲ ပြန်လည်တုန့်ပြန်မှုများရှိကြောင်း၊ ထို့ကြောင့် မိမိတို့နိုင်ငံ စည်းလုံးညီညွတ်သည့် အင်အားမျိုးဖြစ်ပေါ်စေရန် မီဒီယာများမှ လုုပ်ဆောင်ပေးစေလိုကြောင်း၊ အပြုသဘောဆောင်သည့် ရေးသားချက်များ၊ စည်းလုံးညီညွတ်မှုကို ဖြစ်ပေါ်စေသည့်လုပ်ဆောင်ချက်များကို ဖော်ပြစေလိုကြောင်း၊ ပြည်သူ လူထုကို အားပေးသည့် သတင်းထုတ်ပြန်မှုများထက် အားနည်းချက်များကိုသာ ထောက်ပြသည့် ထုတ်ပြန်မှုများသည် စိတ်ဓာတ်ကျဆင်းမှုများကို ပိုမိုဖြစ်ပေါ်စေနိုင်သောကြောင့် ပြည်သူများ၏ စိတ်ဓာတ်မြှင့် တင်ပေးရာ ရောက်သည့် သတင်းများကို အပြုသဘောဆောင်၍ မျှတစွာဖြင့် ရေးသားဖေါ်ပြသင့်ကြောင်း ပြောဆိုခဲ့သည်။ တပ်မတော်နှင့် အချိန် ၄ နာရီကြာ တွေ့ဆုံပွဲ အပြီး စာနယ်ဇင်းကောင်စီ ဒုက္ကဌ ဟံသာဝတီ ဦးအုန်းကြိုင်က “တိုင်းပြည်ရဲ့ လက်ရှိ အခြေအနေအရ ဒီသတင်းမီဒီယာသမားတွေ ရေးသားတာတွေနဲ့ ပတ်သက်လို့ မှန်မှန်ကန်ကန်နဲ့ တိတိကျကျ ရေးနိုင်ဖို့ လိုတယ်ဆိုတဲ့ အကြောင်း ပြောပါတယ်” ဟု ဗိုလ်ချုပ်မှူးကြီး မင်းအောင်လှိုင် ပြောကြားချက်ကို မီဒီယာများသို့ ပြောသည်။ ထို့ပြင် သတင်းစာဆရာများသည် သတင်းရေးသားသည့်အခါ နိုင်ငံ အကျိုးပြုများ ရေးသားစေလိုကြောင်း၊ ယနေ့ နိုင်ငံအတွင်း ဖြစ်ပေါ်နေသည့် ကိစ္စရပ်များကို စဉ်းစားပြီး ရေးသားမှသာလျှင် တိုင်းပြည် အခြေအနေ ကောင်းလာမည်ဟု ဦးအုန်းကြိုင်က ပြောသည်။ သို့ရာတွင် ရခိုင်ပြည်မြောက်ပိုင်းအရေးနှင့် ဆက်နွယ်ပြီး မြန်မာ့တပ်မတော်၏ စစ်ဆင်ရေးများနှင့်ပတ်သက်၍ နိုင်ငံတကာမှ ထွက်ပေါ်လာသော သတင်းများမှာ မကောင်းလှချေ။ ပြီးခဲ့သော ရက်ပိုင်းအတွင်း နိုင်ငံတကာ လွတ်ငြိမ်းချမ်းသာခွင့်အဖွဲ့ (AI) က နောက်ဆုံးထုတ်ပြန်ခဲ့သော “အရာရာကို ဖျက်ဆီးမည် – မြန်မာနိုင်ငံရခိုင်ပြည်မှ လူသားမျိုးနွယ်အပေါ် ကျူးလွန်သော ရာဇဝတ်မှုအတွက် စစ်ဖက်တာဝန်ရှိမှု” အမည်ရှိ အစီရင်ခံစာတွင် တပ်မတော်အကြီးအကဲနှင့် သူ၏လက်ထောက် ဒုဗိုလ်ချုပ်မှူးကြီး စိုးဝင်း အပါအဝင် အရာရှိ ၁၃ ဦးတို့၏ အမည်များကို ဖော်ပြထားပြီး လူသတ်မှု၊ အဓမ္မပြုကျင့်မှုနှင့် ရိုဟင်ဂျာ များကို မောင်းထုတ်မှုတို့အတွက် ကွပ်ကဲရာတွင် တာဝန်ရှိသည်ဟု ဖော်ပြထားသည်။ ဗိုလ်ချုပ်မှူးကြီး မင်းအောင်လှိုင်နှင့် ဒု ဗိုလ်ချုပ်မှူးကြီး စိုးဝင်းတို့အပြင် အဆိုးရွားဆုံး ရက်စက်ကြမ်းကြုတ်မှု အများအပြားကို ကျူးလွန်ခဲ့သည်ဟု စွပ်စွဲခံရသည့် တပ်ဖွဲ့များအတွက် တာဝန်ရှိသော အဆင့်မြင့် တပ်မှူးများဖြစ်သည့် အမှတ် ၁၅ စစ်ဆင်ရေးဌာနချုပ်မှူး ဗိုလ်မှူးချုပ် ခင်မောင်စိုး၊ အမှတ် ၃၃ ခြေမြန်တပ်မ တပ်မမှူး ဗိုလ်မှူးချုပ် အောင်အောင်နှင့် အမှတ် ၉၉ ခြေမြန်တပ်မ တပ်မမှူးဟောင်း ဗိုလ်မှူးချုပ် သန်းဦးတို့လည်း ပါဝင်သည်။ ထို့အပြင် အမှတ် ၃ အထူးစစ်ဆင်ရေးအဖွဲ့မှူး ဒု ဗိုလ်ချုပ်ကြီး အောင်ကျော်ဇော၊ အမှတ် ၃၃ ခြေမြန်တပ်မမှ စစ်မြေပြင်တပ်မှူး တဦးဖြစ်သူ ဗိုလ်မှူး အောင်မျိုးသူ၊ ရခိုင်ပြည်နယ်ကို ကွပ်ကဲသော အနောက်ပိုင်းတိုင်း စစ်ဌာနချုပ် တိုင်းမှူး ဗိုလ်ချုပ်မောင်မောင်စိုး၊ ထိုစွပ်စွဲထားသော ရာဇဝတ်မှုများ ဖြစ်ပွားချိန်တွင် နယ်ခြားစောင့် ရဲတပ်ဖွဲ့၏ တပ်ဖွဲ့မှူး ဗိုလ်မှူးချုပ်စန်းလွင်တို့ ပါဝင်သည်။ အမှတ် ၃၃ နှင့် ၉၉ ခြေမြန်တပ်မများကို သြဂုတ်လ လယ်တွင် ရခိုင်ပြည်နယ်တွင် ဖြန့်ချခဲ့သည်။ လွန်ခဲ့သောနှစ် သြဂုတ်လနှောင်းပိုင်းတွင် ARSA အကြမ်းဖက်အဖွဲ့က ရခိုင်ပြည်နယ် ရဲနှင့် စစ်ကင်းစခန်း ၃၀ ကို ချိန်ကိုက် တိုက်ခိုက်ခဲ့သောကြောင့် ထိုနေရာများတွင် ဖြစ်ပေါ်လာသော နယ်မြေရှင်းလင်းမှု စစ်ဆင်ရေးများအတွင်း မွတ်ဆလင် ၇၀၀၀၀၀ ခန့် ဘင်္ဂလားဒေ့ရှ် နိုင်ငံသို့ ထွက်ပြေးခဲ့ရသည်။ ထိုအစီရင်ခံစာက မြန်မာနိုင်ငံကို နိုင်ငံတကာရာဇဝတ်ခုံရုံး (ICC) သို့ လွှဲပြောင်းပေးပို့ စစ်ဆေးစီရင်ရန် တောင်းဆိုသည်။ ICC က မြန်မာနိုင်ငံကို နိုင်ငံတကာ နယ်စပ်ဖြတ်ကျော် မောင်းထုတ်မှု စွပ်စွဲချက်ဖြင့် အမှုဖွင့်ရန် စဉ်းစားနေချိန်နှင့် ထိုအစီရင်ခံစာ ထုတ်ပြန်ချိန် တိုက်ဆိုင်နေသည်။ လွန်ခဲ့သော နှစ်က ရခိုင်ပြည်နယ်မှ ဟိန္ဒူများကို အစုလိုက်အပြုံလိုက် သတ်ဖြတ်မှု အထောက်အထားများ ပါသော အခြား အစီရင်ခံစာကို လွန်ခဲ့သောလတွင် AI က ထုတ်ပြန်ခဲ့သောကြောင့် AI သည် ၎င်းတို့ အဆိုအရ “အကြီးအကျယ် လျှော့လျှော့ပေါ့ပေါ့ ထုတ်ပြန်နေသော ARSA စစ်သွေးကြွအုပ်စု၏ လူ့အခွင့်အရေး ချိုးဖောက်မှုများ” ကို ပထမဆုံးထုတ်ပြန်သော အဖွဲ့ဖြစ်လာသည်။ AI သည် ဘက်မလိုက်သော အဖွဲ့အစည်းဖြစ်သည်ဟု တပ်မတော်က ထိုစဉ်က ချီးကျူးပြီး အခြား နိုင်ငံတကာ အဖွဲ့အစည်းများနှင့် မီဒီယာများလည်း အလားတူ လုပ်ဆောင်ကြရန် တိုက်တွန်းခဲ့သည်။ ယခု AI ၏ အစီရင်ခံစာတွင် မြန်မာ့တပ်မတော်သည် ကချင်ပြည်နယ်နှင့် ရှမ်းပြည် မြောက်ပိုင်း အပါအဝင် အခြားနေရာများတွင်လည်း အနည်းဆုံး ၂၀၁၁ ခုနှစ်မှစတင်ပြီး နိုင်ငံတကာဥပဒေအရ ရာဇဝတ်မှုများ ကျူးလွန်သောကြောင့် ထိုသို့ လွှဲအပ်ခြင်းသည် တနိုင်ငံလုံးမှ ရာဇဝတ်မှုများ အကျုံးဝင်သင့်သည်ဟုလည်း ဆိုသည်။ စုံစမ်းစစ်ဆေးစီရင်မှု အလားအလာကို စဉ်းစားသုံးသပ်ရန် မြန်မာနိုင်ငံကို ICC ၏ လွန်ခဲ့သောအပတ်က တောင်းဆိုမှုနှင့် ပတ်သက်ပြီး အစိုးရပြောခွင့်ရသူ ဦးဇော်ဌေးက “ICC နဲ့ မြန်မာနိုင်ငံနဲ့က ဘာမှ မပတ်သက်ဘူး။ ICC က စုံစမ်းစစ်ဆေးစီရင်ဖို့ ဘာတွေပဲ လုပ်နေနေ မြန်မာနိုင်ငံအနေနဲ့ တုန့်ပြန်စရာ အကြောင်းမရှိဘူး” ဟု ပြောကြားခဲ့သည်။ ဇွန်လ ၂၅ ရက်နေ့က ဥရောပသမဂ္ဂ EU သည် AI ၏ စာရင်းမှ လူ ၆ ဦးအပါအဝင် မြန်မာစစ်အရာရှိ ၇ ဦးတို့ကို ပိတ်ဆို့ အရေးယူကြောင်း ကြေညာခဲ့သည်။ ရိုဟင်ဂျာ စစ်သွေးကြွ တိုက်ခိုက်မှုကို တုန့်ပြန်ရာတွင် အရည်အချင်း မပြည့်မီသောကြောင့် ဗိုလ်မှူးချုပ် မောင်မောင်စိုးကို ထိုနေ့အစောပိုင်းကပင် ထုတ်ပယ်ခဲ့ကြောင်းနှင့် ဒုတိယဗိုလ်ချုပ်ကြီး အောင်ကျော်ဇောကို မေလကပင် တပ်မှ နုတ်ထွက်ခွင့် ပြုခဲ့ကြောင်းကို EU ၏ အရေးယူပိတ်ဆို့ကြောင်း ကြေညာပြီး နာရီပိုင်းအကြာ ထိုညမှာပင် တပ်မတော်က ကြေညာခဲ့သည်။ The post ဖိအားများ တိုးလာချိန် အပြုသဘောဆောင် ဖော်ပြရန် မီဒီယာကို တပ်ချုပ် တိုက်တွန်း appeared first on ဧရာဝတီ.
Source : https://ift.tt/2tGz7a1
via IFTTT