မြန်မာ ဂျာနယ်လစ် ကွန်ရက် ရုံးခန်း အမြန်ပြောင်းရွှေ့ရန် ဖိအားပေးခံရ မြန်မာ ဂျာနယ်လစ် ကွန်ရက် (MJN) ရုံးခန်းကို ငှားရမ်းစာချုပ် မပြည့်သေးဘဲ ၁၅ ရက် အတွင်း အမြန်ပြောင်းရွှေ့ပြီး ပြန်လည် အပ်နှံရန် အခန်းပိုင်ရှင် ဖြစ်သူက ဖိအားပေးကြောင်း သိရှိရသည်။ MJN အထွေထွေအတွင်းရေးမှူး ဦးမြင့်ကျော်က“ပြီးခဲ့တဲ့ ၂၀၁၆၊ ၂၀၁၇ ခုနှစ် ၂နှစ်လုံး ငှားထားတာ၊ အခု ၂၀၁၈ တနှစ်လုံး ငှားထားတာ ဘာမှမဖြစ်ဘဲနဲ့ ပြီးခဲ့တဲ့ရက်က လုပ်ခဲ့တဲ့ အဓမ္မဝါဒ ဆန့်ကျင်ရေး ကော်မတီ၊ အဲဒီကလုပ်တဲ့ သတင်းစာ ရှင်းလင်းပွဲနဲ့ ပတ်သက်ပြီး လူအုပ်စုနဲ့ သံဃာတွေနဲ့ လာနှောင့်ယှက်ပြီးတော့ စိုးရိမ်ပြီးတော့၊ စိုးရိမ်တယ် ဆိုတာထက် မနက်ကတွေ့တော့ ရဝတ က ပြောတယ်လို့ ပါလာတယ်။ အိမ်ရှင်က ရိုးရိုး စိုးရိမ်ရုံတင် မကဘူး၊ ရဝတ တို့ ဘာတို့က ဖိအားပေးတယ် ဆိုတာ တွေ့ရတယ်”ဟု ဧရာဝတီ သို့ ပြောသည်။ ဆရာတော် ဦးဝီရသူ နှင့် ပတ်သက်သော သတင်းစာ ရှင်းလင်းပွဲ တခုကို ဖေဖော်ဝါရီလ ၂၅ရက်က MJN ရုံးခန်းတွင် ပြုလုပ်ရန် စီစဉ်ခဲ့ပြီးနောက် ဖျက်သိမ်းခဲ့ရကြောင်း သိရသည်။ ယခုကဲ့သို့ ရုံးခန်းကို အမြန်ပြောင်းရွှေ့ ပေးရန် အိမ်ရှင်မှတဆင့် ဖိအားပေးခြင်း ဖြစ်သော်လည်း ၁၅ ရက်အတွင်း ရွှေ့ပြောင်းရန် အခက်အခဲရှိကြောင်း ဦးမြင့်ကျော်က ပြောသည်။ ဦးမြင့်ကျော်က“ရွှေ့တော့ ရွှေ့ပေးရမှာပါ။ ဒါပေမယ့် အခု ဖိအားပေးနေတာ သူတို့က ၁၅ ရက်အတွင်း၊ ရက် ၂၀ အတွင်း အမြန်ရွှေ့ပေးဖို့ ဆိုတော့ အဲဒါကတော့ စာချုပ်ပါ သဘောတူညီချက်နဲ့လည်း မညီဘူး။ အခက်အခဲလည်း ဖြစ် နေတယ်။ ၁၅ ရက်အတွင်း ရွှေ့ဆိုတာကတော့ အဆင်မပြေဘူး။ ဒီမတိုင်ခင်ကလည်း ရုံးခန်းမှာ ဆေးသုတ်တာတို့ မျက်နှာကျက် ပြန်ပြင်တာတို့နဲ့ သိန်း ၂၀၊ ၃၀ ဖိုးလောက် လုပ်ထားသေးတယ်။ အဲဒီလိုလုပ်တဲ့အခါ MJN အနေနဲ့ ဆုံးရှုံးတာပေါ့ ”ဟုလည်း ပြောဆိုသည်။ ထိုသို့ အလျင်အမြန် ပြောင်းရွှေ့ရန် ဖိအားပေးသည်သာမက ပြင်ဆင်စရိတ်များနှင့် ပတ်သက်၍လည်း အိမ်ရှင်ဘက်မှ တာဝန်ယူ ပေးလျော်ရန် အစီအစဉ် မရှိဟု ငြင်းဆိုခဲ့ကြောင်း သိရသည်။ ရပ်ကွက် အုပ်ချုပ်ရေးမှူးကို ပြသရန် အတွက်ဟု ဆိုကာ ရက် ၂၀ အတွင်း ပြောင်းရွှေ့ပေးပါမည်ဟု ဆိုသည့် ခံဝန် လာရောက် ထိုးခိုင်းသော်လည်း MJN အနေဖြင့် အကြောင်း မပြန်သေးကြောင်း MJN အလုပ်မှုဆောင် တဦးဖြစ်သည့် ကိုဇေယျာလှိုင် ကလည်း ပြောသည်။ “မနေ့က ညသန်းခေါင်လောက်ကြီး ဖုန်းဆက်ပြီး အလျင်အမြန် အားချင်း ရွှေ့ပြောင်းပေးဖို့ ပြောတယ်။ နောက်ပြီး ဒီနေ့ မနက် ကျနော်တို့ ကာတွန်းပြပွဲရှိတော့ ကာတွန်းပြပွဲ လာကြည့်ပြီး ရက် ၂၀ အတွင်း ရွှေ့ပေးပါ ပြောတယ်။ ဘာလို့လဲ ဆိုတော့ အုပ်ချုပ်ရေးမှူးကို ပြဖို့လို့ ပြောတာကိုး။ အခုမှ သက်တမ်းပြန်ချုပ်ထားတာ ၂ လပဲရှိသေးတယ်”ဟုလည်း ၎င်းက ပြောပြသည်။ အဆိုပါကိစ္စရပ်နှင့် ပတ်သက်ပြီး အိမ်ရှင်ဖြစ်သူကို ဧရာဝတီက ဆက်သွယ်မေးမြန်းသော်လည်း ဖြေကြားရန် အစီအစဉ် မရှိကြောင်း ပြောကြားသည်။ သတင်းထောက်များ၏ လူမှုရေး အခက်အခဲများနှင့် ပြဿနာရပ် တချို့ကို တတ်စွမ်းသရွေ့ ဝိုင်းဝန်းရိုင်းပင်း ကူညီ သွားရန် ရည်ရွယ်၍ မြန်မာဂျာနယ်လစ် ကွန်ရက် (MJN) ကို မြန်မာပြည်တွင်း သတင်းသမား လူငယ်များဖြင့် စုစည်း ကာ ၂၀၁၁ ခုနှစ် စက်တင်ဘာလတွင် စတင်ဖွဲ့စည်းခဲ့ခြင်း ဖြစ်သည်။ သတင်းမီဒီယာနှင့် ပြည်သူတို့ကြား သတင်းစီးဆင်းမှု အားကောင်းစေရန်နှင့် လူ့အခွင့်အရေး ချိုးဖောက်ခံ ရမှုများ အား ဖော်ထုတ်နိုင်ရန် နေရာတခုအဖြစ် MJN ရုံးခန်းတွင် သတင်းစာ ရှင်းလင်း ပွဲများကို ကျင်းပခွင့် ပြုခဲ့ခြင်းဖြစ်ပြီး စတင် တည်ထောင်ချိန်မှ ၂၀၁၇ ခုနှစ်ကုန်အထိ သတင်းစာ ရှင်းလင်းပွဲနှင့် ဆက်စပ်ပွဲပေါင်း ၄၆၀ ကျော် အထိ ရှိကြောင်း သိရ သည်။ The post မြန်မာ ဂျာနယ်လစ် ကွန်ရက် ရုံးခန်း အမြန်ပြောင်းရွှေ့ရန် ဖိအားပေးခံရ appeared first on ဧရာဝတီ.
Source : http://ift.tt/2CJ26f0
via IFTTT
No comments:
Post a Comment