ဒီတပတ္ဖတ္စရာ

ဒီတပတ်ဖတ်စရာ စာရေးသူ – သိပ္ပံမောင်ဝ စာအုပ်အမည် – ရွာ့ကျက်သရေနှင့် အခြားဝတ္ထုုတိုများ အမျိုးအစား – ဝတ္ထုတို သိပ္ပံမောင်ဝဟာ သူ့ရဲ့ အုပ်ချုပ်ရေး ဝန်ထမ်းဘ၀ အတွေ့အကြုံတွေကို မောင်လူအေး ဇာတ်ကောင်ထားပြီး ပြည်သူတွေကို တင်ပြခဲ့ပါတယ်။ ဒီစာအုပ်မှာ စည်းစိမ်၊ ရွေးကောက်ပွဲ၊ လေလံပွဲ၊ ရွာ့ကျက်သရေ၊ နှိုက်နှိုက်ချွတ်ချွတ် စတဲ့ဝတ္ထုတို ၅ ပုဒ်ကို ဖတ်ရှုရမှာပါ။ ဂန္ထလောကနဲ့ ဒဂုန်မဂ္ဂဇင်းမှာ ပါခဲ့တဲ့ ဝတ္ထုတိုလေးတွေ ဖြစ်ပြီး အင်္ဂလိပ်ခေတ် မြန်မာ့ပညာရေး၊ နိုင်ငံရေး၊ လူနေမှုဘဝကို ပီပီပြင်ပြင် သရုပ်ဖော်ထားပါတယ်။ ရွေးကောက်ပွဲဝတ္ထုတိုမှာ “မောင်ရွှေကျေးက သူ့ပုံးထဲ မဲထည့်ခဲ့သည် ဟု ထင်သည်။ မောင်သာပန်း ကလည်း သူ့ပုံးထဲ မဲထည့်ခဲ့သည်ဟု မှတ်ထင်သည်။ မောင်ကာလီကား မောင်ရွှေကျေးထံမှ ငွေနှစ်ဆယ် ကျပ်၊ မောင်သာပန်း ထံမှ ငွေနှစ်ဆယ်ကျပ် ရပြီးလေပြီ” လို့ သရုပ်ဖော်ထားသည်။ တဖန် ရွာ့ကျက်သရေ ဝတ္ထုတိုမှာလည်း “ဆရာစော၏ ကျောင်းသားကျောင်းသူတို့ကား ဆရာကတော်ကြီးရောင်း သော ပဲလှော်အပြင် မည်သည့် မုန့်ကိုမျှ ဝယ်စားခြင်း မပြုရ။ ကျောင်းသားများနှင့် သင့်လျော်လေအောင် အထူးစီမံထား သော ပဲလှော်ပင်ဖြစ်လေသည်။ (ဤကား ဆရာကတော်ကြီး၏ အဆိုတည်း)” ရေးဖွဲ့ထားပါတယ်။ The key Collection က တန်ဖိုး ၁၅၀၀ ကျပ်နဲ့ဖြန့်ချိထားပါတယ်။ စာရေးသူ – ဦးဘရင် စာအုပ်အမည် – ဟံသာဝတီဦးဘရင်၏ ဦးဘရင် အမျိုးအစား – အတ္ထုပ္ပတ္တိ “ငါးကြော်စားသူ ပမာ အဆိုးကို ရှောင်၊ အကောင်းကို ဆောင်၊ မှတ်စရာကို မှတ်၊ ခံစားစရာကို ခံစား ဆိုသလို ဖြစ်ဖို့သာ ရှိလေသည်” လို့ ဆရာမာဃက စာအုပ်ရဲ့အမှာစကား ဆိုပါတယ်။ ဆရာကြီးဦးဘရင်ကလည်း ရဟန်းဝတ်လိုက် ထွက်လိုက်၊ ရုပ်သေးကြိုးဆွဲဆရာ လုပ်လိုက်၊ အလမ္ပာယ်ဆရာ လုပ်လိုက်၊ စက်ချုပ်သည် ဘဝမှ ပိုက်ထိုးကွန်ပစ်၊ ငါးမျှားသူ၊ ကစားဝိုင်း ထောင်သူ၊ လက်ဝှေ့သမား၊ ကျောက်တူးသမား၊ ကျောက်မိုင်းခွဲသူ၊ မျက်လှည့်ဆရာ၊ တိရစ္ဆာန်ထောင်မှူး၊ စာပြင်ဆရာ၊ စာရေးဆရာ၊ သတင်းစာဆရာ၊ ရန်ကုန်တက္ကသိုလ် မြန်မာစာဌာန အထူးနည်းပြ၊ စာပေဗိမာန် မြန်မာစာပေ အတိုင်ပင်ခံ ပုဂ္ဂိုလ် စသည်ဖြင့် ဘဝစုံသူ ဖြစ်ပါတယ်။ ဒီအကြောင်းတွေကို ဟံသာဝတီ ဦးဘရင်၏ ဦးဘရင် ကိုယ်တိုင်ရေး အတ္ထုပ္ပတ္တိမှာ ဖတ်ရှုရမှာ ဖြစ်ပါတယ်။ ဆရာကြီးက သူ့ စာအုပ်ကို ဖတ်ပြီး မျိုးဆက်သစ်တွေက အကျိုးရှိတာကို ဆောင်ရွက်ကြပြီး အကျိုးမရှိတာကို ပယ်ရှားကြပါလို့ ဆိုပါတယ်။ စိတ်ကူးချိုချိုက တန်ဖိုး ၂၂၀၀ ကျပ်နဲ့ဖြန့်ချိထားပါတယ်။ စာရေးသူ – ခင်မျိုးချစ် စာအုပ်အမည် – ဗုဒ္ဓဘာသာဝင်တစ်ဦး၏ ခရီးကြမ်း အမျိုးအစား – ဘာသာရေး “မည်သည့်ပုဂ္ဂိုလ် အရဟတ္တဖိုလ်ဆိုက်၍ ရဟန္တာဖြစ်သွားပြီ ဟူသော သတင်းသည် ကျမ၏ စိတ်ကို ဘယ်လိုမှ နိုးဆွနိုင်ခြင်း မရှိသော်လည်း ကျမမိတ်ဆွေ ၂ ဦး ဖြစ်သော ဗိုလ်သိန်းဆွေနှင့် ကိုလှဖေတို့ ဘုန်းကြီးဝတ်သွားပြီဟူသော သတင်းသည် ကျမစိတ်ကို များစွာ လှုပ်ရှားစေပါသည်” လို့ ဆရာမကြီးက ဆိုပါတယ်။ ဆရာမကြီးဟာ မိတ်ဆွေများ ရှိရာ ဘောက်ထော်စွန်းလွန်းဂူ ကျောင်းကိုသွားရင်း တရားထိုင်ခြင်းကို စတင်နိုင်ခဲ့ပါတယ်။ ဒီစာအုပ် ကတော့ တရားထိုင်စဉ် အတွေ့အကြုံတွေကို ရေးသားမှတ်တမ်းတင်ထားတာ ဖြစ်ပါတယ်။ တရားထိုင်ရင်း ဒေဝနာနှင့် ဝေဒနာအပေါ် သိစိတ်များ ဖြစ်ပေါ်လာချိန်မှာ ဘဝချုပ်ငြိမ်းခြင်းကို လက်ခံဖို့ ခက်ခဲလာပုံစတဲ့ အတွေ့အကြုံ အဖုံဖုံကို အင်္ဂလိပ်-မြန်မာ နှစ်ဘာသာနဲ့ ဖတ်ရှုရမှာဖြစ်ပါတယ်။ လင်းလွန်းခင်စာပေတိုက်က တန်ဖိုး ၁၂၀၀ ကျပ်နဲ့ဖြန့်ချိထားပါ တယ်။ စာရေးဆရာ – ပိုင်စိုးဝေ စာအုပ်အမည် – ဗုဒ္ဓဟူးနေ့မှာ မိုင်ငါးရာ ဝတ္ထုတိုပေါင်းချုပ် ၁ အမျိုးအစား – ဝတ္ထုတို “စနေနေ့နှင့် တနင်္ဂနွေနေ့ တနေ့လုံးမှာ ကျနော်ပိုင် အားလပ်ရက် ဖြစ်သည်။ သို့သော် ကျနော် မပိုင်။ ရုံးအားလပ်ရက်များ သည် အိမ်တွင် တာဝန်ချိန်များ ဖြစ်နေတတ်ပြန်သည်” လို့ ဆရာပိုင်စိုးဝေရဲ့ အိမ်မက်ထဲသို့ ပျံသန်းခြင်း ဝတ္ထုတိုမှာ ရေးသားထားပါတယ်။ ဒါပေမယ့် ပိုင်စိုးဝေ ဝတ္ထုတွေကိုတော့ ရုံးအားလပ်ရက်တွေမှာ ဖတ်ကြည့်လိုက်ပါ။ ဝတ္ထုတို ရွှေခေတ်ထဲမှာ ထင်ရှားခဲ့တဲ့ ဝတ္ထုတို အရေးသားသစ်တွေကို လေ့လာလိုသူများ မြည်းစမ်းလိုသူများ အတွက် ညွှန်းလိုက်ရပါတယ်။ ဒီစာအုပ်မှာ အိပ်မက်ထဲသို့ ပျံသန်ခြင်း၊ မြူတွေ ဝေ့ဆိုင်း အုံ့မှိုင်းရီ၊ ကျုံးမြို့ရိုး၏ အရှေ့ဘက်မျက်နှာ၊ အမေ့အတွက် ကက်တလောက် စာအုပ်သစ်၊ အိပ်မက်နဒီ၊ နွေရက်များပေါ် ပြန့်ကျဲသွားခြင်း၊ တောင်သာက ခွေးကလေး၊ မူးတဲ့ည၊ ညရထား၊ ကမ်းဝေးခဲ့ပြီ၊ မွေးနေ့၊ ဦးသောဘိတနှင့် ကျနော်၊ ငါ့မာနကို ဖွဖွဆုပ်ကိုင် လှောင်ရယ်နိုင်သည်၊ ဗုဒ္ဓဟူးနေ့မှ မိုင်ငါးရာ၊ လူဝတ္ထု အပါအဝင် ဝတ္ထုတိုအပုဒ် ၃၀ ပါဝင်ပါတယ်။ နှစ်ကာလများစာပေက တန်ဖိုး ၅၀၀၀ ကျပ်နဲ့ဖြန့်ချိထားပါတယ်။ The post ဒီတပတ်ဖတ်စရာ appeared first on ဧရာဝတီ.
Source : http://ift.tt/2BJNYp4
via IFTTT