အေမရိကန္ ႏိုင္ငံျခားေရးဝန္ႀကီး ခရီးစဥ္မွ အဓိက ေကာက္ႏႈတ္ခ်က္မ်ား

အမေရိကန် နိုင်ငံခြားရေးဝန်ကြီး ခရီးစဉ်မှ အဓိက ကောက်နှုတ်ချက်များ အမေရိကန်နိုင်ငံခြားရေးဝန်ကြီး ရက်စ်တေလာဆန်သည် ရခိုင်ပြည်နယ်အရေးနှင့်ပတ်သက်ပြီး နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် မြန်မာ့တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင်တို့နှင့် တွေ့ဆုံဆွေးနွေးရန် ဗုဒ္ဓဟူးနေ့က မြို့တော် နေပြည်တော်သို့ ရောက်လာခဲ့သည်။ သြဂုတ်လက စတင်သော နယ်မြေရှင်းလင်းမှု စစ်ဆင်ရေးများအပြီးတွင် ရခိုင်ပြည်နယ်မြောက်ပိုင်းမှ ဘင်္ဂလားဒေ့ရှ် နိုင်ငံသို့ထွက်ပြေးရသော မွတ်ဆလင် ဒုက္ခသည် ၆ သိန်းကျော်ရှိလာသောကြောင့် နိုင်ငံတကာ ပြစ်တင်ဝေဖန်မှုများအပြင် အမေရိကန်ပြည်ထောင်စုနှင့် ဥရောပသမဂ္ဂတို့က တပ်မတော်ခေါင်းဆောင်မှုပိုင်းအပေါ် အရေးယူပိတ်ဆို့မှု ဖိအားများ မြန်မာနိုင်ငံအပေါ် ကျရောက်လာချိန်တွင် ထိုသို့တွေ့ဆုံဆွေးနွေးခဲ့ခြင်း ဖြစ်သည်။ အငြင်းပွားဖွယ်ရာ သတ်ဖြတ်မှုများ၊ အဓမ္မပြုကျင့်မှုများနှင့် မီးရှို့မှုများကို မြန်မာလုံခြုံရေးတပ်များက ကျူးလွန်ခဲ့သည်ကို ကိုယ်တိုင်မြင်တွေ့ခဲ့သည်ဟု ဒုက္ခသည် အများအပြားက ပြောကြသည်။ ဆွေးနွေးပွဲများအပြီးတွင် ဒေါ်အောင်ဆန်းစုကြည်နှင့် ရက်စ် တေလာဆန်တို့သည် ပူးတွဲသတင်းစာရှင်းလင်းပွဲ ကျင်းပပြီး မီဒီယာများ၏ မေးခွန်းများကို ဖြေကြားကာ အမေရိကန်ပြည်တောင်စုနှင့် ဒေသတွင်းမှ မိတ်ဆွေ နိုင်ငံများသည် မြန်မာနိုင်ငံ၏ အောင်မြင်သော ဒီမိုရေစီအကူးအပြောင်းကို ရည်မှန်းပြီး မြန်မာအစိုးရနှင့် ပြည်သူများ အကျပ်အတည်းမှ အလျင်အမြန်၊ နားလည်မှုရှိရှိနှင့် ပွင့်ပွင့်လင်းလင်း လွတ်မြောက်ရေးအတွက် ကူညီရန် ဆုံးဖြတ်ထားကြောင်း ပြောကြားခဲ့ကြသည်။ အမေရိကန်နိုင်ငံခြားရေးဝန်ကြီးသည် တပ်မတော် အကြီးအကဲ ဗိုလ်ချုပ်မှူးကြီး မင်းအောင်လှိုင်နှင့်လည်း သီးခြားတွေ့ဆုံဆွေးနွေးခဲ့သည်။ မီဒီယာတွေ့ဆုံပွဲနှင့် တပ်မတော်အကြီးအကဲတို့နှင့်တွေ့ဆုံဆွေးနွေးပွဲမှ အရေးကြီးသော အချက်များကို အောက်တွင် ဖေါ်ပြထားသည်။ အမေရိကန်နိုင်ငံခြားရေးဝန်ကြီး ခရီးစဉ်၏ ရည်ရွယ်ချက် ရက်စ်တေလာဆန် ။ ။ ကျနော် ဒီနေ့နေပြည်တော်ကို ရောက်လာတာဟာ မြန်မာနိုင်ငံမှာ အောင်မြင်တဲ့ ဒီမိုကရေစီ အပြောင်းအလဲဖြစ်စေရမယ်၊ အဲဒီယုံကြည်မှုဟာ ဆက်လက် ခိုင်မာနေဆဲဖြစ်တယ်ဆိုတာကို ထပ်မံအတည်ပြုဖို့ပြောကြားဖို့ဖြစ်ပါတယ်။ ကျနော်တို့ဟာ ပြုပြင်ပြောင်းလဲရေးရဲ့ အလျှင်အမြန် လိုအပ်ချက်တွေ တိုးတက်မှုရအောင်ကြိုးစားနေတဲ့၊ မကြာသေးမီနှစ်များအတွင်းက ဒီမိုကရေးစီရေး တိုးတက်မှုတွေကို ပိုမိုခိုင်မာအောင် လုပ်ဆောင်နေတဲ့ ၊ ငြိမ်းချမ်းရေး၊ အမျိုးသားပြန်လည်သင့်မြတ်ရေး၊ ကြွယ်ဝချမ်းသာမှုနဲ့ လူ့အခွင့်အရေးအပေါ် ပိုမိုလေးစားလိုက်နာရေးတွေ ဆောင်ယူပေးဖို့လုပ်နေတဲ့ ရွေးကောက်ခံအစိုးရကို ဆက်လက်ထောက်ခံနေပါတယ်။ ရခိုင်ပြည်နယ် အကျပ်အတည်းဟာ လွန်ခဲ့တဲ့နှစ်တုန်းက ရွေးကောက်ခံအစိုးရ တက်လာကတည်းက မြန်မာနိုင်ငံ ရင်ဆိုင်နေရတဲ့ အကြီးမားဆုံး စိန်ခေါ်မှုများထဲကတခု ဖြစ်ပါတယ်။ မကြာသေးမီက အကြမ်းဖက်မှုများအတွင်း မြန်မာလုံခြုံရေးတပ်ဖွဲ့များနဲ့ သူတို့ ထိန်းချုပ်နိုင်ခြင်း မရှိသေးတဲ့ ဒေသခံတွေက ကျူးလွန်တဲ့ ကျယ်ပြန့်တဲ့ ရက်စက်ကြမ်းကြုတ်မှုဆိုင်ရာ ယုံကြည် လက်ခံနိုင်ဖွယ်ရှိတဲ့ သတင်းတွေနဲ့ပတ်သက်ပြီး ကျနော်တို့ နက်နက်ရှိုင်းရှိုင်း စိုးရိမ်ပူပန်မိပါတယ်။ ARSA ကို အမေရိကန်ရှုတ်ချ ရက်စ် တေလာဆန် ။ ။ အကြမ်းဖက်တိုက်ခိုက်မှုတွေ ဖြစ်ပွားစေခဲ့တဲ့ ARSA အဖွဲ့ရဲ့ သြဂုတ်လ ၂၅ ရက်နေ့က လုံခြုံရေးတပ်ဖွဲ့တွေကို တိုက်ခိုက်မှုတွေကို ကျနော်တို့ ရှုတ်ချပြီး ဒီလိုတိုက်ခိုက်မှုတွေကို လုံးဝသည်းခံမှာ မဟုတ်ဘူးဆိုတာ ထပ်မံပြောကြားလိုပါတယ်။ အခုလို ရှောင်တခင် တိုက်ခိုက်မှုကြောင့် သေဆုံးရတဲ့ မြန်မာလုံခြုံရေးတပ်ဖွဲ့ဝင်တွေအတွက် ဝမ်းနည်းကြေကွဲကြောင်းလည်း ပြောကြားလိုပါတယ်။ ရခိုင်ပြည်နယ်အတွက် အမေရိကန်အကူအညီ ရက်စ် တေလာဆန် ။ ။ ရခိုင်ပြည်နယ် အကျပ်အတည်းကို အမေရိကန်ရဲ့တုံ့ပြန်မှုအနေနဲ့ အမေရိကန်ပြည်ထောင်စုဟာ ဒုက္ခသည်တွေအတွက် နောက်ထပ် ဒေါ်လာ ၄၇ သန်း ထပ်မံထောက်ပံ့မယ်လို့ကျနော် ဒီနေ့ကြေညာပါတယ်။ ဒုက္ခသည်တွေ သူတို့နေရပ်ကို ဆန္ဒအလျှောက်ပြန်ခွင့်ပေးမယ်ဆိုတဲ့ မြန်မာနိုင်ငံရဲ့ ကတိကဝတ်နဲ့ စီးပွားရေး ဖွံ့ဖြိုးတိုးတက်ရေးကို အထောက်အကူပြုပြီး ရေရှည်တည်တံ့တဲ့ ငြိမ်းချမ်းရေး ဖန်တီးဖို့ နဲ့ နေရပ်စွန့်ခွာ ထွက်ပြေးရသူတွေ အပါအဝင် ရခိုင်ပြည်နယ်က ပြည်သူအားလုံးရဲ့ အခွင့်အရေးတွေကို လေးစားလိုက်နာစေရေးအတွက် ရခိုင်ပြည်နယ်ဆိုင်ရာ အကြံပေးကော်မရှင်ရဲ့ အကြံပြုချက်တွေကို အကောင်အထည်ဖေါ်ဖို့ ကတိကတဝတ်ကို အမေရိကန်ပြည်ထောင်စုက ကြိုဆိုပါတယ်။ မြန်မာနိုင်ငံအစိုးရနဲ့ ဘင်္ဂလားဒေ့ရှ်နိုင်ငံအစိုးရတို့အကြား ဆွေးနွေးပွဲတွေကြောင့် ကျနော်တို့ အားတက်မိပြီး သူတို့ရဲ့နေအိမ်တွေကို ပြန်လာချင်သူတွေရဲ့ လုံခြုံရေး ဘေးကင်းရေးအတွက် နှစ်နိုင်ငံအနေနဲ့ အတူတကွ ဆက်လက်လုပ်ဆောင်ဖို့ တိုက်တွန်းပါတယ်။ အရပ်ဘက်စစ်ဘက် ဆက်ဆံရေး ရက်စ်တေလာဆန် ။ ။ အရပ်သားအစိုးရရဲ့ ကတိကဝတ်တွေကို လေးစားလိုက်နာဖို့၊ ဒါတွေကို အကောင်အထည်ဖေါ်ရာမှာ အစိုးရကို ကူညီဖို့၊ ရခိုင်ပြည်နယ်က လူအားလုံးအတွက် ဘေးကင်းလုံခြုံမှုရှိစေဖို့ဟာ တပ်မတော်ရဲ့အပေါ်မှာ မူတည်နေပါတယ်။ မြန်မာ့တပ်မတော်ကို တပ်မတော်ပီသပြီး လေးစားစရာကောင်းတဲ့ မဏ္ဍိုင်အဖွဲ့အစည်းအဖြစ် တည်ဆောက်လိုတဲ့ မြန်မာအစိုးရရဲ့ ရည်မှန်းချက်ကို ကျနော်တို့ထောက်ခံပါတယ်။ တပ်မတော် အကြီးအကဲ ဗိုလ်ချုပ်မှူးကြီး မင်းအောင်လှိုင်ကို ကျနော်ပြောခဲ့သလိုပဲ တပ်မတော်ဟာ မြန်မာနိုင်ငံရဲ့ ဖက်ဒရယ် ဒီမိုကရေစီနိုင်ငံကို ကူးပြောင်းတဲ့နေရာမှာ ထောက်ခံဖို့အရေးကြီးပါတယ်။ ဒီလုပ်ငန်းစဉ်ရဲ့တစိတ်တပိုင်းအနေနဲ့ အစိုးရနဲ့ တပ်မတော်ဟာ မြန်မာတနိုင်ငံလုံးက အရပ်သားတွေရဲ့ နစ်နာဆုံးရှုံးမှုတွေကို ကိုင်တွယ်ဖြေရှင်းဖို့ အတူတကွ လုပ်ဆောင်ပြီး ခိုင်မာစွာ ယုံကြည်နိုင်တဲ့ မဏ္ဍိုင်အဖွဲ့အစည်းတွေကို တည်ဆောက်ကြရမှာဖြစ်ပါတယ်။ အကြမ်းဖက်သမားတွေနဲ့ အခြားသော သူပုန်တွေရဲ့ တိုက်ခိုက်မှုတွေကို တုံ့ပြန်ရမယ့် တပ်မတော်ရဲ့တာဝန်ကို ကျနော်တို့ အသိအမှတ်ပြုပါတယ်။ ဒါပေမယ့် ဘယ်တုံ့ပြန်မှုမဆိုဟာ စည်းကမ်းတကျဖြစ်ပြီး အပြစ်မဲ့အရပ်သားတွေအတွက် ထိခိုက်နိုင်ခြေကို အတတ်နိုင်ဆုံးသော အတိုင်းအတာအထိ ရှောင်ရှားနိုင်ရပါမယ်။ အကြမ်းဖက် အစွန်းရောက်ဝါဒနဲ့ အကြမ်းဖက်ဝါဒ တိုက်ဖျက်ရေးနယ်ပယ်တွေမှာ ပူးပေါင်းဆောင်ရွက်ဖို့အခွင့်အလမ်းတွေကို မြန်မာအစိုးရနဲ့ ဆက်လက်ရှာဖွေသွားမှာဖြစ်ပါတယ်။ ဘက်မလိုက်သော စုံစမ်းစစ်ဆေးမှုပြုလုပ်ရေး ရက်စ်တေလာဆန် ။ ။ မကြာသေးမီက ပေါ်ပေါက်ခဲ့တဲ့ ရခိုင်ပြည်နယ်က ပြင်းထန်တဲ့ လူ့အခွင့်အရေးချိုးဖေါက်မှု စွပ်စွဲချက်တွေကို ဘက်မလိုက်ဘဲ ယုံကြည်လက်ခံနိုင်ဖွယ်ရှိအောင် စုံစမ်းစစ်ဆေးဖို့လိုပြီး ချိုးဖေါက်မှု ကျူးလွန်သူတွေကို တာဝန်ခံစေရမှာ ဖြစ်ပါတယ်။ တရားမျှတမှုနဲ့ တာဝန်ခံမှုအတွက် လိုအပ်ချက်ကို ရခိုင်ပြည်နယ်မှာသာမက မြန်မာနိုင်ငံ တဝန်းလုံးက လူ့အခွင့်အရေးချိုးဖေါက်မှု ဖြစ်ပွားရာနေရာတိုင်းမှာ ကျင့်သုံးရမှာ ဖြစ်ပါတယ်။ ကျနော့်အစည်းအဝေးတိုင်းမှာ မြန်မာအရပ်သား အစိုးရအနေနဲ့ ပြည့်၀ ထိရောက် လွတ်လပ်တဲ့ စုံစမ်းစစ်ဆေးမှုကို ဦးဆောင်ဖို့၊ တပ်မတော်အနေနဲ့ အစိုးရကို အပြည့်အ၀ လုပ်ပိုင်ခွင့်ပေးပြီး ပူးပေါင်းဆောင်ရွက်ဖို့ ကျနော် အမြဲတိုက်တွန်းပါတယ်။ အဲဒီလို နည်းလမ်းမျိုးကို အမေရိကန်ပြည်ထောင်စုက အခိုင်အမာ ထောက်ခံပါတယ်။ ရက်စက်ကြမ်းကြုတ်မှုတွေအတွက် တာဝန်ရှိတယ်လို့ အတည်ပြုနိုင်သူ တဦးချင်းအတွက် အမေရိကန်နိုင်ငံက ဥပဒေအရ နည်းလမ်းတွေအပါအဝင် ရနိုင်သမျှ နည်းလမ်း အားလုံးနဲ့ အကျိုးဆက်တွေဖြစ်လာစေဖို့ အမေရိကန်ပြည်ထောင်စုနဲ့မိတ်ဖက်နိုင်ငံတွေက ဆက်လက် လုပ်ဆောင်ကြမှာဖြစ်ပါတယ်။ AFP သတင်းဌာနသို့ ရက်စ်တေလာဆန်၏ အဖြေ ။ ။ အဲဒီမှာဖြစ်နေတဲ့မြင်ကွင်းတွေဟာ စက်ဆုပ်စရာကောင်းတယ်လို့ ကျနော်လည်း ရှင်းရှင်းလင်းလင်း မြင်ပါတယ်။ သူတို့ တပ်မတော်တွင်း စုံစမ်းစစ်ဆေးမှုတချို့ကိုလည်း တပ်မတော် ကာကွယ်ရေးဦးစီးချုပ်က ကျနော့ကို အသိပေးပါတယ်။ ဒါပေမယ့်လည်း ကျနော်ပြောခဲ့တဲ့အတိုင်း ဘာတွေဖြစ်ခဲ့တယ်ဆိုတာကို နားလည်ဖို့ ကျနော်တို့ သိဖို့ ထပ်လိုနေတာတွေ ရှိသေးတယ်။ ဒါကြောင့်မို့လည်း လွတ်လပ်သော စုံစမ်းစစ်ဆေးမှု တခုကသာ ဘာတွေ အမှန်တကယ်ဖြစ်ခဲ့တယ်၊ ဘယ်သူ့ကို တာဝန်ခံစေသင့်တယ်ဆိုတာကို လူတိုင်းနားလည်ဖို့အထောက်အကူပြုနိုင်တယ်လို့ ကျနော်တို့ ယုံကြည်နေတာပဲ။ ရခိုင်ပြည်နယ် အကျပ်အတည်း ဒေါ်အောင်ဆန်းစုကြည် ။ ။ ကျမတို့ဒီကိစ္စကို တစုံတရာသော အတိုင်းအတာအထိ အသေးစိတ်ဆွေးနွေးပြီးတော့ ဒီနိုင်ငံမှာ ငြိမ်းချမ်းရေးနဲ့တည်ငြိမ်မှု ရှိဖို့ အရေးအကြီးဆုံးပဲဆိုတာ ကျမတို့သဘောတူတယ်။ ငြိမ်းချမ်းရေးနဲ့ တည်ငြိမ်မှုရရှိဖို့ လူတွေကို အပြစ်ပေးတာထက် တရားဥပဒေစိုးမိုးရေးက အရေးပါတယ်ဆိုတာကို လူတိုင်း နားလည်သင့်တယ်။ ကျမတို့အားလုံး ဒါကိုနားလည်ရင် အမေရိကန်ပြည်ထောင်စုနဲ့ နိုင်ငံတကာ အသိုက်အဝန်းက အရမ်းစိုးရိမ်နေတဲ့ ဒီကိစ္စတွေမှာ ပူးပေါင်းဆောင်ရွက်နိုင်မယ်။ အခု လက်ရှိဖြစ်ပေါ်နေတဲ့ စိန်ခေါ်မှုတွေဟာ အရမ်းကြီးမားပြီး အသွင်မျိုးစုံဆောင်နေတယ်ဆိုတာကို သဘောပေါက်ကြမယ်လို့ ထင်ပါတယ်။ ရခိုင်ပြည်နယ်ပြဿနာက အသွင်တခုတည်းဆောင်တာ မဟုတ်ဘူး၊ တနိုင်ငံလုံးနဲ့ပတ်သက်နေတဲ့ အသွင်အမျိုးမျိုးဆောင်တဲ့ပြဿနာဖြစ်တယ်။ ဒါကြောင့် ဒီပြ ဿနာပြေလည်ရေးမှာ အားလုံးပါဝင် ပတ်သက်နေရတာဖြစ်တယ်။ ဒေါ်အောင်ဆန်းစုကြည်ရဲ့ နှုတ်ဆိတ်မှု ဒေါ်အောင်ဆန်းစုကြည် ။ ။ ကျမနှုတ်ဆိတ်နေတယ်လို့ လူတွေ ဘာကြောင့်ပြောနေကြတာလဲဆိုတာ နားမလည်နိုင်ဘူး။ ကျမ နှုတ်ဆိတ်မနေခဲ့ပါဘူး။ တကယ်တော့ ကျမရဲ့ ရုံးကနေထုတ်တဲ့ ကြေညာချက်တွေလည်း အများကြီးပဲ။ ကျမကိုယ်တိုင်လည်း ကြေညာချက်တွေ ထုတ်တာပါပဲ။ ကျမအထင်တော့ ကျမပြောတဲ့စကားက သူတို့အတွက် စိတ်ဝင်စားစရာ မကောင်းတာဘဲဖြစ်မှာပါ။ ကျမပြောတဲ့စကားတွေက စိတ်တွေလှုပ်ရှားအောင် ပြောနေတာ မဟုတ်ဘူး။ ကျမက တိကျအောင် ပြောနေတာ။ သဟဇာတဖြစ်မှုနဲ့ လူတိုင်းအတွက် ပိုမိုကောင်းမွန်တဲ့ အနာဂတ်ကို ဖန်တီးဖို့ ရည်ရွယ်တယ်။ လူတွေကို တယောက်နဲ့ တယောက် ရန်တိုက်ပေးဖို့မဟုတ်ဘူး။ ရခိုင်ပြည်နယ်မှာ မတူညီတဲ့ အသိုင်းအဝန်း အများအပြား နေထိုင်ကြတယ်ဆိုတာကို ကျမတို့ မေ့ထားလို့မရဘူး။ ရေရှည်မှာ ဒီအသိုင်းအဝန်းတွေ သဟဇာတဖြစ်ပြီး ငြိမ်းချမ်းစွာ အတူနေထိုင်ဖို့ ဆိုရင် သူတို့ကို အခု ရန်တိုက်ပေးနေလို့ မဖြစ်ဘူး။ ထပ်ပြီးသွေးကွဲစေမယ့် စကားတွေပြောနေလို့ မရဘူး။ ကျမပြောတဲ့ စကားကို ကျမ အရမ်းဂရုစိုက်နေရတာ ဒါကြောင့်ပဲ။ လူမျိုးသုတ်သင်ရှင်းလင်းခြင်း ရတ်စ်တေလာဆန် ။ ။ ရခိုင် ပြည်နယ်မှာ ဖြစ်ပျက်နေတယ်လို့ကျနော်တို့သိရတဲ့ လူပေါင်းများစွာ ဒေသစွန့်ခွာထွက်ပြေးစေတဲ့ အခြေအနေဟာ လူသားမျိုးနွယ်ပေါ်မှာ ကျူးလွန်တဲ့ ရာဇဝတ်မှု လက္ခဏာတချို့ရှိတာကို ကျနော် ရှင်းရှင်းလင်းလင်း သိတယ်။ လူမျိုးတုံးသတ်ဖြတ်မှု စံနှုန်းတွေနဲ့ ညီမညီဆိုတာကို ကျနော်တို့ဘာသာ ဆုံးဖြတ်မှာ ဖြစ်ပါတယ်။ ဒါကို ကျနော်တို့ဘာသာ ကျနော်တို့ ဆက်လက် အကဲဖြတ်ရမယ်။ ဒါကြောင့်မို့လို့ပဲ လွတ်လပ်တဲ့ စုံစမ်းစစ်ဆေးမှုတွေဟာ ကျနော်တို့အနေနဲ့ ဘယ်သူတွေကို တာဝန်ရှိသူတွေ ဖြစ်စေမလဲဆိုတာကို သာမက ဒီဖြစ်ရပ်တွေရဲ့နောက်ကွယ်က စေ့ဆော်မှုဟာ ဘာလဲဆိုတာကိုပါ နားလည်ဖို့ အတွက်ပါ အသုံးဝင်မယ်လို့ ယုံကြည်နေတာဖြစ်တယ်။ ဒီဖြစ်ရပ်တွေဟာ အာဆာအဖွဲ့က မြန်မာတပ်တွေကို တိုက်ခိုက်ပြီးတဲ့နောက် ဖြစ်လာတယ်၊ နောက် တုန့်ပြန်တဲ့အခါ အခြေအနေကို ထိန်းချုပ်မရ ဖြစ်သွားပုံရတယ်ဆိုတာကို ခင်ဗျားတို့ကို ကျနော် ထပ်မံ သတိပေးချင်တယ်။ ဒါကြောင့် လွတ်လပ်တဲ့ စုံစမ်းစစ်ဆေးမှုဟာ ကျနော့်အမြင်မှာ အင်မတန် ရှုပ်ထွေးလှတဲ့အခြေအနေရဲ့ သွင်ပြင်လက္ခဏာ အများအပြားကို နားလည်စေဖို့ ကျနော်တို့အားလုံးကို အထောက်အကူပြုမယ်လို့ ကျနော်ထင်တယ်။ တပ်မတော်၏ ချေပချက် ဗိုလ်ချုပ်မှူးကြီး မင်းအောင်လှိုင်။ ။ မြန်မာ့တပ်မတော်က အင်အားသုံးလို့ ဘင်္ဂလီတွေ ဘင်္ဂလားဒေ့ရှ်ကို ထွက်ပြေးကြတာဆိုတဲ့ စွပ်စွဲစကားတွေကို အမေရိကန် အပါအဝင် အနောက်နိုင်ငံတွေက သုံးကြတယ်။ ဩဂုတ်လ ၂၅ ရက်နေ့ကနေ စက်တင်ဘာလ ၅ ရက်အတွင်း ထွက်ပြေးတဲ့အရေအတွက်က အရမ်းနည်းပြီး အဲဒီနောက်မှ အများကြီးပြေးကြတာ။ အကြောင်းရင်းကတော့ အစွန်းရောက် ဘင်္ဂလီ အကြမ်းဖက်သမားတွေဟာ လုံခြုံရေးတပ်စခန်းတွေကို အောင်မြင်စွာ သိမ်းပိုက်နိုင်ခြင်း မရှိတာနဲ့ လုံခြုံရေးတပ်တွေရဲ့ တန်ပြန်တိုက်ခိုက်မှုကို ကြောက်ပြီးပြေးကြတာ။ သူတို့ပြေးတဲ့အခါ မိသားစုတွေကိုပါ ခေါ်သွားတော့ အလုံးအရင်းနဲ့ ထွက်ပြေးတဲ့ အခြေအနေဖြစ်သွားတယ်။ တခြားဘင်္ဂါလီတွေနဲ့ တတိယနိုင်ငံမှာပဲနေဖို့ စည်းရုံးခံရတဲ့တချို့သော ဘင်္ဂလီတွေလည်း ကြောက်ပြီးပြေးကြရတဲ့အခြေအနေဖြစ်သွားတယ်။ သူတို့ ထွက်ခွာသွားနေကြတာ တသမတ်တည်းပဲ။ နိုင်ငံတကာအသိုင်းအဝန်းက သူတို့အထင်နဲ့ သူတို့ ပြောကြတာ။ နိုင်ငံတကာအသိုင်းအဝန်းက အခြေအနေမှန်ကို မသိဘဲ ဘင်္ဂလီတွေဟာ ညှင်းပမ်းနှိပ်စက်ခံရလို့ မြန်မာနိုင်ငံက ထွက်ပြေးတယ်လို့ပြောတာ။ သူတို့အခြေအနေမှန်ကို သိဖို့လိုတယ်။ မြန်မာနိုင်ငံက ထွက်သွားတဲ့ ဘင်္ဂလီတွေကို ဥပဒေနဲ့အညီ ပြန်လက်ခံဖို့ လုပ်နေပါပြီ။ The post အမေရိကန် နိုင်ငံခြားရေးဝန်ကြီး ခရီးစဉ်မှ အဓိက ကောက်နှုတ်ချက်များ appeared first on ဧရာဝတီ.
Source : http://ift.tt/2hAo0ZF
via IFTTT