မောင်တောမြို့နယ်မြောက်ပိုင်း မြန်မာ-ဘင်္ဂလားဒေ့ရှ်နယ်စပ် မိုင်တိုင် ၄၅ နှင့် ၄၆ ကြားတွင် မြန်မာ့လုံခြုံရေးရဲတပ်ဖွဲ့အား တစ်ဖက်နိုင်ငံမှ လက်နက်ကိုင်အဖွဲ့က ချောင်းမြောင်းပစ်ခတ်သဖြင့် အပြန်အလှန်ပစ်ခတ်မှု နိုဝင်ဘာ ၅ ရက် ညနေ ၅ နာရီကျော်က ဖြစ်ပွားခဲ့ကြောင်း သိရသည်။ ဖြစ်စဉ်မှာ အမှတ် (၁) နယ်ခြားစောင့် ရဲကွပ်ကဲမှုအောက်ရှိ နယ်စပ်မှတ်တိုင် ၄၅ ကင်းစခန်းတွင် တာဝန်ထမ်းဆောင်နေသည့် ရဲတပ်ဖွဲ့ဝင်များဖြစ်သော ရဲဒုတပ်ကြပ် မျိုးနိုင်၊ ရဲတပ်သား နိုင်ကိုကိုလှိုင်၊ ရဲတပ်သား အောင်မျိုးမင်း၊ ရဲတပ်သား ထန်စွမ်းပြောင် စုစုပေါင်း လုံခြုံရေးတပ်ဖွဲ့ဝင်လေးဦးသည် ဆိုင်ကယ်လေးစီးဖြင့် သွားရောက်ကာ အောင်သပြေနယ်မြေရုံး၌ လစာထုတ်ယူပြီးနောက် မိုင်တိုင် ၄၅ သို့ ပြန်လည်ထွက်ခွာခဲ့ရာ ညနေ ၅ နာရီ ၄၅ မိနစ်တွင် မိုင်တိုင် ၄၅ နှင့် ၄၆ အကြား ရောက်ရှိစဉ် နယ်စပ်ခြံစည်းရိုးအပြင်ဘက် တစ်ဖက်ဘင်္ဂလားဒေ့ရှ်နိုင်ငံဘက် အကွာအဝေး ကိုက် ၁၀၀ ခန့်ရှိ တောင်ကုန်းငယ်မှ လက်နက်ငယ်များဖြင့် အချက် (၂၀/၃၀)ခန့် ပစ်ခတ်ခဲ့ကြောင်းနှင့် ယင်းသို့ပစ်ခတ်သဖြင့် လုံခြံုရေးရဲတပ်ဖွဲ့ကလည်း အပြန်အလှန်ပစ်ခတ်မှု ဖြစ်ပွားခဲ့ခြင်းဖြစ်ကြောင်း သိရသည်။ အပြန်အလှန်ပစ်ခတ်မှုဖြစ်ပွားပြီးနောက် ရဲတပ်သား ထန်စွမ်းပြောင်သည် မိုင်တိုင် (၄၅) ကင်းစခန်းသို့ ညနေ ၆ နာရီ ၁၀ မိနစ် တွင် ပြန်လည်ရောက်ရှိလာသော်လည်း ဒုတပ်ကြပ် မျိုးနိုင်ပါ သုံးဦးသည် စခန်းသို့ ပြန်လည်ရောက်ရှိခြင်း မရှိသဖြင့် နယ်မြေမှူးဦး စီးကာမိုင်တိုင် ၄၅ နှင့် မိုင်တိုင် ၄၆ မှ လုံခြုံရေးတပ်ဖွဲ့ဝင်များက အခင်းဖြစ်နေရာသို့ ချက်ချင်းထွက်ခွာခဲ့ပြီး ရှင်းလင်းခဲ့ကြောင်းနှင့် ည ၇ နာရီ ၁၀ မိနစ်တွင် ရဲဒုတပ်ကြပ် မျိုးနိုင် ပါ သုံးဦးအား လက်နက်ခဲယမ်းများနှင့်အတူ ပြန်လည်ပူးပေါင်းမိခဲ့ကြောင်း သိရသည်။ ဖြစ်စဉ်အတွင်း လုံခြုံရေးတပ်ဖွဲ့ဝင်များ ဘက်မှ လူသူ၊ လက်နက် အထိအခိုက် အကျအဆုံးမရှိကြောင်းလည်း သိရသည်။ ဖြစ်စဉ်နှင့်ပတ်သက်ပြီး တစ်ဖက်ဘင်္ဂလားဒေ့ရှ်နိုင်ငံသို့ ကန့်ကွက်စာ ပေးပို့သွားမည်ဖြစ်ကြောင်းလည်း နယ်ခြားစောင့်ရဲတပ်ဖွဲ့မှ သိရသည်။ အဆိုပါ ပစ်ခတ်မှုဖြစ်ပွားခဲ့သည့်နေရာသည် မြန်မာနိုင်ငံနှင့် ဘင်္ဂလားဒေ့ရှ်နိုင်ငံတို့ ကုန်းမြေနယ်နိမိတ်ထိစပ်နေသည့် နေရာဖြစ်ပြီး နယ်စပ်ခြံစည်းရိုးတစ်လျှောက် ကင်းလှည့် လုံခြုံရေးတပ်ဖွဲ့ဝင်များအား ယခင်ကလည်း တစ်ဖက်နိုင်ငံမှ ချောင်းမြောင်းပစ်ခတ်မှုများ ရှိခဲ့ကြောင်း သိရသည်။ အောက်တိုဘာ ၂၂ ရက် ညနေပိုင်းက နယ်စပ်တွင် တောဝက်ခြေရာခံလိုက်နေသည့် အောင်သပြေကျေးရွာသား ဒိုင်းနက်တိုင်းရင်းသား လေးဦးအား မြန်မာ-ဘင်္ဂလားဒေ့ရှ်နယ်စပ် မိုင်တိုင် ၄၆ နှင့် ၄၇ ကြားတွင် လက်နက်ကိုယ်စီကိုင်ဆောင်ထားသော ဘင်္ဂါလီအကြမ်းဖက်အဖွဲ့ အင်အား ၁၅ ဦးခန့်က ပစ်ခတ်သဖြင့် ကျေးရွာသားနှစ်ဦး လွတ်မြောက်လာသော်လည်း ကျန်နှစ်ဦးမှာ သေနတ်ဒဏ်ရာဖြင့် သေဆုံးခဲ့သည်။ ယင်းမတိုင်မီ ဖေဖော်ဝါရီ ၁၆ ရက် ည နေ ၃ နာရီကလည်း မြန်မာ-ဘင်္ဂလားဒေ့ရှ် နယ်စပ် မိုင်တိုင် ၅၆ နှင့် ၅၇ ကြား နယ်စပ်ခြံစည်းရိုး ကင်းလှည့်လမ်းပြုပြင်ရေးအဖွဲ့ကို နယ်မြေလုံခြုံရေးဆောင်ရွက်ပေးနေသည့် တပ်ဖွဲ့ဝင်များအား ဘင်္ဂလားဒေ့ရှ်နိုင်ငံဘက်မှ နေ၍ လက်နက်ကိုင် ၃၀ ခန့်က လက်နက်ငယ်များဖြင့် စတင်ပစ်ခတ်သဖြင့် အပြန်အလှန် ပစ်ခတ်မှုဖြစ်ပွားခဲ့ပြီး လုံခြံုရေးတပ်ဖွဲ့ဝင်နှစ်ဦး မစိုးရိမ်ရ ဒဏ်ရာရရှိခဲ့သည့်ဖြစ်စဉ် ဖြစ်ပွားခဲ့ကြောင်း သိရသည်။
Source : http://ift.tt/2AbbdEh
via IFTTT
No comments:
Post a Comment