ANP မွ ထုတ္ပယ္ ခံထားရသူမ်ား ဦးေဆာင္၍ သီးျခား လူထု အေျချပဳ ညီလာခံ က်င္းပမည္

ANP မှ ထုတ်ပယ် ခံထားရသူများ ဦးဆောင်၍ သီးခြား လူထု အခြေပြု ညီလာခံ ကျင်းပမည် ရန်ကုန်၊ အောက်တိုဘာ ၃ ရခိုင်အမျိုးသားပါတီ (ANP) မှ ထုတ်ပယ် ခံထားရသူများ ဦးဆောင်ကာ သီးခြား နိုင်ငံရေး အင်အားစုအဖြစ် ရပ်တည်နိုင်ရန် လူထု အခြေပြု ညီလာခံ တစ်ရပ်ကို ရခိုင်ပြည်နယ် ကျောက်တော်မြို့တွင် ကျင်းပရန် စီစဉ်ထားကြောင်း ရခိုင်ဒီမိုကရေစီ အဖွဲ့ချုပ် (ALD) ထံမှ သိရသည်။ ANP မှ ထုတ်ပယ် ခံထားရသည့် ဗဟို အလုပ်အမှုဆောင် ကော်မတီဝင် (CEC) ခြောက်ဦး အပါအဝင်၊ ANP ပါတီတွင်းရှိ ရခိုင်ဒီမိုကရေစီ အဖွဲ့ချုပ် (ALD) မှ အလုပ် အမှုဆောင်များ၊ ရခိုင်ပြည်နယ်တွင်းရှိ ALD ပါတီဝင်များ စုပေါင်းကာ အောက်တိုဘာလ ၈ ရက်နှင့် ၉ ရက်နေ့များတွင် လူထု အခြေပြု ညီလာခံ တစ်ရပ်ကို ကျောက်တော်မြို့တွင် ကျင်းပသွားမည်ဖြစ်ကြောင်း ရခိုင်ဒီမိုကရေစီ အဖွဲ့ချုပ်(ALD) ၏ CEC ဦးမျိုးကျော်က ပြောသည်။ ရခိုင်အမျိုးသားပါတီ (ANP) သည် ၁၉၉ဝ ရွေးကောက်ပွဲ အနိုင်ရ ရခိုင် ဒီမိုကရေစီ အဖွဲ့ချုပ် (ANP) နှင့် ၂ဝ၁ဝ ရွေးကောက်ပွဲ အနိုင်ရ ရခိုင် တိုင်းရင်းသားများ တိုးတက်ရေး ပါတီ (RNDP) တို့ကို ၂ဝ၁၄ ခုနှစ်တွင် ပေါင်းစည်းထားခြင်း ဖြစ်ပြီး ၂ဝ၁၅ ရွေးကောက်ပွဲတွင်လည်း ရခိုင်ပြည်နယ်၌ အပြတ်အသတ် အနိုင်ရထားသည့် ပါတီ တစ်ခုဖြစ်သည်။ လက်ရှိ အခြေအနေအရ ANP ပါတီတွင် ဗဟို အလုပ်အမှုဆောင် အဖွဲ့ဝင် (CEC) ၃၉ ဦး ရှိရာ ALD ဘက်ခြမ်းမှ CEC ခြောက်ဦးမှာလည်း ပါတီမှ အထုတ်ခံခဲ့ရပြီး ပါတီတွင်း ခေါင်းဆောင်မှု အလွဲအမှားများ ရှိနေကြောင်း ဦးမျိုးကျော်က ပြောသည်။ “လက်ရှိ အခြေအနေတွေမှာ ကျွန်တော်တို့ အနေနဲ့က ပါတီတွင်း အခက်အခဲတွေကို အတတ်နိုင်ဆုံး တင်ပြခဲ့တယ်၊ ဒါတွေကို ပြုပြင်ဖို့ ပြောခဲ့ပေမယ့် သူတို့ဘက်က ဘာမှ တုံ့ပြန် အကြောင်း ပြန်ကြားတာမျိုး မရှိခဲ့ဘူး၊ ဒါကြောင့် ALD ပါတီ ရဲ့ CEC အစည်းအဝေးကို ရန်ကုန်မှာ ခေါ်ယူပြီး ညီလာခံ ကျင်းပဖို့ ဆုံးဖြတ်ခဲ့တာပါ”ဟု ၎င်းက ဆိုသည်။ အစည်းအဝေး ဆုံးဖြတ်ချက်အရ ရခိုင်ပြည်နယ် အတွင်းရှိ မြို့နယ် ၁၇ မြို့နယ်တို့မှ အဖွဲ့ဟောင်းများ၊ ရန်ကုန်၊ ဧရာဝတီနှင့် မန္တလေးတို့ရှိ ရခိုင် ဒီမိုကရေစီ အဖွဲ့ချုပ် (ALD) ၏ အဖွဲ့ဝင်ဟောင်းများနှင့် ရခိုင်ပြည်နယ်အတွင်းရှိ နိုင်ငံရေး တက်ကြွ လှုပ်ရှားသူများနှင့် အခြား အဖွဲ့အစည်းများမှ ခေါင်းဆောင်များ ပါဝင်မည့် ညီလာခံကို ကျင်းပမည်ဖြစ်ကြောင်း ၎င်းက ရှင်းပြသည်။ အဆိုပါ ညီလာခံသည် လက်ရှိ ရခိုင်ပြည်နယ်၏ နိုင်ငံရေး အခြေအနေများကို ပြန်လည် သုံးသပ်ရန်၊ ပါတီတွင်း ကိစ္စရပ်များ၊ ပြည်နယ်တွင်း ငြိမ်းချမ်းရေး ကိစ္စရပ်များနှင့် ဖွံ့ဖြိုး တိုးတက်ရေး ကိစ္စရပ်များကို ဆွေးနွေး ကြမည်ဖြစ်ကြောင်း ရခိုင် ဒီမိုကရေစီ အဖွဲ့ချုပ် (ALD) ထံမှ သိရသည်။ ထို့ပြင် ရခိုင်ပြည်နယ်၏ လက်ရှိ နိုင်ငံရေး အခြေအနေများပေါ် မူတည်၍ ပါတီသစ် တစ်ရပ်အဖြစ် ရပ်တည်ရန်မှာ နောက်ပိုင်း ညီလာခံနှင့် ပါတီတွင်း အစည်းအဝေး ဆုံးဖြတ်ချက်များ အပေါ်တွင် မူတည်ကြောင်း ဦးမျိုးကျော်က ပြောသည်။ ရခိုင် အမျိုးသားပါတီ (Arakan National Party-ANP) သည် ရခိုင် ဒီမိုကရေစီ အဖွဲ့ချုပ် (ALD) နှင့် ရခိုင် တိုင်းရင်းသားများ တိုးတက်ရေး ပါတီ (RNDP) တို့ ပေါင်းစည်းကာ ပြည်ထောင်စု ရွေးကောက်ပွဲ ကော်မရှင်က ၂ဝ၁၄ ခုနှစ် မတ်လ ၆ ရက် ရက်စွဲဖြင့် တရားဝင် မှတ်ပုံတင်ခွင့် ပြုခဲ့ခြင်း ဖြစ်သည်။ ANP ပါတီသည် ၂ဝ၁၅ ရွေးကောက်ပွဲ၌ ပြည်နယ် လွှတ်တော်တွင် ကိုယ်စားလှယ် နေရာပေါင်း ၄၇ နေရာအနက် ၂၃ နေရာ အနိုင်ရထားပြီး အမျိုးသား လွှတ်တော်နှင့် ပြည်သူ့လွှတ်တော်တို့၌ ၂၂ နေရာ ရွေးချယ် ခံထားရကာ ရခိုင်ပြည်နယ်၌ အင်အား အကြီးဆုံး ရခိုင်နိုင်ငံရေးပါတီ ဖြစ်သည်။
Source : https://goo.gl/TLbM6B
via IFTTT