ဒီတပတ္ ဖတ္စရာ

ဒီတပတ် ဖတ်စရာ စာရေးသူ – မောင်ခင်မင် (ဓနုဖြူ) စာအုပ်အမည် – မြန်မာစကား မြန်မာစာရုပ်ပုံလွှာ အမျိုးအစား – မြန်မာဘာသာစကား အင်းဝခေတ်က ခင်ပွန်းရဲ့ အဓိပ္ပာယ်ဟာ မိတ်ဆွေ ဖြစ်ပြီး သဂြိုဟ်ရဲ့အဓိပ္ပာယ်ကတော့ ထောက်ပံ့ ကူညီခြင်း ဖြစ်ပါတယ်။ စကားလုံး အနက်အဓိပ္ပာယ် ပြောင်းလဲမှုတွေနဲ့ အတူ အခုခေတ်မှာတော့ လင်ယောကျ်ား၊ မြေမြုပ်၊ မီးရှို့သည် ဆိုတဲ့ အဓိပ္ပာယ်ကိုသာ ဆောင်ပါတော့တယ်။ မွေးစားစကားလုံးတွေ အနေနဲ့လည်း ကာတွန်း၊ အယ်ဒီတာ၊ ဗုံး၊ မိုင်း၊ ဧက၊ ရှပ်အကျႌ၊ ကင်မရာ၊ တယ်လီဖုန်းတို့က အင်္ဂလိပ်ဘာသာစကား၊ ဆနွင်းမကင်းက ထိုင်း၊ ဒူးရင်း၊ ပန်းကန်က ပသျှူးဘာသာစကား၊ အာလူးက အူရဒူစကား၊ ပန်ကာ၊ ဆာလာအိတ်က ဘင်္ဂါလီစကားစသည်ဖြင့် ဖြစ်ကြပါတယ်။ ဒီစာအုပ်မှာ မြန်မာ ဘာသာစကားရဲ့ သွင်ပြင်လက္ခဏာတွေကို ဘာသာစကား ကမ္ဘာကြီးထဲက မြန်မာဘာသာစကား၊ မြန်မာ သရသံ၊ မြန်မာဗျည်းသံ၊ မြန်မာတက်သံ ကျသံ၊ သရသံဗျည်းသံ အတွဲအစပ်၊ မြန်မာစကားသံ အဆက်အစပ်နှင့် အဖြတ် အရပ်၊ မြန်မာစကားလုံး အထုံးအဖွဲ့၊ စကားလုံးမှ ဝါကျသို့၊ အနက်အဓိပ္ပာယ်၊ မြန်မာစကားသံနှင့် အနက်အဓိပ္ပာယ်၊ အသွင်ကွဲ မြန်မာစကားများ၊ မြန်မာအက္ခရာ၊ မြန်မာစာ အရေးအသား စနစ်၊ မြန်မာဝေါဟာရ ဖွံ့ဖြိုးတိုးတက်မှု၊ ပြောင်းလဲနေသော မြန်မာ ဘာသာစကား၊ ကမ္ဘာက သိသော မြန်မာစကား မြန်မာစာစတဲ့ စာစုတွေကို ရုပ်ပုံတွေ၊ ဇယားတွေနဲ့ အတူလေ့လာနိုင်မှာ ဖြစ်ပါတယ်။ စိတ်ကူးချိုချို စာအုပ်တိုက်ကတန်ဖိုး ၂၂၀၀ နဲ့ဖြန့်ချိထားပါတယ်။ စာရေးသူ – အောင်ဆန်း စာအုပ်အမည် – ဗိုလ်ချုပ်အောင်ဆန်းမိန့်ခွန်းပေါင်းချုပ် အမျိုးအစား – နိုင်ငံရေး တပ်မတော်စတင် တည်ထောင်စဉ်ကာလ ဘန်ကောက်မြို့ သွေးသောက်ပွဲ မိန့်ခွန်းကနေ ဗိုလ်ချုပ်အောင်ဆန်းရဲ့ နောက်ဆုံး မိန့်ခွန်း ဖြစ်တဲ့ ၁၉၄၇ ခုနှစ်၊ ဇူလိုင် ၁၃ ရက်နေ့ တိုင်းပြုပြည်ပြု လွှတ်တော်မိန့်ခွန်း အထိ မိန့်ခွန်းပေါင်း ၁၀၀ ကျော်ကို တစု တစည်းတည်း ဖတ်ရှုနိုင်မယ့် စာအုပ်ဖြစ်ပါတယ်။ “ဗမာတွေ စိတ်ထက်သလေး…၊ ဘာလေးနဲ့ တလွဲဆံပင် ကောင်းနေကြတယ်။ ဗမာပြည် လွတ်မြောက်ရေး ရအောင် လုပ်ရမဲ့ တိုက်ပွဲမျိုးမှာ အသုံးမချဘူး။ ဗမာပြည် ပြန်လည်ထူထောင်ရေးမှာ အသုံးမချဘူး။ ဗမာဗမာချင်း ချဖို့မှာ လုပ်ချင်တယ်။ ဒါမျိုးတွေ လုပ်ချင်လို့ ဘယ်တော့မှ အကျိုးမရှိဘူး” လို့ ဗိုလ်ချုပ်က ရှင်းရှင်းလင်းလင်း မိန့်ကြားပါတယ်။ တပ်မတော် ဆိုသည့် စကားသုံးလုံး မိန့်ခွန်းမှာလည်း ဗိုလ်ချုပ်က “နောက်ဆုံးတခု မှာချင်တာက ငါတို့သာ နိုင်ငံချစ်တယ် ဆိုတဲ့ စိတ်ဓာတ် မထားကြဖို့ပဲ၊ ဒီနိုင်ငံမှာ ဖြစ်ဖြစ် ဒီပြင် နိုင်ငံတွေမှာ ဖြစ်ဖြစ် စစ်သားတွေချည်း နိုင်ငံချစ်တဲ့လူ ရှိကြတာ မဟုတ်ဘူး၊ တခြား စစ်သားမဟုတ်ကြပေမဲ့ နိုင်ငံအတွက် အမျိုးမျိုးအနစ်နာခံ၊ အမျိုးမျိုး စွန့်စားလုပ်ကြတဲ့ လူတွေလည်း ရှိတာပဲ။ ဒါကြောင့် စစ်သားမှ စစ်သား ဆိုတဲ့ စိတ်ဓာတ် သဘောထားကို ပြောင်းကြရမယ်” လို့ ဆိုပါတယ်။ the key colloction က တန်ဖိုး ၁၂၅၀၀ ကျပ်နဲ့ ဖြန့်ချိထားပါတယ်။ စာရေးသူ – မင်းကိုနိုင်နှင့် အခြား စာအုပ်အမည် – ရွှေဘုန်းလူ (ခ) တာရာမင်းေ၀ သူ့ကဗျာ သူ့စာ သူ့ဘ၀ အမျိုးအစား – စာပေ၊ အတ္ထုပ္ပတ္တိ “အသက် ၂၈ နှစ်ကနေ ၄၁ နှစ်အတွင်း သူဖန်တီးခဲ့တဲ့ အနုပညာတွေက အင်မတန် လှပအားကောင်းခဲ့တယ်။ အဲဒီကာလက အမှောင်ခေတ်၊ အမှောင်ခေတ်ထဲမှာကိုပဲ သူ ဖန်တီးခဲ့တဲ့ အနုပညာက ခိုင်ခိုင်မာမာ ပွင့်လန်းခဲ့တယ်” လို့ ကိုအောင်ဒင်က ဆိုပါတယ်။ ဒီစာအုပ်မှာ တာရာမင်းဝေရဲ့ စာစုတွေ အပြင် မင်းကိုနိုင်၊ ဇော်ဇော်အောင်၊ သစ္စာနီ၊ ငြိမ်းအေးအိမ်၊ အောင်ဝေး၊ ဟိန်းလတ်၊ လေးကိုတင်၊ မင်းလူ၊ မင်းခိုက်စိုးစန်၊ သရဝဏ် (ပြည်)၊ ပဉ္စမဒီရိုင်း၊ သော်ဇင်အုန်း၊ မျိုးကိုမျိုး၊ လွမ်းဝေနိုင်၊ ကျော်သီဟ (ဟင်္သာတ)၊ သျှီသူအောင်၊ ဝေမှူးသွင်၊ သစ္စာပိုင်စိုး၊ အေးအောင်၊ ဖိုးစိုင်း (ဂျာနယ်လစ်)၊ အာဂတို့ရဲ့ အလွမ်းစာစု တွေကိုလည်း ဖတ်ရှုရမှာ ဖြစ်ပါတယ်။ တာရာမင်းဝေရဲ့ ကိုယ်ရေးအကျဉ်း၊ တာရာမင်းေ၀ ကလောင်နဲ့ ရေးသားခဲ့တဲ့ ကဗျာ၊ ဝတ္ထု စာအုပ်စာရင်းလည်း ပါရှိပါတယ်။ တာရာမင်းဝေက “စာက အဓိက မဟုတ်ဘူး။ ဆင်ခြင်သုံးသပ်တဲ့ ကိုယ့်ရဲ့ ဉာဏ်ကသာ အဓိကပါ” လို့ ဆိုပါတယ်။ ဂျာနယ်လစ် စာပေက တန်ဖိုး ၃၀၀၀ ကျပ်နဲ့ ဖြန့်ချိထားပါတယ်။ စာရေးသူ – မြသန်းတင့် စာအုပ်အမည် – သူတို့ပြည်နှင့် ကျနော်တို့ပြည် အမျိုးအစား – စာပေ စာပေအမျိုးအစား ပေါင်းစုံကို ကလောင်ခွဲ အမြောက်အများနဲ့ ရေးသားနိုင်စွမ်းရှိတဲ့ ဆရာမြသန်းတင့်ရဲ့ စာပေလက်ရာတွေကို စုစည်း ဖော်ပြထားတဲ့ စာအုပ်ဖြစ်ပါတယ်။ စာပေအမျိုးအစား ပေါင်းစုံကို ကလောင်ခွဲ အမြောက်အများနဲ့ ရေးသားနိုင်စွမ်းရှိတဲ့ ဆရာမြသန်းတင့်ရဲ့ စာပေလက်ရာတွေကို စုစည်း ဖော်ပြထားတဲ့ စာအုပ်ဖြစ်ပါတယ်။ ဒီစာအုပ်ရဲ့ အမှာစာများ ကဏ္ဍမှာ ရွှေကျော်ဦး ရေးတဲ့ နာဇီ စစ်အကျဉ်းစခန်းနှင့် တော်လှန်ရေး ရဲဘော်များ၊ ခင်ခင်ကြီးရေးတဲ့ အချစ်သူဌေးမလေး၊ ရွှေကူမေနှင်း ဝတ္ထု အတွက် ဆရာမြသန်းတင့်ရဲ့ အမှာစာတွေ၊ နိုင်ငံရပ်ခြား ကဗျာကဏ္ဍမှာတော့ လူထုဦးလှရဲ့ မိတ်ဆွေကြီး တကာမီဂျွန်ရဲ့ တတိယထပ်က ပြတင်းပေါက် ဘာသာပြန်လက်ရာ၊ မြန်မာပြန် အက်ဆေး ကဏ္ဍမှာ တော့ ထက်အောင်ကလောင်နဲ့ ရေးခဲ့တဲ့ ဘယ်လို အိုကြမလဲ၊ စာအုပ်ချစ်သူ၊ ကျနော်၏ စာရေးဆရာဘဝ၊ ခရီးသွား မှတ်တမ်း ကဏ္ဍမှာတော့ ရုက္ခဗေဒ ပညာရှင်ကြီး ကင်းဒမ်းပါဒ်ရဲ့ ဧရာဝတီသို့ အပြန် စာအုပ်မှ ထုတ်နုတ်ပြန်ဆိုချက်၊ နောက် ဆရာမြသန်းတင့်ရဲ့ အင်တာဗျူးဖြေဆိုချက်တွေ၊ ငြိမ်းချမ်းရေး လှုပ်ရှားမှု၊ သမိုင်း၊ သိပ္ပံ စာစုတွေ၊ နိုင်ငံတကာရေးရာ စာစုတွေကို ဖတ်ရှု့ရမှာ ဖြစ်ပါတယ်။ “အခုဟာက ပြည်သူကို စာကောင်း ပေကောင်း ဖတ်အောင် စာရေးဆရာက စည်းရုံးရမှာ မဟုတ်ဘူး။ စာရေးဆရာကို စာကောင်းပေကောင်း ရေးအောင် ပြည်သူက စည်းရုံးရမလို ဖြစ်နေတယ်” လို့ ဆရာမြသန်းတင့်က ဆိုပါတယ်။ ခေတ်ပြတိုက် စာပေက တန်ဖိုး ၂၅၀၀ ကျပ်နဲ့ ဖြန့်ချိထား ပါတယ်။ ။ The post ဒီတပတ် ဖတ်စရာ appeared first on ဧရာဝတီ.
Source : http://ift.tt/2A17NYx
via IFTTT