ပလက္ဝၿမိဳ႕ရွိ စစ္ေဘးေရွာင္မ်ား ေနရပ္ ျပန္ႏိုင္ေတာ့မည္

ချင်းပြည်နယ် ပလက်ဝမြို့ လောင်းတင်ကျေးရွာ အနီးရှိ စစ်ဘေးရှောင် စခန်းသို့ ရောက်ရှိနေသူများ နေရပ်ပြန်နိုင်ရေး ပြည်နယ် အစိုးရနှင့် သဘော တူညီမှု ရရှိပြီဖြစ်ကြောင်း ပလက်ဝမြို့ စစ်ဘေးရှောင် ကူညီထောက်ပံ့ရေး ကော်မတီမှ ဘဏ္ဍာရေးမှူး ဦးကျော်အောင်က ပြောကြားသည်။ ယခု လောင်းတင်ကျေးရွာ အနီးရှိ စစ်ဘေးရှောင်စခန်းသို့ ရောက်ရှိ စစ်ဘေးရှောင်သူများမှာ ပြိုင်စိုကျေးရွာတွင် နေထိုင်သူများဖြစ်သည်။ စစ်ဘေးရှောင်သူများ မိမိတို့ မူရင်းဒေသ ပြိုင်စိုကျေးရွာတွင် ပြန်လည် နေထိုင်နိုင်ရေးအတွက် ချင်းပြည်နယ် စည်ပင်သာယာရေး၊ လျှပ်စစ်နှင့် စက်မှုလက်မှု ဝန်ကြီးဌာ ဝန်ကြီး ဆလိုင်းအိုက်ဇက်ခင် ဦးဆောင်သည့် အဖွဲ့က စက်တင်ဘာ ၂၄ ရက်တွင် အဆိုပါ စစ်ဘေးရှောင် စခန်းသို့ လာရောက်ကာ စခန်းတွင် နေထိုင်သူများနှင့် တွေ့ဆုံခဲ့ကြောင်း၊ တိမ်းရှောင် လာခဲ့ရသော ပြိုင်စိုကျေးရွာတွင် ပြန်လည် နေထိုင်နိုင်ရေးအတွက် ပြည်နယ် အစိုးရက မိုင်းရှင်းပေးခြင်း လုပ်ငန်းကို ဆောင်ရွက်ပေးမည် ဖြစ်ကြောင်း ၎င်းက ရှင်းပြသည်။ ပြိုင်စိုကျေးရွာတွင် အိမ်ခြေ ၆၅ အိမ်ရှိပြီး ပြန်လည် ပြုပြင်ရမည့် အိမ်ခြေ ၆၀ အတွက် တစ်အိမ်ထောင်လျှင် ကျပ် တစ်သိန်းစီ၊ ပြောင်းရွေ့ပြီးပါက စားသောက်စရိတ်အဖြစ် တစ်အိမ်ထောင်လျှင် ကျပ် နှစ်သိန်းစီ ထောက်ပံ့မည် ဖြစ်ကြောင်း ပြည်နယ် အစိုးရအဖွဲ့နှင့် စစ်ရှောင်သူများ သဘော တူညီမှု ရရှိခဲ့သဖြင့် အောက်တိုဘာ ၂၀ ရက်တွင် စတင် ပြောင်းရွှေ့တော့မည် ဖြစ်ကြောင်း ဦးကျော်အောင်က ပြောဆိုသည်။ “အောက်တိုဘာလထဲမှာ တစ်အိမ် တစ်ယောက် အိမ်ထောင်ဦးစီးတွေက တောင်ယာလုပ်ဖို့ ရွာမှာ သွားနေကြမယ်။ ကျန်တဲ့သူတွေကတော့ နောက်နှစ် ဖေဖော်ဝါရီမှာ အပြီး ပြောင်းရွှေ့နေကြမယ်။ ကလေးတွေကလည်း ကျောင်းတက်နေရင်း တန်းလန်းဆိုတော့ ရုတ်တရက် အကုန်ပြန်ပြောင်းဖို့ မဖြစ်နိုင်ဘူး”ဟု ၎င်းက ရှင်းပြသည်။ ပြိုင်စိုကျေးရွာ ဒေသခံများမှာ ၂၀၁၅ ခုနှစ် အစောပိုင်းက တပ်မတော်နှင့် AA တို့အကြား ဖြစ်ပွားခဲ့သော တိုက်ပွဲများကြောင့် ၂၀၁၅ ခုနှစ် ဧပြီ ၂၇ ရက်က ပြိုင်စိုကျေးရွာမှ ပလက်ဝမြို့နယ် လောင်းတင်ကျေးရွာသို့ ပြောင်းရွှေ့ နေထိုင်ခဲ့ရပြီး တစ်နှစ်ကျော် အကြာတွင် နေရပ်သို့ ပြန်လည် နေထိုင်နိုင်ရန် စီစဉ်ရခြင်း ဖြစ်ကြောင်း ပလက်ဝမြို့ စစ်ဘေးရှောင် ကူညီထောက်ပံ့ရေး ကော်မတီထံမှ သိရှိရသည်။
Source : https://goo.gl/mg1Jsn
via IFTTT