ဆင္ဆာႏွင့္ လြတ္လပ္ေသာ႐ုပ္ရွင္

ဆင်ဆာနှင့် လွတ်လပ်သောရုပ်ရှင် သတ္တမအကြိမ်မြောက် ဝဿန်ရုပ်ရှင်ပွဲတော်ကို စက်တင်ဘာလဆန်းပိုင်းက ၆ ရက်ကြာကျင်းပခဲ့ပြီး စက်တင်ဘာလ ၁၁ ရက်နေ့တွင် ဆုပေးပွဲ ပြုလုပ်ခဲ့သည်။ ပြိုင်ပွဲဝင်ရုပ်ရှင်ကား ၃ဝ နီးပါးအနက် ဆု ၅ ဆုကိုအကဲဖြတ်ဒိုင်များက ရွေးချယ်ပေးခဲ့ကြသည်။ ဆုရရုပ်ရှင်ကားများအနက် လူအများ ပြောစမှတ်ကျန်ခဲ့ရသည်မှာ ရုပ်ရှင်ဆင်ဆာနှင့် အကောင်းဆုံးမှတ်တမ်းတင်ရုပ်ရှင်ဇာတ်ကားဆုဖြစ်သည်။ ဒါရိုက်တာ နှင်းပပစိုး ရိုက်ကူးထားသည့် ၂၁ မိနစ်ကြာ “အချစ်ဇာတ်လမ်းရိုးရိုးလေးတပုဒ်” ဆိုသည့် မှတ်တမ်းရုပ်ရှင်ကားသည် အကဲဖြတ်ဒိုင်များ၏ အကောင်းဆုံးမှတ်တမ်းကားအဖြစ် ရွေးချယ်ခံခဲ့ရသော်လည်း ရုပ်ရှင်ပွဲတော်တွင် ပြသခြင်းမရှိခဲ့ပါ။ အမျိုးသားအဖြစ် မွေးဖွားခဲ့သော်လည်းအမျိုးသမီးကဲ့သို့ ဝတ်စားဆင်ယင်နေထိုင်သည့် မိန်းမလျာတဦးနှင့် အမျိုးသမီးအဖြစ် မွေးဖွားခဲ့သော်လည်းအမျိုးသားကဲ့သို့ ပြုမူနေထိုင်သည့် ယောင်္ကျားလျာတဦး တို့ကြားအချစ်ဇာတ်လမ်းကို မှတ်တမ်းတင်ရိုက်ကူးထားပြီး လူသားတို့၏ လိင်စိတ်ခံယူမှုကွဲပြားပုံအမျိုးမျိုးနှင့် ချစ်ခြင်းမေတ္တာအပေါ် ပတ်ဝန်းကျင်၏ သတ်မှတ်မှုစံနှုန်းများကို စိန်ခေါ် ထားသည်။ အဆိုပါ မှတ်တမ်းရုပ်ရှင်ကို ရုပ်ရှင်ပွဲတော်တွင် မပြသရန် ဆုံးဖြတ်လိုက်ခြင်းမှာ အဆိုပါ ဇာတ်ကား ဒါရိုက်တာရဲ့ ဆုံးဖြတ်ချက်ဖြစ်ပေမယ့်လည်း ရုပ်ရှင်ဆင်ဆာအဖွဲ့ရဲ့ မှတ်ချက်အတိုင်းဇာတ်ကားကို ပြင်ဆင်ခြင်းမပြုလုပ်လိုဘဲ ဖန်တီးခဲ့သည့်အတိုင်းသာ ပြသလိုသည့်အတွက် ယင်းကဲ့သို့ ဆုံးဖြတ်လိုက်ရခြင်း ဖြစ်ကြောင်းသိရသည်။ “ရုပ်ရှင်လွတ်လပ်မှု” မြန်မာနိုင်ငံတွင် အများပြည်သူကို ပြသမည့် ရုပ်ရှင်ဇာတ်ကားတိုင်းကို ပြန်ကြားရေးဝန်ကြီးဌာန လက်အောက်ရှိ မြန်မာ့ရုပ်ရှင်မြှင့်တင်ရေးဦးစီးဌာန ရုပ်ရှင်ဆင်ဆာအဖွဲ့က စိစစ်ပြီး ပြသခွင့်ပြု၊ မပြုနှင့် မှတ်ချက်များ ပြုလုပ်ပေးသည်။ ဆင်ဆာအဖွဲ့ကို မြန်မာ့ရုပ်ရှင်မြှင့်တင်ရေးဦးစီးဌာန၏ ညွှန်ကြားရေးမှူးချုပ်က ဥက္ကဋ္ဌအဖြစ် ဆောင်ရွက်ပြီး မြန်မာနိုင်ငံ ရုပ်ရှင်အစည်းအရုံး၊ ဂီတအစည်းအရုံး၊ သာသနာရေးနှင့်ယဉ်ကျေးမှုဝန်ကြီးဌာန၊ ရှေ့နေချုပ်ရုံး၊ ရဲတပ်ဖွဲ့ စသည့် အဖွဲ့အစည်းများမှ ကိုယ်စားလှယ်များဖြင့် ဖွဲ့စည်းထားသည်။ ရုပ်ရှင်ကားများကို စိစစ်ရာတွင် နိုင်ငံရေး၊ ဘာသာရေး၊ ယဉ်ကျေးမှု၊ တိုင်းရင်းသားအချင်းချင်း ချစ်ကြည်ရေး စသည့်အချက်များကို အခြေခံကာ စိစစ်လေ့ရှိသည်။ ဒါရိုက်တာနှင်းပပစိုး၏ “အချစ်ဇာတ်လမ်းရိုးရိုးလေးတပုဒ်” ရုပ်ရှင်ကားနှင့် ပတ်သက်ပြီး ဝဿန်ရုပ်ရှင်ပွဲတော် စီစဉ်သူများထံ ပေးပို့သောဆင်ဆာအဖွဲ့၏ မှတ်ချက်မှာ “ဇာတ်ကား၏ နောက်ဆုံးစာတန်းနှင့် စကားပြောအား ပြင်ဆင်တည်းဖြတ်ပြီးမှ ပြသသင့်ပါသည်” ဟု ပါရှိလာခဲ့သည်။ အဆိုပါ ဇာတ်ကားနောက်ဆုံးစာတန်းမှာ “အချစ်မှာယောက်ျား၊ မိန်းမ၊ Tomboy ၊ Shemale ဆိုတာရှိလား” ဆိုသည့် စကားရပ်ဖြစ်သည်။ ဒါရိုက်တာ နှင်းပပစိုးက သူရိုက်ကူးဖန်တီးခဲ့သည့်အတိုင်း ပြသခွင့် မရပါက ဇာတ်ကားတကားလုံး ပြသရန် ဆန္ဒမရှိကြောင်း ဝဿန်ရုပ်ရှင်ပွဲတော်ကို အကြောင်းပြန်ခဲ့သည့်အတွက် ရုပ်ရှင်ပွဲတော်ပရိသတ်များ ယင်းမှတ်တမ်းရုပ်ရှင်ဇာတ်ကားကို ကြည့်ရှူခွင့်မရခဲ့ကြခြင်းဖြစ်သည်။ သို့သော်လည်း ရုပ်ရှင်ပွဲတော်က ပြိုင်ပွဲဝင်ဇာတ်ကားအဖြစ် ရွေးချယ်ထားပြီး ဖြစ်သဖြင့် အများပြည်သူကို မပြသခဲ့သော်လည်း အကဲဖြတ်ဒိုင်များက ကြည့်ရှူအကဲဖြတ်ခဲ့သည်။ ယင်းရုပ်ရှင်ကို ပြသမည့်အချိန်တွင် ရုပ်ရှင်ပွဲတော်၏ အစီအစဉ်ဒါရိုက်တာနှင့်ပူးတွဲတည်ထောင်သူ ကိုသိဒ္ဓိ၊ ရိုက်ကူးသူ နှင်းပပစိုး၊ LGBT အခွင့်အရေးလှုပ်ရှားမှုအဖွဲ့ Colors Rainbow ၏ ကိုလှမြတ်ထွန်းနှင့် စာရေးဆရာ ဟန်ဆန်းတို့က လွတ်လပ်စွာထုတ်ဖော် ပြောဆိုခွင့်နှင့်ပတ်သက်သည့် ဆွေးနွေးပွဲတခုကို အစားထိုး ပြုလုပ် ခဲ့သည်။ အများပြည်သူကို ပြသမည့် ရုပ်ရှင်ကားများကို ၁၉၉၆ ခုနှစ် ရုပ်ရှင်အက်ဥပဒေအရ ရုပ်ရှင်ဆင်ဆာအဖွဲ့က စိစစ်ရန် လိုအပ်သည့်အတွက် အဆိုပါ ဥပဒေကို ဒီမိုကရေစီစံနှုန်းများနှင့်အညီ ရုပ်ရှင်လွတ်လပ်ခွင့်ကို အထောက်အကူပြုနိုင်အောင် အရင်ဆုံးပြုပြင်ပြောင်းလဲရန်လိုအပ်ကြောင်း ကိုသိဒ္ဓိက ဦးဆောင်ဆွေးနွေးခဲ့သည်။ “နိုင်ငံကလည်း ဒီမိုကရေစီလမ်းကြောင်းကို သွားနေတယ်၊ သို့သော်လည်း နိုင်ငံကသွားတာက ဒီမိုကရေစီလမ်းကြောင်းဥပဒေက ၉၆ ဥပဒေနဲ့ (စိစစ်တာတွေက) ဆန့်ကျင်ဘက်လို ဖြစ်နေတယ်။ အဲဒါကြောင့် ဒီ ဥပဒေကို ပြင်ဖို့ကအရေးကြီးတဲ့ အခန်းကဏ္ဍလို့ ကျနော် ထင်ပါတယ်” ဟု ကိုသိဒ္ဓိက ပြောသည်။ ၂ ဝဿန်ရုပ်ရှင်ပွဲတော်မှ လွတ်လပ်စွာ ပြောဆိုခွင့်နှင့်ပတ်သက်သည့် ဆွေးနွေးပွဲ (ဝဲမှယာ – အစီအစဉ် ဒါရိုက်တာနှင့်ပူးတွဲတည်ထောင်သူ ကိုသိဒ္ဓိ၊ ဒါရိုက်တာ နှင်းပပစိုး၊ Colors Rainbow ရဲ့ကိုလှမြတ်ထွန်း၊ စာရေးဆရာ ဟန်ဆန်း) (ဓာတ်ပုံ -တင်ထက်ပိုင်/ဧရာဝတီ) နေ့စဉ်ရုပ်ရှင်များတွင် တွေ့ရသည့် ခွဲခြားဆက်ဆံမှုများ နေ့စဉ်ရုံတင်ပြသနေသောရုပ်ရှင်ဇာတ်ကားများ၊ ထုတ်လုပ်ဖြန့်ဖြူးနေသော ဗီဒီယိုဇာတ်ကားများတွင် မြန်မာ့လူ့အဖွဲ့အစည်းထဲရှိ LGBT များ၊ အထူးသဖြင့် အမျိုးသမီးအဖြစ် ပြောင်းလဲပြုမူနေထိုင်သူများ၏ ဘဝနှင့် လူနေမှုပုံစံများကို ထိပါးစော်ကားကာ လှောင်ပြောင်စရာဇာတ်ကောင်များ၊ အထူးအဆန်း ဝတ်စားဆင်ယင်ထားသည့် လူများအဖြစ် လှောင်ပြောင်နှိမ့်ချ သရုပ်ဖော်နေလေ့ရှိသည်ဟု Colors Rainbow ၏ ကိုလှမြတ်ထွန်းက ဆိုသည်။ ဆင်ဆာအဖွဲ့သည် လူ့အဖွဲ့အစည်းထဲတွင် အမှန်တကယ် နေထိုင်နေကြသော LGBT အသိုင်းအဝန်းထဲမှ လူနှစ်ဦး၏ ဘဝနှင့်လူ့ဂုဏ်သိက္ခာကိုမီးမောင်းထိုးပြထားသည့် အဆိုပါ မှတ်တမ်းရုပ်ရှင်ကားကို ဆင်ဆာမှတ်ချက်ဖြင့် ချုပ်ချယ်သော်လည်း LGBT တို့၏ ဘဝနေထိုင်မှုပုံစံကို နှိမ့်ချလှောင်ပြောင်ထားသော ရုပ်ရှင်ဇာတ်ကားများကိုမူ ပြသခွင့်ပြုထားသည့်အတွက် ဆင်ဆာအဖွဲ့၏ တာဝန်ခံမှုကို ကိုလှမြတ်ထွန်းက ဆွေးနွေးပွဲတွင် မေးခွန်းထုတ်ခဲ့သည်။ Colors Rainbow အဖွဲ့အစည်းသည် ပြည်တွင်းမှတ်တမ်းရုပ်ရှင် ရိုက်ကူးထုတ်လုပ်သူများနှင့် ပူးပေါင်းကာ LGBT အသိုင်းအဝန်းမှ သူများအတွက် ရုပ်ရှင်ရိုက်ကူးထုတ်လုပ်မှုသင်တန်းများ ပို့ချခဲ့ပြီး Rainbow Reels ထုတ်လုပ်ရေးအမည်ဖြင့် ဇာတ်ကားများထုတ်လုပ်ပေးလျက်ရှိကြောင်းလည်းသိရသည်။ ဆုရရှိခဲ့သည့် မှတ်တမ်းရုပ်ရှင်ကားသည် Rainbow Reels က ထုတ်လုပ်ထားသည့် ဇာတ်ကားတကား ဖြစ်ကြောင်းလည်း သိရသည်။ “ကိုယ် ထုတ်လုပ်ထားတဲ့ ကိုယ်ရိုက်ကူးထားတဲ့ ရုပ်ရှင်နဲ့ မှတ်တမ်းကားတွေအပေါ် တာဝန်ယူမှုအပြည့်ရှိတယ်။ ဒီရုပ်ရှင်တွေသည် ဘယ်သူ့ဘယ်သူကိုမျှ ထိခိုက်တာမျိုး၊ စော်ကားတာ အခွင့်အရေးထိပါးတာမျိုးမရှိဘူး။ ဖြစ်တည်မှုကို မြှင့်တင်တယ်” ဟု ကိုလှမြတ်ထွန်းက ပြောသည်။ ဆက်လက်ပြီး သူက “ကျနော်တို့ တာဝန်ယူမှုရှိသလိုမျိုး ဆင်ဆာအဖွဲ့က ခွင့်ပြုလိုက်တဲ့ ထောင်ပေါင်း သောင်းပေါင်းများစွာသော ရုပ်ရှင်တွေ ဗီဒီယိုတွေကျတော့ တာဝန်ယူမှုရှိလားဆိုတာ ကျနော်တို့ တချက်ပြန်ပြီးမေးချင်တယ်” ဟု ပြောဆိုသည်။ စာရေးဆရာ ကိုဟန်ဆန်းက ၁၉၉၆ ရုပ်ရှင်အက်ဥပဒေကို ပြင်ဆင်ရာတွင်လည်း ရုပ်ရှင်အသိုင်းအဝိုင်းတခုလုံးက ဥပဒေပြုရေးဖြစ်စဉ်တခုလုံးတွင် ပါဝင်နိုင်ရန် အရေးကြီးကြောင်း၊ သို့သော်လည်းရုပ်ရှင်ဥပဒေသည် ရုပ်ရှင် အသိုင်းအဝိုင်းတခုတည်းကိုသာ အကာအကွယ်ပေးခြင်းမျိုးမဟုတ်ဘဲ ရုပ်ရှင်က သရုပ်ဖော်သည့် လူမှုအသိုင်းအဝိုင်း အားလုံးကိုပါ အကာအကွယ်ပေးနိုင်သော၊ လူသားတို့၏ အခြေခံရပိုင်ခွင့်များကို လေးစားလိုက်နာသော ဥပဒေတရပ်ဖြစ်လာရန် လိုအပ်ကြောင်းဆိုသည်။ ရုပ်ရှင်ပွဲတော်ပရိသတ်များက ဆုရမှတ်တမ်းရုပ်ရှင်ကားကို မကြည့်ခဲ့ရသော်လည်း အကဲဖြတ်ဒိုင်များက အကောင်းဆုံးမှတ်တမ်းကားအဖြစ် ရွေးချယ်ခဲ့ခြင်းမှာ ဖြစ်ပျက်ခဲ့သောကိစ္စများနှင့် မသက်ဆိုင်ဘဲ အဆိုပါရုပ်ရှင်သည် ဒိုင်များ၏ အမြင်တွင် ပြိုင်ပွဲဝင်မှတ်တမ်းကားများအနက် အကောင်းဆုံး ဖြစ်နေခြင်းကြောင့်သာ ဖြစ်ပါသည်ဟု ရုပ်ရှင်ပွဲတော် ဆုပေးပွဲနေ့က ဒိုင်လူကြီးများက မှတ်ချက်ပြုခဲ့သည်။ “သေသပ်လှပတဲ့ အရုပ်တွေနဲ့ ဇာတ်လမ်းအတက်အကျညီညီရိုက်ကူးထားတဲ့ ဒီရုပ်ရှင်ဟာ လိင်ခံယူမှုဆိုင်ရာ ပြဋ္ဌာန်းချက်တွေနဲ့ လူမှုသတ်မှတ်ချက်ဘောင်တွေကို ကျော်လွန်ပြီးချစ်ခြင်းမေတ္တာရဲ့ နက်ရှိုင်းမှုကို ရှာဖွေတင်ဆက်ထားတာကြောင့် ဖြစ်ပါတယ်” လို့ အကဲဖြတ် ဒိုင်တဦးဖြစ်တဲ့ ဂျာမန်လူမျိုးမှတ်တမ်း ရုပ်ရှင်ရိုက်ကူးခြင်း သင်တန်းပို့ချသူ Marc Eberle က ဆုကြေညာစဉ်က ပြောကြားခဲ့သည်။ “ဇာတ်လမ်းတင်ဆက်ပုံဟာ ကြည့်ရှုသူပရိသတ်ကို အံ့သြစေပြီး လူတယောက် ကိုယ့်ကိုယ်ကိုယ်ချစ်ခြင်းနဲ့ အခြားသူတယောက်အပေါ် ထားရှိတဲ့ချစ်ခြင်းမေတ္တာကိုသရုပ်ဖော်ထားပုံဟာ ကြည့်တဲ့သူကိုပါ ဇာတ်ကောင်တွေ အပေါ် ရင်းနှီးကျွမ်းဝင်မှုခံစားရစေပါတယ်” လို့ Marc Eberle က ဆက်လက်ပြောဆိုသည်။ “Rating စနစ် ပြောင်းလဲကျင့်သုံးခြင်း” ဆုရမှတ်တမ်းရုပ်ရှင်အပြင် ရုပ်ရှင်ပွဲတော်တွင် ပြသသည့် ပြိုင်ပွဲဝင်မဟုတ်သော နိုင်ငံတကာရုပ်ရှင်ကားများတွင် အဝတ်အစား မဝတ်ထားသည့် ဇာတ်ကောင်များ၊ လိင်ဆက်ဆံခြင်းနှင့် တကိုယ်ရေ ဆန္ဒဖြေဖျောက်ခြင်းစသည့် ဇာတ်ကွက်များ ပါဝင်လာပါက အများပြည်သူသို့ ပြသရန် မသင့်တော်သည့် ဇာတ်ကွက်များအဖြစ် မှတ်ချက်ပြုခဲ့သည်။ ထို့ကြောင့် ရုပ်ရှင်ပွဲတော်စီစဉ်သူများသည် ပွဲတော်ကာလတလျှောက် ယင်းကဲ့သို့သော ဇာတ်ကွက်များကို ပရိုဂျက်တာအရှေ့တွင် ကွယ်ကာပြသခဲ့ရသည်များရှိခဲ့သည်။ ရုပ်ရှင်ပွဲတော်သို့ လာရောက်ခဲ့သည့် ရုပ်ရှင်ရိုက်ကူးသူများနှင့် ရုပ်ရှင်ချစ်ပရိသတ်အများစုက ယင်းကဲ့သို့ လုပ်ဆောင်မှုကြောင့်များစွာ အနှောင့်အယှက် ဖြစ်စေကြောင်း ပြောဆိုသည်။ တန်ခူး ရုပ်ရှင်ရိုက်ကူးရေး၏ ထုတ်လုပ်သူတဦးဖြစ်သူ ကိုလမင်းဦးက ဆင်ဆာအဖွဲ့၏ ဆုံးဖြတ်ချက်သည် ယင်းကဲ့သို့သော ဇာတ်ကွက်များကို ခက်ခဲသိမ်မွေ့စွာ ရိုက်ကူးခဲ့ရသည့် ရုပ်ရှင်ရိုက်ကူးသူများအပေါ် လေးစားမှုမရှိခြင်းဖြစ်ကြောင်း၊ ပရိုဂျက်တာအရှေ့တွင် ယင်းကဲ့သို့ ကွယ်ကာဖြတ်တောက်ခြင်းသည် ပရိသတ်များ ရုပ်ရှင်ကြည့်ရသည့် အရသာကိုပျက်စေသည်ဟုပြောသည်။ ရုပ်ရှင်ဆင်ဆာအဖွဲ့သည် လိင်နှင့်သက်ဆိုင်သည့် ဇာတ်ကွက်နှင့် အကြောင်းအရာများကို ဖြတ်တောက်ရန် အကြောင်းအရင်း ၂ ခုဖြင့် မှတ်ချက်ပေးတတ်ကြောင်း ကိုလမင်းဦးကပြောသည်။ လိင်နှင့်သက်ဆိုင်သည့် အကြောင်းအရာများသည် အချို့သောပရိသတ်များအတွက် မသင့်တော်ကြောင်း သို့မဟုတ် မြန်မာ့ ယဉ်ကျေးမှုနှင့် မကိုက်ညီကြောင်းတို့ ဖြစ်သည်။ “ဒုတိယအကြောင်းပြချက်ကအဓိပ္ပါယ်မရှိတဲ့ အကြောင်းပြချက်ပါ” ဟု ကိုလမင်းဦးက ဧရာဝတီကိုပြောသည်။ “ကျနော်တို့လူသားတွေ အားလုံးက လိင်ခံစားမှုရှိတဲ့ သတ္တဝါတွေပဲလေ။ ရုပ်ရှင်ရိုက်ကူးသူတွေအနေနဲ့ သူတို့ ရုပ်ရှင်တွေထဲမှာအဲဒီလူသားအတွေ့အကြုံကိုစူးစမ်းတင်ပြခွင့် အပြည့်ရှိတယ်” ဟုသူကဆက်လက်ပြောဆိုသည်။ ဒါရိုက်တာ K. Rajagopal ရဲ့ “Yellow Bird” ရုပ်ရှင်ဇာတ်ကားမှ ဇာတ်ကွက်တခုကို ပိတ်ကားရှေ့တွင် ပရိုဂျက်တာဖြင့် ကွယ်ပြီး ဖြတ်တောက် ပြသစဉ် (ဓာတ်ပုံ – PeMaung Same/ Facebook) အချို့သော လိင်မှုဆိုင်ရာအကြောင်းအရာများသည် အသက်အရွယ်အားလုံးအတွက် မသင့်တော်သည်ကို ကိုလမင်းဦးက သဘောတူသော်လည်း ယင်းပြဿနာသည် ဝဿန်ရုပ်ရှင်ပွဲတော်တွင် သူတွေ့ရှိခဲ့ရသော ပရိုဂျက်တာရှေ့တွင် ကွယ်ခြင်း၊ အသံနှင့် စကားပြောများဆင်ဆာဖြတ်ခြင်းထက် ဇာတ်ကားများကို အသက်အရွယ် အပိုင်းအခြားအလိုက် Rating စနစ် သတ်မှတ်လိုက်ခြင်းဖြင့် အလွယ်တကူ ဖြေရှင်းနိုင်ကြောင်း ကိုလမင်းဦးကဆိုသည်။ ၁၉၉၆ ရုပ်ရှင်ဥပဒေကို ပြင်ဆင်ထားသည့် ဥပဒေအသစ်တခုကို လက်ရှိတွင် ရေးဆွဲလျက်ရှိပြီး ဥပဒေကြမ်းကို မကြာမီတွင် လွှတ်တော်ထံတင်သွင်းနိုင်လိမ့်မည်ဟု မူကြမ်းရေးဆွဲရန် တာဝန်ယူထားသော လွှတ်တော်ကော်မတီဝင်တဦးဖြစ်သူ ဒေါ်ဖြူဖြူသင်းက ဧရာဝတီကို ပြောပြသည်။ ယင်းဥပဒေမူကြမ်းတွင် ရုပ်ရှင်နှင့် ဗီဒီယိုကားများကို ဆင်ဆာစိစစ်ခြင်းထက် အသက်အရွယ် အပိုင်းအခြား အလိုက် ကြည့်ရှုရန် သင့်မသင့် Rating စနစ်ဖြင့် သွားရန်နှင့် ရုပ်ရှင်လုပ်ငန်း စည်းမျဉ်းစည်းကမ်းများအတွက် အစိုးရက ဦးစီးမည့် ရုပ်ရှင်ကောင်စီတခု တည်ထောင်ရန် အကြံပြုထားကြောင်း ဒေါ်ဖြူဖြူသင်းက ဆိုသည်။ ရုပ်ရှင်ဆင်ဆာအဖွဲ့၏ လုပ်ထုံးလုပ်နည်းများ အောက်တွင် နှစ်များစွာကျင်လည်ခဲ့ရသည့် ရုပ်ရှင်ရိုက်ကူးသူများ အတွက် ဆင်ဆာ၏ တင်းကျပ်သော စည်းမျဉ်းစည်းကမ်းများသည် ၎င်းတို့၏ နောက်နောင် အနုပညာ ဖန်တီးမှုများအတွက် ခြိမ်းခြောက်မှုများ ဖြစ်လာပြီး မဖန်တီးခင်ကတည်းက မိမိဘာသာဆင်ဆာဖြတ်တောက်ခြင်း (self-censorship) မျိုးများ၊ စဉ်းစားစရာများ ရှိလာမည်ကို ရုပ်ရှင်ရိုက်ကူးသူများက စိုးရိမ်ကြောင်း ပြောဆိုကြသည်။ သို့သော်လည်း “အချစ်ဇာတ်လမ်းရိုးရိုးလေးတပုဒ်” ကို ရိုက်ကူးခဲ့သည့် ဒါရိုက်တာ နှင်းပပစိုးကမူ ဆင်ဆာအလိုကျ တင်ဆက်ပြသရန် စိတ်ကူးမရှိ ဆင်ဆာကိုတွန်းလှန်ရန် စိတ်ဆုံးဖြတ်ထားကြောင်း ပြောသည်။ “ကျမနောက်တခုသာ ဖန်တီးခွင့်ရမယ်ဆိုရင် အခုလိုမျိုးပဲ LGBT တွေအတွက် အမြဲတမ်း ဂုဏ်ယူစရာဖြစ်နေတဲ့ ဇာတ်ကားမျိုးတွေကိုပဲ ဖန်တီးမယ်။ ကျမ ဆင်ဆာကို ဂရုစိုက်ပြီးတော့ စိတ်ထဲမှာတွေးပြီးတော့ အနှောင့် အယှက်တခုအနေနဲ့ ရှိပြီးတော့ ဖန်တီးမှာမဟုတ်ပါဘူး” ဟု မနှင်းပပစိုးက ဝဿန်ရုပ်ရှင်ပွဲတော်တွင် ပြောကြားသွားခဲ့သည်။ The post ဆင်ဆာနှင့် လွတ်လပ်သောရုပ်ရှင် appeared first on ဧရာဝတီ.
Source : http://ift.tt/2hmNNIe
via IFTTT