ကုလသမဂၢ၏ ျပင္းထန္ေသာ အသုံးအႏႈန္းမ်ား သတင္းထုတ္ျပန္ေရးေကာ္မတီ ရႈတ္ခ်

ကုလသမဂ္ဂ၏ ပြင်းထန်သော အသုံးအနှုန်းများ သတင်းထုတ်ပြန်ရေးကော်မတီ ရှုတ်ချ ရခိုင်ပြည်နယ် အခြေအနေကို ဖော်ပြရန် ကုလသမဂ္ဂ လက်အောက်ခံ အဖွဲ့အစည်း အများအပြားက သုံးစွဲခဲ့သည့် “ရက်စက် ကြမ်းကြုတ်ခြင်း (Atrocities)”၊ “မျိုးနွယ်စုအားသုတ်သင်ရှင်းလင်းခြင်း (Ethnic Cleansing)” နှင့် “လူမျိုးတုံး သတ်ဖြတ် ခြင်း (Genocide)” စသည့် စကားလုံးများကို ခိုင်မာသည့် အထောက်အထား မရှိဘဲ သုံးစွဲခြင်းကို မြန်မာနိုင်ငံက ကန့်ကွက် လိုက်သည်။ ခိုင်လုံသော အထောက်အထားမရှိဘဲ ထိုစကားလုံးများ သုံးစွဲခြင်းကို ရှုတ်ချသည်ဟု အစိုးရသတင်း ထုတ်ပြန်ရေး ကော်မတီမှ ဗုဒ္ဓဟူးနေ့က ထုတ်ပြန်သော ကြေညာချက်တွင် ဖော်ပြထားသည်။ ပြီးခဲ့သည့် တနင်္လာနေ့က နယူးယောက်တွင် ကျင်းပသည့် ကုလသမဂ္ဂ အထွေထွေညီလာခံ အပြီးသတ် အပြန်အလှန် ဆွေးနွေးပွဲတွင် အထက်ပါ စွပ်စွဲချက်များကို ကုလသမဂ္ဂ ဆိုင်ရာ မြန်မာအမြဲတမ်း ကိုယ်စားလှယ် သံအမတ်ကြီး ဦးဟော်ဒိုဆွမ်းက ပြန်လည်တုံ့ပြန်ခဲ့ခြင်း ဖြစ်သည်။ “ရခိုင်ပြည်နယ် အခြေအနေကို မျိုးနွယ်စုအား သုတ်သင်ရှင်းလင်းခြင်း “Ethnic Cleansing” အဖြစ် အခြေအမြစ် မရှိဘဲ ထပ်တလဲလဲ စွပ်စွဲ ပြောကြားနေကြသည်မှာ အလွန် စိတ်မကောင်းဖွယ်ဖြစ်သည်” ဟု သံအမတ်ကြီးက ပြောသည်။ နိုင်ငံတကာ အကူအညီပေးရေး အေဂျင်စီများ၏ ခန့်မှန်းချက်အရ ရခိုင်ပြည်နယ်အတွင်း လက်နက် ကိုင် တိုက်ခိုက်မှုများ ကြောင့် ယနေ့အထိ ရိုဟင်ဂျာ ဆိုသူ လူဦးရေ ၄ သိန်း ၈ သောင်းခန့် ဘင်္ဂလားဒေ့ရှ်နိုင်ငံသို့ ထွက်ပြေး ခိုလှုံနေကြရပြီး ဗုုဒ္ဓဘာသာနှင့် ဟိန္ဒူဘာသာဝင် ၃၀၀၀၀ ခန့်သည်လည်း ရခိုင်ပြည်နယ် အတွင်းမှာပင် နေရပ်စွန့်ခွာ ထွက်ပြေး ခိုလှုံနေရသည်။ သြဂုတ်လ ၂၅ ရက်နေ့တွင် အကြမ်းဖက်သမားစစ်သွေးကြွများက ရဲကင်းများကို အချိန်ကိုက် တိုက်ခိုက်မှုများ ပြုလုပ်ခဲ့ပြီး နောက်တွင် ထိုဒေသကို တပ်မတော်၏ နယ်မြေ ရှင်းလင်းမှု စစ်ဆင်ရေးများ ပြုလုပ်ခဲ့ခြင်း ဖြစ်သည်။ နိုင်ဂျီးရီးယား၊ ပြင်သစ်၊ တူရကီ၊ အာဖဂန်နစ္စတန်၊ ပါကစ္စတန်၊ အာရပ်စော်ဘွားများနိုင်ငံ၊ မလေးရှား၊ မော်လဒိုက်၊ ချဒ်နှင့် ဘင်္ဂလားဒေ့ရှ် နိုင်ငံများက မြန်မာနိုင်ငံသည် မျိုးနွယ်စုအား သုတ်သင်ရှင်းလင်း ခြင်းနှင့် လူမျိုးတုံးသတ်ဖြတ်ခြင်း တို့ကို ကျူးလွန်သည် ဟု ၇၂ ကြိမ်မြောက် ကုလသမဂ္ဂ အထွေထွေညီလာခံတွင် စွပ်စွဲခဲ့သည်။ မြန်မာအမြဲတမ်း ကိုယ်စားလှယ် သံအမတ်ကြီး ဦးဟောက်ဒိုဆွမ်းက ထို အသုံးအနှုန်းများကို ပေါ့ပေါ့တန်တန် အသုံးမပြု သင့်ကြောင်းနှင့် ရခိုင်ပြည်နယ် မြောက်ပိုင်းရှိ အထိခိုက်ခံ နယ်မြေမှ မွတ်စလင် အသိုက်အဝန်းသည် သတင်းများတွင် ဖော်ပြနေသကဲ့သို့ လူနည်းစု မဟုတ်ပါကြောင်း၊ စင်စစ်အားဖြင့် ၎င်းတို့သည် ယင်းဒေသရှိ လူဦးရေစုစုပေါင်း၏ ၉၅ ရာခိုင်နှုန်းဖြစ်ပါ ကြောင်း၊ ပြောကြားပြီး မွတ်စလင်လူနည်းစုဟု ဖော်ပြနေသော သတင်းများကိုလည်း ဝေဖန်သည်။ ၂၀၁၄ ခုနှစ် သန်းကောင်စာရင်းအရ မြန်မာနိုင်ငံလူဦးရေ၏ ၉၀ ရာခိုင်နှုန်းသည် ဗုဒ္ဓဘာသာဝင်များ ဖြစ်ပြီး မွတ်စလင်နှင့် ခရစ်ယာန်ဘာသာဝင် အရေအတွက်မှာ ၄ ရာခိုင်နှုန်းစီ ရှိသည်။ သို့သော်ထိုဒေသတွင် ဒိုင်းနက်၊ မြို၊ သက်၊ မရမာကြီး ကဲ့သို့သော တိုင်းရင်းသား လူနည်းစုများနှင့် ဟိန္ဒူဘာသာဝင် လူနည်းစုများ နေထိုင်တည်ရှိမှုနှင့် ၎င်းတို့၏ ဒုက္ခကို ကမ္ဘာ့နိုင်ငံ အတော်များများက မသိရှိပါကြောင်းလည်း မြန်မာ သံအမတ်က ကုလသမဂ္ဂတွင် ပြောသည်။ ဘင်္ဂလားဒေ့ရှ်နိုင်ငံ ဝန်ကြီးချုပ် ရှိတ်ခ်ဟာစီနာကလည်း မွတ်စလင်များ အပေါ် ရက်စက်ကြမ်းကြုတ် မှုများ အတွက် စက်တင်ဘာလ ၁၁ ရက်နေ့က မြန်မာနိုင်ငံကို ဝေဖန်ခဲ့သည်။ ကုလသမဂ္ဂလူ့အခွင့်အရေး ဆိုင်ရာ မဟာမင်းကြီး ဇီယာ အက် အယ်လ်ဟူစိန် ကလည်း စက်တင်ဘာလ ၁၂ ရက်နေ့က ဂျီနီဗာရှိ လူ့အခွင့်အရေးကောင်စီသို့ မိန့်ခွန်းပြောကြားရာတွင် မြန်မာနိုင်ငံတွင် ဖြစ်ပွားနေသော ဖြစ်ရပ်များသည် လူမျိုးတုံး ရှင်းလင်းသတ်ဖြတ်မှု အတွက် ဖတ်စာအုပ်တွင် ထည့်သွင်းရမည့် ဥပမာဟု သုံးနှုန်းပြောဆိုခဲ့သည်။ နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်မှာလည်း ရခိုင် အကျပ်အတည်းကြောင့် ပြည်ပမှ ဝေဖန်မှု ဖိအားများ ခံနေရသည်။ ရခိုင်ပြည်နယ် အခြေအနေနှင့် ပတ်သက်ပြီး စက်တင်ဘာလ ၁၉ ရက်နေ့က ပြောကြားသော မိန့်ခွန်းတွင် ဒေါ်အောင်ဆန်း စုကြည် က မြန်မာနိုင်ငံတွင် အကြမ်းဖက်ဝါဒ တိုက်ဖျက်ရေး အတွက် နိုင်ငံတကာ မဟာမိတ်များနှင့် ပူးပေါင်းဆောင်ရွက် သွားမည်ဟု ပြောကြားခဲ့ပြီး ရခိုင်ပြည်နယ် လူ့အခွင့်အရေး ချိုးဖောက်မှုများ၊ အကြမ်းဖက်မှုများ အားလုံးကို ရှုတ်ချသည် ဟုလည်း ဆိုသည်။ ရခိုင်ပြည်နယ်တခုလုံးတွင် ငြိမ်းချမ်းရေး၊ တည်ငြိမ်ရေးနှင့် တရားဥပဒေစိုးမိုးရေးတို့ကို ပြန်လည် ထိန်းသိမ်းရန်လုပ်ဆောင် မည်ဟုလည်းဆိုသည်။ ၂၀၁၇ ခုနှစ် ဧပြီလက BBC သတင်းထောက်နှင့် တွေ့ဆုံမေးမြန်းခန်းတွင် ဒေါ်အောင်ဆန်းစုကြည် က မျိုးနွယ်စုအား သုတ်သင်ရှင်းလင်းခြင်း ဟုတ်မဟုတ် မေးခွန်းကို ဖြေကြားရာတွင် “မျိုးနွယ်စုကို သုတ်သင်ရှင်းလင်းနေတာတွေ ဖြစ်နေ တယ်လို့ ကျမတော့ မထင်ဘူး။ ဒီစကားလုံးဟာ လက်ရှိ ဖြစ်ပျက်နေတာတွေ အတွက် အရမ်းကို ပြင်းထန်တဲ့ စကားလုံးလို့ ကျမ ထင်ပါတယ်” ဟု ဖြေသည်။ အခြားနိုင်ငံများက လက်ရှိဖြစ်ပွားနေသော အဖြစ်အပျက်များကို လူမျိုးတုံး သတ်ဖြတ်ခြင်း ဖြစ်သည် ဟု သတ်မှတ် ပြောဆို လျက်ရှိသည်။ ၁၉၄၈ ခုနှစ် ကုလသမဂ္ဂ လူမျိုးတုံး သတ်ဖြတ်မှု တားဆီးအပြစ်ပေးရေး သဘောတူညီချက်အရ ထိုနိုင်ငံတကာ ရာဇဝတ်ပြစ်မှုသည် လူတစုကို သတ်ဖြတ်ခြင်း၊ မွေးဖွားမှု တားဆီးခြင်း၊ ပြင်းထန်သော အန္တရာယ် ဖြစ်စေခြင်းနှင့် ရည်ရွယ်ချက်ဖြင့် ဖျက်ဆီးခြင်း ဟု ဖွင့်ဆိုသည်။ လူမျိုးတုံး သတ်ဖြတ်မှုဆိုတဲ့ စကားဟာ ဥပဒေကြောင်းအရ၊ တရားစီရင်ရေး အရ သုံးသပ်မှုတွေ လိုအပ်တဲ့ အင်မတန် ပြင်းထန်လေးနက်တဲ့ စကားလုံးဖြစ်ပါတယ် ဟု ရခိုင်ပြည်နယ်ဆိုင်ရာ အကြံပေး ကော်မရှင် ဥက္ကဌနှင့် ကုလသမဂ္ဂ အထွေထွေအတွင်းရေးမှူးချုပ်ဟောင်း ကိုဖီအာနန်က ၂၀၁၆ ခုနှစ် ဒီဇင်ဘာလက ရန်ကုန်တွင် ပြောကြားခဲ့သည်။ ဧရာဝတီ အင်္ဂလိပ်ပိုင်းတွင် ဖော်ပြထားသည့် သူသူအောင်၏ Govt Information Committee Objects to UN Terminology on Rakhine ကို ဘာသာပြန်သည်။ The post ကုလသမဂ္ဂ၏ ပြင်းထန်သော အသုံးအနှုန်းများ သတင်းထုတ်ပြန်ရေးကော်မတီ ရှုတ်ချ appeared first on ဧရာဝတီ.
Source : http://ift.tt/2x28n7O
via IFTTT