ေအာက္တိုဘာတြင္ ျမစ္ေလးစင္း၌ ျမစ္ေရ ထပ္မံျမင့္တက္ႏိုင္

အောက်တိုဘာတွင် မြစ်လေးစင်း၌ မြစ်ရေ ထပ်မံမြင့်တက်နိုင် မြန်မာနိုင်ငံတွင်း မြစ်ရေကြီးသည့် နောက်ဆုံးကာလဖြစ်သည့် လာမည့် အောက်တိုဘာလတွင် မြစ်လေးစင်းသည် စိုးရိမ်ရေအမှတ် အသီးသီးသို့ ရောက်ရှိနိုင်ပြီး စိုးရိမ်ရေအမှတ် အထက်သို့ ရောက်ရှိနိုင်သည့် မြို့များကို မိုးလေဝသနှင့် ဇလဗေဒ ညွှန်ကြားမှု ဦးစီးဌာန (မိုး/ဇလ) က ယနေ့ ထုတ်ပြန်သည်။ အောက်တိုဘာလတွင် စစ်တောင်းမြစ်ရေသည် တောင်ငူမြို့၊ ဒုဋ္ဌဝတီမြစ်ရေသည် မြစ်ငယ်မြို့၊ ငဝန်မြစ်ရေသည် ငါးသိုင်းချောင်းမြို့၊ မြစ်သာမြစ်ရေသည် ပြင်သာ (ကလေးမြို့) တွင် ၁ ကြိမ်ခန့်စီ ယင်းမြို့များ၏ စိုးရိမ်ရေမှတ် အသီးသီး အထက် ကျော်လွန် ရောက်ရှိနိုင်ကြောင်း စက်တင်ဘာ ၂၈ ရက်တွင် ထုတ်ပြန်သော မိုး/ဇလ ထုတ်ပြန်ချက် တွင် ဖော်ပြထားသည်။ “အောက်တိုဘာမှာ မြစ်တွေအများကြီးတော့ စိုးရိမ်ရေ အမှတ်ကို မရောက်နိုင်သေးဘူး။ ဒုဋ္ဌဝတီ၊ စစ်တောင်း၊ ငဝန်၊ မြစ်သာ ဒီမြစ်တွေလောက်ပဲ စိုးရိမ်ရေ အမှတ်ရောက်ပြီးတော့ ကျန်တဲ့မြစ်တွေကတော့ ရေတော့ ပြန်တက်လာမယ်၊ စိုးရိမ်ရေ အမှတ်ကို သိပ်မရောက်နိုင်ဘူးပေါ့။ စိုးရိမ်ရတဲ့ အနေအထားတော့ မရှိပါဘူး၊ သတိထားဖို့တော့ လိုမယ်” ဟု မိုး/ဇလ ဒု ညွှန်ကြားရေးမှူးချုပ် ဦးကျော်မိုးဦး က ဧရာဝတီ သို့ ပြောသည်။ မြစ်ရေကြီးမှု ဖြစ်စဉ်ကို အောက်တိုဘာလ ၁ ရက်နေ့မှ စတင်ကာ ၃၀ ရက်နေ့ အထိ သတိပြုရမည်ဖြစ်ပြီး မိုးများပါက အထက်ပါ မြစ်လေးစင်းအပြင် ကျန်သည့် မြစ်ငယ် ချောင်းငယ်များတွင်လည်း ရေကြီးရေလျှံမှုများ ဖြစ်ပေါ်နိုင်ကြောင်း ၎င်းက ဆက်ပြောသည်။ အောက်တိုဘာလ မြစ်ရေကြီးနိုင်သည့် မြို့တွင် ကလေးမြို့သည်လည်း သတိထားရမည့် မြို့တွင် ပါဝင်သဖြင့် ကြိုတင် ပြင်ဆင်မှုများ ပြုလုပ်ထားပြီး ဖြစ်ကြောင်း ကလေးမြို့နယ် အထွေထွေ အုပ်ချုပ်ရေးမှူး ဦးဝေလွင်စိုးကလည်း ဧရာဝတီ သို့ ပြောသည်။ ဦးဝေလွင်စိုးက “ကယ်ဆယ်ရေး စခန်းတာဝန်ခံတွေ၊ ရွှေ့ပြောင်း တာဝန်ခံတွေ ခွဲထားတဲ့ အပေါ်မှာ အခုရေကြီးမှုဖြစ် သွားတာကလည်း ကျနော်တို့ အတွက် သတိတခု ပေးလိုက်သလိုပဲ၊ ကျနော်တို့က လေ့ကျင့်ပြီးသား ဖြစ်သွားတာပါ။ ကယ်ဆယ်ရေး စခန်းတွေက ရှိထားပြီးသား ဖြစ်သွားပြီဆိုတော့ ကျနော်တို့ အတွက်ကတော့ ဖြစ်လာလည်း အချိန်မီ ရွှေ့ပြောင်းနိုင်မှာ ဖြစ်ပါတယ်” ဟုလည်း ပြောဆိုသည်။ ကလေးမြို့တွင် စက်တင်ဘာ ၁၉ ရက်နေ့မှ စတင်ကာ ရေဝင်ရောက်ခဲ့ပြီး ၂၃ ရက်နေ့တွင် ရေပြန်ကျခဲ့ကာ လူဦးရေ ၁၀၈၀၁ ဦး၊ အိမ်ခြေ ၂၂၇၄ လုံး ရေးဘေး သင့်ခဲ့ရပြီး ယခုလက်ရှိတွင် ကယ်ဆယ်ရေး စခန်းများမှ ပြန်နိုင်ပြီဖြစ် ကြောင်း သိရသည်။ လာမည့် အောက်တိုဘာ ၁၀ ရက်အတွင်းတွင် ဧရာဝတီ မြစ်ရေသည် မြစ်ကြီးနားမြို့၊ ဗန်းမော်မြို့၊ ရွှေကူမြို့၊ ကသာ မြို့ နှင့် သပိတ်ကျင်းမြို့များတွင် ၃ ပေမှ ၅ ပေခန့်၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့၊ ညောင်ဦး မြို့၊ ချောက် မြို့၊ မင်းဘူးမြို့နှင့် မကွေးမြို့များတွင် ၁ ပေမှ ၃ ပေခန့့် မြင့်တက်လာနိုင်ကာ အောင်လံမြို့၊ ပြည်မြို့၊ ဆိပ်သာ မြို့၊ ဟင်္သာတမြို့နှင့် ဇလွန်မြို့များတွင် ၂ ပေမှ ၃ ပေခန့် ကျဆင်းနိုင်ကြောင်း မိုး/ဇလ က ထုတ်ပြန်ထားသည်။ ထို့အပြင် ချင်းတွင်းမြစ်ရေသည် ခန္တီးမြို့၊ ဟုမ္မလင်းမြို့ နှင့် ဖောင်းပြင်မြို့များတွင် ၄ ပေမှ ၆ ပေခန့်၊ မော်လိုက်မြို့၊ ကလေးဝမြို့၊ မင်းကင်းမြို့၊ ကနီမြို့နှင့် မုံရွာမြို့များတွင် ၂ ပေမှ ၄ ပေခန့် မြင့်တက်လာ နိုင်ကြောင်း သိရသည်။ The post အောက်တိုဘာတွင် မြစ်လေးစင်း၌ မြစ်ရေ ထပ်မံမြင့်တက်နိုင် appeared first on ဧရာဝတီ.
Source : http://ift.tt/2wWHfXD
via IFTTT