ေဒၚေအာင္ဆန္းစုၾကည္၏ မိန႔္ခြန္းကို AP သတင္း ပုံမွား႐ိုက္ ေဖာ္ျပခဲ့

ဒေါ်အောင်ဆန်းစုကြည်၏ မိန့်ခွန်းကို AP သတင်း ပုံမှားရိုက် ဖော်ပြခဲ့ နေပြည်တော်တွင် ကျင်းပသည့် အာရှ-ဥရောပ နိုင်ငံခြားရေး ဝန်ကြီးများ အစည်းအဝေးတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပြောကြားသော မိန့်ခွန်းနှင့် ပတ်သက်ပြီး AP သတင်းဌာနက သတင်းရေးရာတွင် အတိုင်ပင်ခံပုဂ္ဂိုလ် ပြောကြားချက်ကို မှားယွင်းစွာ ဖော်ပြခဲ့ကြောင့် ဒေါ်အောင်ဆန်းစုကြည် ၏ ဆိုလိုရင်း အဓိပ္ပာယ်နှင့် လုံးဝ ကွဲလွဲသွားစေခဲ့သည်။ ထိုမှားယွင်းသော သတင်းသည် ဒေါ်အောင်ဆန်းစုကြည် နှင့် မြန်မာနိုင်ငံ ဂုဏ်သိက္ခာကို ထိခိုက်စေလိုသော အကြံအစည်ဖြင့် ရည်ရွယ်ချက်ရှိရှိ လွဲမှားစွာ ဖွင့်ဆိုသည်ဟု ဆိုကာ မြန်မာနိုင်ငံစာနယ်ဇင်းကောင်စီက AP သတင်းဌာန၏ လုပ်ရပ်ကို ရှုတ်ချခဲ့သည်။ “ကမ္ဘာကြီးဟာ အကြောင်းအရာ အမျိုးမျိုးကြောင့် ပေါ်ပေါက်လာတဲ့ ပြသနာ၊ ပဋိပက္ခတွေက မည့်သည့်အခါကမျှ မလွတ်မြောက်ခဲ့” ဟု ဒေါ်အောင်ဆန်းစုကြည်က သူ၏ အဖွင့်မိန့်ခွန်းတွင် ပြောသည်။ “တကမ္ဘာလုံးက ပဋိပက္ခ တွေဟာ ခြိမ်းခြောက်မှုနဲ့ အရေးပေါ် အခြေအနေသစ်တွေကို ပေါ်ပေါက်စေခဲ့ပါတယ်။ (အဲဒါတွေကတော့) တရားမဝင် ရွှေပြောင်းနေထိုင်မှု၊ အကြမ်းဖက်ဝါဒနဲ့ အကြမ်းဖက် အစွန်းရောက်ဝါဒ ပျံ့နှံ့ခြင်း၊ လူမှုသဟဇာတ ကင်းမဲ့ခြင်းနဲ့ ညူကလီးယားစစ်ပွဲ ခြိမ်းခြောက်မှုတွေတောင် ပါဝင်ပါတယ်” ဟု ဒေါ်အောင်ဆန်းစုကြည်က ပြောကြားခဲ့သည်။ ထို ပြောကြားချက် အပြည်အစုံ မိန့်ခွန်းစာသားကို မီဒီယာများသို့ ထိုနေ့တွင်ပင် တရားဝင်ထုတ်ပြန် ပေးခဲ့ပြီး အခမ်းအနားကို လည်း မြန်မာ့အသံ နှင့်ရုပ်မြင်သံကြားမှ ၎င်း၏ ဖေ့စ်ဘွတ်စာမျက်နှာတွင် တိုက်ရိုက် ထုတ်လွှင့်ပေးခဲ့သည်။ သို့သော် ထိုမိန့်ခွန်းနှင့် ပတ်သက်သော AP သတင်းတွင်မူ ဒေါ်အောင်ဆန်းစုုကြည်၏ စကား အဓိပ္ပာယ်ကို ဆိုးရွားစွာ ပုံမှားရိုက်ထားသည်။ ဒေါ်အောင်ဆန်းစုကြည် ၏ ပြောကြားချက်ကို သတင်းအဖွင့် အပိုဒ်တွင် အကျဉ်းဖော်ပြရာ၌ ဒေါ်အောင်ဆန်းစုကြည်က “မြန်မာနိုင်ငံသည် ၎င်းတို့ မလိုလားသော မွတ်စလင် ရိုဟင်ဂျာများကို အကြမ်းဖက် မောင်းထုတ်နေသည်ဟု စွပ်စွဲခံနေရစဉ် ဒေါ်အောင်ဆန်းစုကြည်က တရားမဝင် ရွှေ့ပြောင်းနေထိုင်ခြင်းကြောင့် အကြမ်းဖက်ဝါဒ ပျံ့နှံ့လာစေခြင်းကလည်း ကမ္ဘာကြီးကို မတည်မငြိမ်ဖြစ်စေသည်” ဟု ပြောဆိုကြောင်း ရေးသားထားသည်။ ထိုသတင်းသည် မူရင်းအဓိပ္ပာယ်နှင့် လွန်စွာ ခြားနားသွားပြီး တရားမဝင် ရွှေ့ပြောင်းနေထိုင်မှုကြောင့် အကြမ်းဖက်ဝါဒ ပျံ့နှံ့ရသည် ဟု ဒေါ်အောင်ဆန်းစုကြည်က အပြစ်တင်သည့် သဘောမျိုး ရေးသားဖော်ပြသည်။ ထိုသို့ ရေးသားခြင်းသည် ဒေါ်အောင်ဆန်းစုကြည် အမှန်တကယ် ပြောကြားသည့် စကားနှင့် လုံး၀ ဆန့်ကျင်ဘက် ဖြစ်နေသည်။ ဒေါ်အောင်ဆန်းစုကြည် ၏ တိုက်ရိုက် ပြောကြားချက်ကို ဖော်ပြသည့် ထိုသတင်း၏ စတုတ္ထအပိုဒ်တွင်လည်း “တရားမဝင် ရွှေ့ပြောင်းနေထိုင်မှုကြောင့် အကြမ်းဖက်ဝါဒနှင့် အစွန်းရောက် အကြမ်းဖက်ဝါဒ ပျံ့နှံ့ခြင်း၊ လူမှုသဟဇာတကင်းမဲ့ခြင်း” ဟု မှားယွင်းစွာ ဖော်ပြခဲ့သည်။ ဒေါ်အောင်ဆန်းစုကြည်သည် သူ၏ မိန့်ခွန်းတွင် အကြမ်းဖက်ဝါဒ ပျံ့နှံ့ခြင်း အတွက် တရားမဝင် ရွှေ့ပြောင်း နေထိုင်ခြင်းကို အပြစ်တင်ခဲ့ခြင်း မရှိပေ။ “တရားမဝင် ရွှေပြောင်းနေထိုင်မှု” ၊ “အကြမ်းဖက်ဝါဒနဲ့ အကြမ်းဖက် အစွန်းရောက်ဝါဒ ပျံ့နှံ့ခြင်း” စသည်တို့ကို အကျိုးနှင့် အကြောင်းအဖြစ် ချိတ်ဆက်ခြင်း မရှိဘဲ သီးခြား ပြဿနာများ အဖြစ် ပြောကြားခဲ့ခြင်းသာ ဖြစ်သည်။ ထိုမိန့်ခွန်းကို နားထောင်ကြည့်လျှင်ပင် အထက်ပါ စကားစု ၂ ခုကြားတွင် သိသာသော အဖြတ်အတောက်ကို ကြားနိုင်သည်။ ထိုမိန့်ခွန်းကို စာဖြင့် ဖော်ပြချက်တွင်လည်း “တရားမဝင် ရွှေပြောင်းနေထိုင်မှု”၊ “အကြမ်းဖက်ဝါဒနဲ့ အကြမ်းဖက်အစွန်းရောက်ဝါဒ ပျံ့နှံ့ခြင်း” ၊ “လူမှုသဟဇာတ ကင်းမဲ့ခြင်း” စသည့်စကားစုများ ကြားတွင် ကော်မာ (ပုဒ်ထီး) များ အထင်အရှား ပါရှိသဖြင့် ဆိုလိုရင်း အဓိပ္ပာယ်မှာ သိသာ ထင်ရှားလှသည်။ AP သတင်းဌာန၏ သတင်းရေးသားဖော်ပြမှုသည် ဒေါ်အောင်ဆန်းစုကြည် အမှန်တကယ် ပြောကြားသော စကားများနှင့် ဆန့်ကျင်နေသည် ဟု မြန်မာနိုင်ငံ စာနယ်ဇင်းကောင်စီ ဒု ဥက္ကဌ ဦး အောင်လှထွန်းက ဧရာဝတီသတင်းဌာနသို့ ပြောသည်။ “ဒါဟာ နိုင်ငံတကာမှာ ဒေါ်အောင်ဆန်းစုကြည်နဲ့ မြန်မာနိုင်ငံ ဂုဏ်သိက္ခာကို ထိခိုက်စေလိုတဲ့ နောက်ကွယ်အကြံအစည်နဲ့ ရည်ရွယ်ချက်ရှိရှိ လွဲမှားစွာ ဖွင့်ဆို ရေးသားတာပဲ” ဟု ရိုက်တာ သတင်းဌာနတွင် နှစ်ပေါင်း ၂၀ ကျော် လုပ်ကိုင်ခဲ့ဖူးသော ဝါရင့် သတင်းသမား ဦးအောင်လှထွန်းက ပြောသည်။ ထိုမိန့်ခွန်းနှင့် ပတ်သက်သော AP သတင်းသည် အလျင်အမြန်ပျံ့နှံ့ သွားပြီး New York Times ၊ Washington Post နှင့် TIME အပါအဝင် နိုင်ငံတကာမီဒီယာ ၂၀ ကျော်တွင် ဖော်ပြသကဲ့သို့ လူမှုကွန်ရက်တွင် ကျယ်ကျယ်ပြန့်ပြန့် ဖြန့်ဝေခဲ့ကြသည်။ Burma Campaign UK မှ မာ့ခ် ဖာမန်နာကလည်း သူ၏ တွစ်တာစာမျက်နှာတွင် “ဒေါ်အောင်ဆန်းစုကြည်ဟာ လူ့အခွင့်အရေး ချိုးဖောက်မှုတွေ အတွက် ဝေဖန်တာကို လမ်းလွှဲဖို့ ကြိုးစားရင်း တရားမဝင် ဝင်ရောက်နေထိုင်မှုနဲ့ အကြမ်းဖက်ဝါဒကို အတူတူလို့သတ်မှတ်ပြီး မရိုးသားတဲ့ လူတွေကို သံယောင်လိုက်တာပဲ” ဟု ရေးပြီး ဆီးရီးယားသမ္မတ အယ်လ်အာဆတ်၏ တွစ်တာ စာမျက်နှာမှ “သမ္မတ အယ်လ်အာဆတ်: အကြမ်းဖက်ဝါဒဟာ ဒီမှာတင် မရပ်ဘဲ တရားမဝင် ရွှေ့ပြောင်းနေထိုင်မှုက တဆင့် ဥရောပကို ရောက်လာ လိမ့်မယ်”ဟု ရေးသားချက်ကို ထပ်မံမျှဝေသည်။ AP သတင်းဌာန အနေဖြင့် သတင်းသမားများ လုပ်ငန်းဆိုင်ရာ အခြေခံ ကျင့်ဝတ်နှင့် အညီ ဒေါ်အောင်ဆန်းစုကြည် ၏ မူရင်း မိန့်ခွန်း အတိုင်း ရေးသင့်သည် ဟုလည်း ဦးအောင်လှထွန်းက ပြောသည်။ “AP သတင်းဌာန အနေနဲ့ အမှားကို အမြန်ဆုံး ပြင်သင့်ပြီး ဒေါ်အောင်ဆန်းစုကြည် နဲ့မြန်မာနိုင်ငံကို လူသိရှင်ကြား တောင်းပန် သင့်တယ်” ဟုလည်း ဦးအောင်လှထွန်းက ပြောသည်။ AP အနေဖြင့် ထိုသတင်းကို အင်္ဂါနေ့ညနေပိုင်း အထိ ပြင်ဆင်ဖော်ပြခြင်း မရှိခဲ့ပေ။ ထိုသို့ မှားယွင်းဖော်ပြမှုနှင့် ပတ်သက်ပြီး ဧရာဝတီ မှ AP သတင်းဌာနသို့ အင်္ဂါနေ့ညနေပိုင်းတွင် မှတ်ချက် တစုံတရာ တောင်းခံခဲ့ရာ အကြောင်းပြန်ခြင်း မရှိပေ။ ဧရာဝတီမှ မှတ်ချက်တောင်းပြီးသည့် နောက်တွင် AP မှ ထိုသတင်းကို အမှားပြင်ဆင်ချက်ဖြင့် ညဦးပိုင်း ပြန်လည်ပြင်ဆင် ဖော်ပြခဲ့သည်။ ယခု ဖြစ်ရပ်သည် မြန်မာနိုင်ငံမှ ရိုဟင်ဂျာပြဿနာ ကဲ့သို့သော ထိရှလွယ်သော ကိစ္စများတွင် နိုင်ငံတကာ မီဒီယာများ၏ ဘက်လိုက်ခြင်း နှင့် ပတ်သက်သော ကြီးမားလှသည့် ပြဿနာကြီး၏ အဖျားအနားမျှသာ ဖြစ်သည်ဟုလည်း ဦးအောင်လှထွန်းက ပြောသည်။ နိုင်ငံတကာမီဒီယာများသည် ထိုပြဿနာကို မှားယွင်းစွာ ဖွင့်ဆိုပြီး သွေးဆူအောင် လုပ်နေသည် ဟုလည်း သူက ပြောသည်။ “ကျနော်တို့နိုင်ငံရဲ့ ဂုဏ်သိက္ခာကို ထိခိုက်စေဖို့ တမင်ရည်ရွယ်ပြီး ကျင့်ဝတ်နဲ့ မညီတဲ့သတင်းတွေကို ဖော်ပြနေတဲ့ တခြား နိုင်ငံတကာ သတင်းဌာနတွေ အများကြီး ရှိသေးတယ်” ဟုလည်း သူက ပြောသည်။ “ဒေါ်အောင်ဆန်းစုကြည် ကို အပြင်းအထန် ဝေဖန်ရေးဟာ အခုတလော နိုင်ငံတကာ မီဒီယာမှာ တော်တော်လေးကို ရေးကြီးခွင့်ကျယ် ဖြစ်နေတယ်” ဟု ရခိုင်ပြည်နယ်အရေးနှင့် ပတ်သက်ပြီး နိုင်ငံတကာမီဒီယာများတွင် ဖော်ပြမှုများနှင့် ပတ်သက်ပြီး ဆွေးနွေးရာတွင် မြန်မာ့အရေးကို ကာလကြာရှည်စွာ လေ့လာခဲ့သူ ဘာတေးလ်လင့်တနာက က ဧရာဝတီ သတင်းဌာနကို ရက်သတ္တပတ် အတန်အကြာက ပြောခဲ့သည်။ “နိုဘယ်လ်ဆုရှင် ဒေါ်အောင်ဆန်းစုကြည်သည် ရွာများ မီးရှို့ခံရပြီး အမျိုးသမီးများ အဓမ္မပြုကျင့်ခံရကာ ကလေးငယ်များ သတ်ဖြတ်ခံနေရသော လူမျိုးသုတ်သင်ရှင်းလင်းမှုကို ကမကထ ပြုနေသည်” ဟု ရေးသားခဲ့သော New York Times သတင်းစာ ပါ နီကိုလပ်စ် ခရစ်တော့ဖ် အတွေးအမြင် ဆောင်းပါးသည် ထိုသို့သော ဥပမာတခု ဖြစ်သည်ဟု ဘာတေးလ်လင့်တနာ က နမူနာ ပေးခဲ့သည်။ ဘာတေးလ်လင့်တနာက “ဒီလိုမျိုး သတင်းမှားဖြန့်တာ၊ မြေပြင်မှာ အမှန်တကယ် ဖြစ်နေတာကို လျစ်လျူရှုတာဟာ မြန်မာနိုင်ငံ ရဲ့ စစ်ဘက်က ချုပ်ကိုင်ထားတဲ့ အုပ်ချုပ်ရေးပုံစံမှာ အရပ်သားတွေ အတွက် နေရာတိုးချဲ့ဖို့ အားထုတ်မှုကို အရမ်းကို ထိခိုက်စေတယ်” ဟု ပြောသည်။ လွန်ခဲ့သော စက်တင်ဘာလက Al Jazeera ၊ Channel News Asia နှင့် Reuters သတင်းဌာနများသည် ရိုဟင်ဂျာ ပြဿနာနှင့် ပတ်သက်သော မတိကျသော သတင်း အချက်အလက်နှင့် မှားယွင်းသော ဓာတ်ပုံများကို ဖော်ပြခဲ့သော်လည်း Channel News Asia တခုတည်း ကသာလျှင် အတိအလင်း သတင်းပြန်လည် ပြင်ဆင်ချက် ထည့်သွင်းခဲ့သည်။ (ဧရာဝတီ အင်္ဂလိပ်ပိုင်းတွင် ဖော်ပြထားသည့် Kyaw Phyo Tha ၏ FACT CHECK: AP Report Badly Distorts Aung San Suu Kyi’s Comments ကို ဘာသာပြန်သည်။) The post ဒေါ်အောင်ဆန်းစုကြည်၏ မိန့်ခွန်းကို AP သတင်း ပုံမှားရိုက် ဖော်ပြခဲ့ appeared first on ဧရာဝတီ.
Source : http://ift.tt/2jUuKq1
via IFTTT