မေလးရွား ဗိုလ္ေလာင္းတဦး ေသဆုံးမႈ၏ တရားခြင္သို႔ တေခါက္

မလေးရှား ဗိုလ်လောင်းတဦး သေဆုံးမှု၏ တရားခွင်သို့ တခေါက် ၂၀၁၇ ခုနှစ် ဇွန်လ ၁ ရက်နေ့ ည ၁၁ နာရီ ၃၀ မိနစ်တွင် တယ်လီဖုန်း ခေါ်ဆိုမှုတခုကို အသက် ၅၃ နှစ် အရွယ် တက္ကဆီ မောင်းသူတဦး ဖြစ်သည့် ဇူလကာနိန်း အီဒရော့စ် Zulkarnain Idros လက်ခံရရှိခဲ့သည်။ ဖုန်းခေါ်သူမှာ မလေးရှား ကာကွယ်ရေးတက္ကသိုလ် (UPNM) မှ အရာရှိတဦး ဖြစ်ပြီး အဆိုပါစစ်တက္ကသိုလ်တွင် ဇူလကာနိန်း အီဒရော့စ်၏ အကြီးဆုံး သား ဖြစ်သည့် အသက် ၂၁ နှစ် အရွယ် ဇူလဖာဟန် အော့စမန် Zulfarhan Osman တက်ရောက်နေသည်။ သူက ရေတပ် အရာရှိ တဦး ဖြစ်လာရေးအတွက် မျှော်လင့်ထားသည်။ “ခင်ဗျားရဲ့သား သေဆုံးသွားပါပြီ” ဟု ဖုန်းခေါ်သူ အရာရှိက ဇူလကာနိန်း အီဒရော့စ်ကိုပြောသည်။ အချိန် အတော်ကြာအောင် ငြိမ်သက်နေပြီးမှ သူက မေးလိုက်သည်။ “ဘာဖြစ်တာလဲ” “မီးလောင်ပြီး သေသွားတာပါ။” ထိုသတင်းကို ဇူလကာနိန်း အီဒရော့စ်၏ အသက် ၅၄ နှစ်အရွယ် ဇနီး ဖြစ်သူ ဟာဝါ အော့စမန် Hawa Osman ကြားသည့်အခါ မျက်ရည်မဆည်နိုင်တော့။ “ဘုရားသခင် … ကျမသား …” အစပိုင်းတွင် ဖုန်းဆက်သူ အရာရှိက ဇူလဖာဟန် အော့စမန်၏ စစ်တပ် ကိုယ်ပိုင် နံပါတ်ကို ဖတ်ပြသည်။ သတင်းဆိုးကို မျှော်လင့်မထားသော မယုံကြည်နိုင်သော ဖခင်ဖြစ်သူက တပ်မှ ကိုယ်ပိုင် နံပါတ်အစား သား၏ အရပ်သား မှတ်ပုံတင် နံပါတ်ကို တောင်းသည်။ “ကျနော့် စိတ်တွေ ယောက်ယက်ခတ်နေခဲ့တယ်။ အဲဒါတွေ အားလုံးက မှားတယ်လို့ ကျနော် ဆက်တွေးနေခဲ့တယ်။ တခြား တယောက်ယောက်ရဲ့ ကလေးများဖြစ်နေမလားပေါ့။ သူ့ကို ကျနော်ကိုယ်တိုင် ကြည့်ဖို့ လိုတယ်” ဟု မျက်နှာ ဝိုင်းဝိုင်းနှင့် ဇူလကာနိန်း အီဒရော့စ်က ရှင်းပြသည်။ ညသန်းခေါင်တွင် ဇူလကာနိန်း အီဒရော့စ်၊ ဟာဝါ အော့စမန်နှင့် သူတို့၏ ကလေးငယ် ၃ ယောက်က မလေးရှားနိုင်ငံ တောင်ပိုင်း ဂျိုဟော Johor ပြည်နယ်ရှိ သူတို့နေအိမ်မှ ဆလန်ဂေါ Selangor ပြည်နယ် ကဂျန်း Kajang ရှိ ဆာဒန်း Serdang ဆေးရုံသို့ ကီလိုမီတာ ၃၀၀ ခရီးကို သွားခဲ့ကြသည်။ ဇူလကာနိန်း အီဒရော့စ်နှင့် ဟာဝါ အော့စမန်တို့က သူတို့သား ဘယ်လိုသေဆုံးခဲ့ရပုံကို ရှာဖွေဖော်ထုတ်ချင်ကြသည် လွန်စွာ ကြီးမားသော သောကကို ခံစားနေရပုံပေါ်သော ဟာဝါ အော့စမန်က တယ်လီဖုန်း မလာမီ အချိန် အတော် ကြာကြာကတည်းက တစုံတရာ မှားယွင်းနေသည်ဟု သံသယရှိနေခဲ့ကြောင်း ပြန်ပြောပြသည်။ “ပုံမှန်ဆိုရင် ကျမသားက ညတိုင်း ဖုန်းဆက်တယ်။ ဒါပေမယ့် သူ့ဆီက ဘာမှ မကြားရတာ တပတ်ကျော်ပြီ။ သူ့ဖုန်း ပျောက်သွားလို့တဲ့။ ဘာလိုပဲ ဖြစ်ဖြစ် ရက်အနည်းငယ်ကြာပြီးတဲ့ နောက်မှာ တစုံတခု မှားယွင်းနေပြီလို့ ခံစားရတယ်။” နောက်ဆုံး၌ မနက် ၃ နာရီကျော်ကျော်လောက်တွင် သူတို့မိသားစု ဆာဒန်းဆေးရုံသို့ ရောက်ရှိသွားကြသည်။ သူတို့ နှင့် တွေ့ဆုံရန် ကာကွယ်ရေးတက္ကသိုလ်မှ အရာရှိ တဦးလည်း ရှိနေသည်။ သို့သော်လည်း မနက် ၉ နာရီ နောက်ပိုင်းမှသာ သူတို့ကို အလောင်းကြည့်ခွင့်ပြုသည်။ သူတို့မှာ စိတ်ပင်ပန်း ဆင်းရဲ စွာဖြင့် ၆ နာရီကြာ စောင့်ဆိုင်းခဲ့ကြရသည်။ သတင်းဖော်ပြချက်များအရ ဇူလဖာဟန် အော့စမန်ကို ၂၀၁၇ ခုနှစ် မေလ ၂၁ ရက်မှ ၂၂ ရက်အတွင်းတွင် သူ၏ အ တန်းဖော်တစုက ညှဉ်းပန်း နှိပ်စက်ခဲ့ရသည် ဟုသိရသည်။ laptop ကွန်ပျူတာတလုံး ခိုးယူခဲ့ခြင်းကြောင့်ဟု ဆိုသည်။ သူ့ကို မီးပူနှင့် ခြေလက်များ၊ ကိုယ်လုံး တလျှောက် ပွတ်တိုက်ဆွဲခဲ့ကြသည်။ ခါးပတ်တခု၊ ရာဘာရေပိုက်တချောင်းနှင့် အင်္ကျ ီချိတ်တခုကိုုလည်း အသုံးပြုခဲ့ကြသည်။ တရားခံများက ကာကွယ်ရေးတက္ကသိုလ်မှ Jebat ကျောင်းဆောင်တွင် မေလ ၂၁ ရက်နေ့ မနက် ၂ နာရီ ၃၀ မိနစ်မှ ၅ နာရီ ၃၀ မိနစ် အတွင်းနှင့် နောက်တနေ့ (မေ ၂၂ ရက်) မနက် ၁နာရီ ၃၀ မှ ၅ နာရီ ၄၅ မိနစ် အတွင်းတွင် ကျူးလွန်ခဲ့ခြင်းဟု ယူဆရပါသည်။ နောက်တပတ်အကြာ မေလ ၂၇ ရက်နေ့တွင် သင်တန်းမှ အဖော် ၂ ဦးက ဇူလဖာဟန် အော့စမန်ကို ဆေးဝါးကုသမှု ခံယူရန် ဆေးခန်းတခုသို့ ပို့ဆောင်ပေးခဲ့ကြောင်း သတင်းများတွင် ထပ်မံဖော်ပြခဲ့ကြသည်။ မေလ ၃၁ ရက်နေ့တွင်လည်း သူတို့က ဇူလဖာဟန် အော့စမန်ကို ဆေးခန်းသို့ နောက်တကြိမ်ခေါ်သွားခဲ့ကြသည်ဟု သိရသည်။ အသက် ၂၁ နှစ် အရွယ် ဇူလဖာဟန် အော့စမန်သည် မလေးရှား ကာကွယ်ရေးတက္ကသိုလ်မှ တတိယနှစ် ကျောင်းသားဖြစ်သည် နောက်ဆုံး၌ စတင်တိုက်ခိုက်ခံရပြီး ၁၁ ရက်အကြာ ဇွန်လ ၁ ရက်နေ့တွင် ဇူလဖာဟန် အော့စမန်ကို ဆေးရုံသို့ ပို့ဆောင်ခဲ့ကြသည်။ ဆေးရုံတွင် သူ့ကို ကယ်ဆယ်ရန် ကြိုးစားခဲ့သော်လည်း ဆေးရုံရောက်ပြီး များမကြာမီမှာပင် သေ ဆုံးသွားခဲ့သည်။ မိဘများအတွက် သားဖြစ်သူကို စတင်မြင်ရသည့် အချိန်တွင် အလွန်ခံရခက်၍ မယုံနိုင်လောက်စရာ နာကျင်မှုကို ခံစားခဲ့ရသည်။ “သူ့ ကို အတည်ပြုပေးဖို့ အတွက် ကျမတို့ကို ပထမဆုံး ခေါ်ပြတဲ့ အချိန်မှာ သူတို့က မျက်နှာကိုပဲ ပြတယ်” ဟု ဟာဝါ အော့စမန်က ရှင်းပြသည်။ ဇူလဖာဟန် အော့စမန်၏ အလောင်းကို မြင်ရသည့် ပုံစံအတိုင်း သူက လက်ကို ရင်ဘတ်ပေါ်သို့ တင်ရင်း ပြောသည်။ “ကျမတို့က ကျမတို့သားရဲ့ တကိုယ်လုံးကို မြင်ရဖို့ တောင်းဆိုခဲ့တယ်။” ထိုအချိန်တွင် ခံစားခဲ့ရသော ပူဆွေး သောကများ၏ နာကျင်မှုကြောင့် ဟာဝါ အော့စမန်၏ အသံက တိမ်ဝင်ပျောက်ကွယ်သွားသည်။ အလောင်းကို စစ်ဆေးမှု အစီရင်ခံစာတခု အရ ဇူလဖာဟန် အော့စမန်၏ ကိုယ်ခန္ဓာ ၈၀ ရာခိုင်နှုန်းကို မီးလောင်ဒဏ်ရာများက ဖုံးလွှမ်းထားသည်။ ဇူလကာနိန်း အီဒရော့စ်က ပြောလက်စ စကားကို ပြန်ဆက်ပေးသည်။ “ကျနော်တို့သားကို ဒီလို အခြေအနေမျိုးနဲ့ မြင်လိုက်ရတော့ ဘယ်လို ခံစားရသလဲ ဆိုတာ ရှင်းပြစရာ စကားလုံး ကျနော့်မှာ မရှိပါဘူး။ ကျနော့်မှာ ကျစရာ မျက်ရည်လည်း မရှိတော့ပါဘူး။ သူ့အမေ အတွက်ကတော့ ရင်ကွဲစရာပါ။ သူက ပြည့်စုံပြီး ကျန်းမာတဲ့ သားလေးကို မွေးခဲ့တာပါ။” “ဘာကြောင့် ငါတို့က သူ့ကို ဒီလို မြေမြှုပ်ရမှာလဲ။ ဘာဖြစ်ခဲ့လို့လဲ။ ကျနော့်ကိုယ် ကျနော် မရပ်မနား မေးနေမိတယ်” ဟု ဇူလကာနိန်း အီဒရော့စ်က အထစ်ထစ် အငေါ့ငေါ့ဖြင့် ဆက်ပြောသည်။ ဇူလဖာဟန် အော့စမန်၏ အလောင်းကို ၂၀၁၇ ခုနှစ် ဇွန်လ ၂ ရက်နေ့ ညနေ ၃ နာရီတွင် မိသားစုသို့ ထုတ်ပေးခဲ့သည်။ ထိုညနေ၌ သူ့ကို ဂျိုဟောတွင် မြှုပ်နှံခဲ့သည်။ အောက်တိုဘာလ ၂၇ ရက်နေ့တွင် သူတို့မိသားစုနှင့် ကျနော် ကွာလာလမ်ပူ တရားရုံး၌ တွေ့ဆုံခဲ့ပါသည်။ မိဘ ၂ ပါးလုံးက ရင်ဘတ်တွင် “#justice4farhan” ဟု ကန့်လန့်ဖြတ်ရေးထိုးထားသော တီရှပ်များ ဝတ်ဆင်ထားကြသည်။ ဇူလဖာဟန် အော့စမန် သေဆုံးမှု နှင့် ဆက်နွယ်နေသည့် လူငယ် ၁၉ ဦးကို တရားရုံးတွင် ကြားနာ စစ်ဆေးနေသည်။ ၎င်းတို့ထဲမှ ၅ ဦးကို လူသတ်မှုဖြင့် စွဲချက်တင်ထားပြီး ၁ ဦးမှာ အားပေးအားမြောက်မှုနှင့် ဖြစ်သည်။ အဆိုပါ စွဲချက်များ အရ သေဒဏ်အထိ ကျခံရနိုင်ပြီး အလွန် ငယ်ရွယ်သေးသည့် အသွင်ရှိသော အဆိုပါ လူငယ်လေးများမှာ အချုပ် ခန်းအတွင်းတွင် ရှိနေကြသည်။ မြို့ကြီးတမြို့၏ တရားရုံးများတွင် ပုံမှန် မြင်တွေ့နေကျ ဖြစ်သော မူးယစ်ဆေး ရောင်းသူများ၊ သူခိုးများနှင့် အတူ သူတို့ကို သံကြိုးခတ်ထားသည်။ ဇူလဖာဟန် အော့စမန်က ချစ်စရာ ကောင်းပြီး မာရသွန် အပြေးသမားတဦးလည်း ဖြစ်ခဲ့သည် ကျန် ၁၃ ယောက်ကို ပြင်းထန်စွာ နာကျင်စေမှုဖြင့် စွဲချက်တင်ထားပြီး အပြစ်ရှိကြောင်း တွေ့ရှိရပါက ထောင်ဒဏ် ၇ နှစ် အထိ ကျခံရနိုင်သည်။ သူတို့ကတော့ အချုပ်ခန်းအတွင်းမှာ ရှိမနေပါ။ သမရိုးကျအတိုင်း ရှပ်အင်္ကျ ီလက်ရှည်များ (အချို့က အနောက်တိုင်းဝတ်စုံပင် ဝတ်ဆင်ထားကြသည်) ဝတ်ဆင်ထား ကြသည့် သူတို့ (ကျန် လူငယ် ၁၃ ဦး) က တရားခွင်တွင် အများပြည်သူအတွက် ထားသည့် ခုံတန်းများ၏ ဘေးနှင့် နောက်ဘက်တွင် စောင့်ဆိုင်းနေကြသည်။ မှတ်ပုံတင် အရာရှိက သူတို့အမည်များကို ခေါ်သည့်အခါ သူတို့က လျှောက်လာပြီး (အချို့က စစ်ရေးပြ ချီတက်သလို လျှောက်လာကြသဖြင့် သူတို့မှာ အမှန်တကယ်အားဖြင့် ဗိုလ်လောင်းများ ဖြစ်ကြသည်ကို ကျနော်တွေးမိပါသည်) ပရိသတ်များ ရှေ့မှ ဝက်ခြံ အတွင်း စုပြုံလျှက်ရှိနေသည့် မြင်ကွင်းက စိတ်မသက်သာစရာ ဖြစ်စေသည်။ ကျနော် ဘာမှ မတတ်နိုင်ပါ။ တရားရုံးမှ မြင်ကွင်းက တကယ်ကို စိတ်ပျက်စရာ ဖြစ်သည်။ အလွန်ပင် အဆီ အငေါ်မတည့် ရှိလွန်းသည်။ သူတို့ အားလုံးက နုပျိုလန်းဆန်းသော မျက်နှာနှင့် ထက်မြက်ပုံရသော လူငယ်များ ဖြစ်သည်။ အခြားကိစ္စတရပ်ရပ်သာ ဖြစ်ခဲ့လျှင် သူတို့ကို ကြည့်၍ တောက်ပသော လူငယ်တစု၊ ကျနော်တို့ တိုင်းပြည်၏ အနာဂတ်ဟု တွေးမိလိမ့်မည် ဖြစ်သည်။ သို့သော်လည်း ယခုအခါ သူတို့က တရားရုံးအလယ်တွင် စုရုံးနေကြခြင်း ဖြစ်ပြီး လွန်ခဲ့သော ၆လ ခန့်က ဇူလဖာဟန် အော့စမန် ကြုံတွေ့ခဲ့ရသည့် အဖြစ်ကြောင့် သူတို့၏ အနာဂတ်များကလည်း အလွန်ပင် မေးခွန်းထုတ်ဖွယ်ရာ ဖြစ်နေသည်။ သူတို့၏ သင်တန်းဖော် လူငယ်တယောက် အသေဆိုးနှင့် သေဆုံးခဲ့ရသည်။ ယခု လူငယ် ၁၉ ယောက်သာလျှင် အဘယ်ကြောင့်ဆိုသည်ကို သိခဲ့သည်။ မည်သို့ ဖြစ်ခဲ့သည်ကို သူတို့သာ သိကြသည်။ တရားရုံးက ကြားနာနေစဉ် အတွင်းတွင် ဇူလကာနိန်း အီဒရော့စ်၊ ဟာဝါ အော့စမန်နှင့် သူတို့၏ အသက်၁၅ နှစ် အရွယ် သမီးတို့က ရှေ့ဆုံး ခုံတန်းတွင် ထိုင်နေခဲ့ကြသည်။ တိတ်ဆိတ်စွာ၊ တည်ငြိမ်စွာဖြင့် သူတို့ရှေ့တွင်ရှိနေသော သူတို့၏ သားကို သတ်ခဲ့သူများဟု သံသယရှိသူများကို ကြည့်နေခဲ့ကြသည်။ သူတို့ ပတ်လည်တွင် လူငယ် ၁၉ ဦး၏ မိဘများ ရှိနေကြသည်။ အချို့က ရှက်ရွံ့နေသည့် မျက်နှာမျိုး ရှိကြပြီး အချို့က သူတို့၏ သားများကို အားပေးရန် ကြိုးစားနေကြသည်။ လူအုပ် ၂ ခုကြားမှ မမြင်နိုင်သည့် ခြားနားချက်ကို သတိပြုမိသည့် အတွက် ကျနော်က သူတို့ကြားတွင် တစုံတရာ တုန့်ပြန်မှု ရှိခဲ့သလားဟု မေးကြည့်မိသည်။ “သံသယရှိသူ ၂ ယောက်ရဲ့ မိဘတွေက ကျနော့်ကို တောင်းပန်ဖို့ ကြိုးစားခဲ့ကြပါတယ်” ဟု ဇူလကာနိန်း အီဒရော့စ် က ပြောသည်။ “ကျနော် သူတို့ကို ပြောလိုက်တယ်။ တကယ်လို့ ကျနော်က ခင်ဗျားတို့ကို ခွင့်လွှတ်ရင် ကျနော့်သား ပြန်လာမှာလားလို့။” သို့သော်လည်း တရားရုံးတွင် ဆက်လက်စစ်ဆေးရန် ကျန်နေသေးသည့်အတွက် အနည်းဆုံးတော့ သူတို့သား ဖြစ် သူ၏ နောက်ဆုံးနေ့များနှင့် ဇူလဖာဟန် အော့စမန် ပုံမှန်မဟုတ်ဘဲ သေဆုံးရသည့် နောက်ကွယ်မှ အကြောင်းရင်းများကို (အကယ်၍ ရှိခဲ့လျှင်) ကျန်ရစ်သူ မိသားစုက မကြာမီ သိရှိလာရမည် ဖြစ်သည်။ သူတို့ ဘယ်လိုခံစားနေရသည်ကို ဇူလကာနိန်း အီဒရော့စ်က ပွင့်ပွင့် လင်းလင်းပင် ပြောပြသည်။ “သူ့ကို နှိပ်စက်တဲ့ အချိန်နဲ့ သူ့ကို တွေ့တဲ့ အချိန်ကြားထဲက တပတ်လုံးမှာ ဘာတွေဖြစ်ခဲ့သလဲ ဆိုတာ ကျနော်တို့ မသိဘူး။ ကြည့်ရတာ သူ ပျောက်နေတာကို တယောက်မှ သတိထားမိပုံမရဘူး။ ဒါကြောင့် ကျနော်တို့ တရားခွင်ကို လာတာပါ။” ညစဉ် အမှတ်စဉ်ခေါ် လူစစ်ရသည့် ဝတ္တရားရှိသော်လည်း ဇူလဖာဟန် အော့စမန်၏ ပျက်ကွက်မှုက လျှို့ ဝှက်ချက် တခု ဖြစ်နေသည်။ “ဒီကိစ္စ ဖြစ်ပြီးကတည်းက အတင်းအဖျင်း ပြောတာတွေ အများကြီးရှိခဲ့တယ်။ ဘာတွေ ဖြစ်ခဲ့သလဲ ဆိုတာနဲ့ ပတ်သက်ပြီး ကောလာဟလတွေလည်း ကျမတို့ အများကြီး ကြားခဲ့ရတယ်။ ဒါပေမယ့် အမှန်တရားကို ကျမတို့ ဖော်ထုတ်ဖို့ လိုတယ်။ ဒီအမှုက ကြာဦးမှာ ဖြစ်ပေမယ့် ကျမသားအတွက် ဆက်ပြီး လိုက်နေဦးမှာပဲ။ ကျမတို့ ဒါကို ဒီတိုင်း လွှတ် မထားနိုင်ဘူး” ဟု ဟာဝါ အော့စမန်က ထပ်ပြောသည်။ ထိခိုက်ခံစားနေရသော်လည်း ဇူလကာနိန်း အီဒရော့စ်နှင့် ဟာဝါ အော့စမန်တို့ ဘာကြောင့် သူတို့၏ နွေးထွေးလှိုက်လှဲမှုနှင့် အပြုံးကို မပျက်စေသည်ကို သူတို့၏ သားအကြီးဆုံး အကြောင်း နားထောင်ကြည့်လျှင် နားလည်နိုင်ပါလိမ့်မည်။ ဇူလဖာဟန် အော့စမန်က ချစ်စရာ ကောင်း၍ တာဝန်ကျေသော တတိယနှစ် ကျောင်းသားတဦး ဖြစ်ပါသည်။ သူ၏ အိပ်မက်မှာ တနေ့ တွင် သင်္ဘောများကို ဦးစီးနိုင်ရေး ဖြစ်သည်။ ယခုအခါ အဆိုပါ အိပ်မက်တို့က ပျက်စီးသွားခဲ့ပြီ ဖြစ်သည်။ တရားစွဲခံထားရသည့် လူငယ် ၁၉ ဦးအတွက်လည်း အနာဂတ်က ပျောက်ဆုံးလုနီးပါး ဖြစ်လာသည်။ မဆုံးနိုင်သော တရားခွင်။ တရားရုံးစရိတ်များ။ သူတို့၏ တောက်ပသော အနာဂတ်(အလုပ်အကိုင်) ကလည်း ပျက်စီးခဲ့ပြီ ဖြစ်သည်။ ဝမ်းနည်း ပူဆွေးနေရသည့် မိခင် ဟာဝါ အော့စမန်ကတော့ မကျေမချမ်း ဖြစ်နေသည်။ “ကျမ သိရမှဖြစ်မယ်။ ကျမသား သေသွားတာကို ကျမ လက်ခံနိုင်ပါတယ်။ ဒါပေမယ့် သူ သေသွားတဲ့ နည်းလမ်းကို တော့ လက်မခံနိုင်ဘူး။” (ကာရင်ရတ်စလန်သည် အာဆီယံရေးရာများကို အထူးပြုလေ့လာရေးသားနေသူ မလေးရှား စာရေးဆရာတဦး ဖြစ်သည်။ ကွာလာလမ်ပူ အခြေစိုက် အကြံပေးအဖွဲ့ Ceritalah ASEAN ကို တည်ထောင်သူ အမှုဆောင်အရာရှိချုပ်လည်း ဖြစ်သည်။) The post မလေးရှား ဗိုလ်လောင်းတဦး သေဆုံးမှု၏ တရားခွင်သို့ တခေါက် appeared first on ဧရာဝတီ.
Source : http://ift.tt/2AleKE8
via IFTTT