ဒုကၡေရျပင္တြင္ တံတားထိုးသကဲ့သို႔

ဒုက္ခရေပြင်တွင် တံတားထိုးသကဲ့သို့ ယခုရေးသားမည့် အကြောင်းအရာသည် ဧရာဝတီမြစ်ကမ်းတွင် နေထိုင်ကြသော ဝေနေယျသတ္တဝါအသိုက်အမြုံတခု အ ကြောင်းဖြစ်သည်။ ရေတွင် အဖိုးတန်သယံဇာတပေါကြွယ်လှပြီး မြေသြဇာကောင်းသောမြစ်ကမ်းများရှိသည့် ထိုကြီးမား လှ ပသောမြစ်ကြီးသည် အထက်ပါ သတ္တဝါအသိုက်အမြုံကို အကျိုးဆောင်ခဲ့သည်မှာ ရှေးပဝေသဏီကပင် ဖြစ်သည်။ ၎င်းသတ္တဝါ အသိုက်အမြုံကို အန်နီကိုပီယာဟု ခေါ်သည်။ မြစ်ကမ်းများပေါ်တွင် သစ်သီးမျိုးစုံ၊ အခွံမာသီးမျိုးစုံ အရည်ရွှမ်းသော ဘယ်ရီသီးမျိုးစုံနှင့် အသက်ဇီဝကို အထောက်အပံ့ ပေးသော အခြား အစားအစာမျိုးစုံ အလိုအလျောက် ပေါကြွယ်လှသော ဧရာဝတီမြစ်၏ အရောင်အသွေးစုံလှသော သမိုင်း တွင် နှစ်ထောင်ပေါင်းမျာစွာကြာအောင် မျောက်များနှင့် မျောက်မောင်းမများသည် ၎င်းတို့၏ ရိက္ခာဖူလှုံစေရန် ပိုင်နက် နယ် မြေအတွက် တဦးနှင့် တိုက်ခိုက်ရန် မလိုအပ်ခဲ့ချေ။ အလားတူစွာပင် မြစ်အတွင်းတွင် ရေလုံလောက် အားထားနိုင်လောက်အောင် စီးဆင်းနေသောကြောင့် နွေလများတွင်ပင် ရွံ့အိုင်များသည် ရေခန်းခြောက်ခြင်းမရှိကြဘဲ ရေမြင်းနှင့် ကြံ့များသည်လည်း ထိုရွံ့အိုင်များတွင် လူးလှိမ့်ခွင့်အတွက် တဦး နှင့်တဦး တိုက်ခိုက်ရန်မလိုပေ။ အန်နီကိုပီယာတွင် ကောင်းမွန်သောစီးပွားရေးမူဝါဒများချမှတ်ကျင့်သုံးခြင်းဖြင့် ထိုသို့သော ဆုလာဘ်ကို ကောင်းစွာ အသုံး ချသည်။ ထိုမူဝါဒများသည် ဗိုလ်ချုပ်အောင်ဆန်း၏ အကြံဉာဏ်ကို လိုက်နာခြင်းကြောင့် ပေါ်ပေါက်လသော မူဝါဒများဖြစ် သည်။ ၁၉၄၇ ခုနှစ်တွင် ဗိုလ်ချုပ်က “ကျနော်တို့စီးပွားရေးကို စီမံတဲ့အခါ နိုင်ငံရေးကို ဆွဲသွင်းပြီး ပြဿနာတွေကို ရှုပ်ထွေးအောင် မလုပ်သင့်ဘူး။ စီးပွားရေးနဲ့ နိုင်ငံရေးဟာ တော်တော်လေး ဆက်စပ်နေတာကို ကျနော်သိပေမယ့် လောလောဆယ်တော့ နိုင်ငံရေးကို ခဏဘေးဖယ်ထားချင်တယ်” ဟု ပြောခဲ့သည်။ ဗိုလ်ချုပ်ထံမှ ထိုသို့သော ပညာရှိစကားများသည် အန်နီကိုပီယာမှ ဦးဆောင်ဦးရွက်ပြုသူများအတွက် အတွေးအခေါ် ကောင်းများဖြစ်စေပြီး ၎င်းတို့ စီးပွားရေးမူဝါဒများအတွက် အခြေခံကောင်းဖြစ်လာသည်။ မြစ်ကြီးဧရာနှင့် ကောင်းမွန်သော စီးပွားရေးမူဝါဒများကပေးသော ဆုလဒ်များကြောင့် အယ်နီကိုပီယာတွင် စီးပွားရေး ကောင်းစွာ ဖွံ့ဖြိုးသည်။ အန်နီကိုပီယာတွင် နေထိုင်ကြသူများသည် ကောင်းစွာ စားသောက်၊ ဝတ်ဆင်၊ နေထိုင်ကြရသည်။ ထိုအခြေခံလိုအပ်ချက်များအပြင် ကောင်းမွန်သော ကျန်းမာရေးစောင့်ရှောက်မှု၊ ပညာရေး၊ သန့်ရှင်းသောရေ၊ စနစ်ကျ သော သန့်ရှင်းရေး၊ သက်သောင့်သက်သာရှိသော သယ်ယူပို့ဆောင်ရေး၊ မှီခိုအားထားလောက်သော ပြည်တွင်းသုံး လျှပ် စစ်ဓာတ်အား၊ စွမ်းဆောင်ရည်မြင့်မားသော ဆက်သွယ်ရေးစနစ်နှင့် သာယာလုံခြုံသော ရပ်ရွာစသည့် သမားရိုးကျ လိုအပ် ချက်များကိုလည်း ခံစားနိုင်ကြသည်။ လူမှုဆိုင်ရာ ဝန်ဆောင်မှုများဖြစ်သည့် ပန်းခြံများ၊ ပြဇာတ်ရုံများ၊ စာကြည့်တိုက်များ၊ အားကစားနှင့် အပန်းဖြေရာအ ဆောက်အအုံများကိုလည်း အသုံးပြုနိုင်ကြသည်။ ကောင်းမွန်သောစီးပွားရေးက ထိုလိုအပ်ချက်များကို ဖြည့်ဆည်းပေးနေသောကြောင့် အန်နီကိုပီယာတွင် နေထိုင်ကြသူများ သည် ငြိမ်းချမ်းမှု၊ စီးပွားအောင်မြင်မှု၊ သဟဇာတဖြစ်မှုနှင့် ရောင့်ရဲတင်းတိမ်မှုကို ခံစားကြရသည်။ ကောင်းမွန်ငြိမ်းချမ်းသော ဘဝသည် အန်နီကိုပီယာတွင်နေထိုင်ကြသူများ၏အရေအတွက် အထူးသဖြင့် ယုန်များ၏ အရေအတွက်ကို အလျင်အမြန် တိုးတက်စေသည်။ မကြာသေးမီနှစ်များအတွင်းတွင်မူ မြစ်ကြီးဧရာနှင့် အန်နီကိုပီယာဒေသခံများ ခံစားနေရသော ငြိမ်းချမ်းကြွယ်ဝချမ်းသာမှု သည် ပြင်းထန်သောဖိစီးမှုများနှင့် ရင်ဆိုင်လာရသည်။ ထိုသို့ဖြစ်ရခြင်းနောက်မှာ အကြောင်းရင်းများစွာရှိသည်။ သစ်တောပြုန်းတီးခြင်၊ ဆည်များ၊ တူးမြောင်းများ တည်ဆောက်ခြင်း၊ ရှော့တိုက်ငါးဖမ်းခြင်း၊ ရွှေတူးရာတွင်သုံးသော ဓာတု ပစ္စည်းများကြောင့် ရေအဆိပ်သင့်ခြင်း၊ မြစ်ကြမ်းပြင်တွင် နုန်းများတင်ခြင်းတို့သည် မြစ်ကြီးဧရာကို အကြီးအကျယ် ထိခိုက် နစ်နာစေခဲ့သည်။ ၎င်းတို့၏အဖိုးမဖြတ်နိုင်သော အမျိုးသားအမွေအနှစ်အဖြစ် သတ်မှတ်ထားသည့် မြစ်ကြီးဧရာတွင် ဖြစ်ပေါ်သော ထိခိုက်မှု များသည် အန်နီကိုပီယာတွင် နေထိုင်သူအားလုံးကိုလည်း ဘဝပျက်စေခဲ့သည်။ မြစ်ကမ်းတလျှောက်ရှိ အခြားသော အသိုက်အမြုံများကဲ့သို့ပင် အန်နီကိုပီယာသည် အများအားဖြင့် လူသားများကြောင့် ဖြစ်ပေါ်သော ဆိုးကျိုးများကို အပြင်းအထန်ခံစားရပြီး နေထိုင်သူ အရေအတွက် အလျင်အမြန်တိုးတက်နေသောကြောင့် ထိုစိန်ခေါ်မှုကို မည်သို့ အကောင်းဆုံး တုံ့ပြန်မည်ကို အဖြေရှာရန် အချိန်နှင့် အားထုတ်မှု အများအပြား ပြုလုပ်နေရသည်။ သူတို့ရရှိသော အဖြေ၏တစိတ်တပိုင်းမှာ Simon နှင့် Garfunkel တို့၏ကျော်ကြားလှသော သီချင်းအတိုင်း ဒုက္ခရေပြင်တွင် တံတားထိုးသကဲ့သို့ မြစ်တဖက်ကမ်းသို့ တံတားထိုးပြီး ၎င်းတို့၏အသိုက်အမြုံကို တိုးချဲ့ရန်ပင်ဖြစ်သည်။ တံတားတည်ဆောက်ရန်အတွက် မြို့တော်တွင် ရုံးစိုက်သော အမျိုးသားစီမံကိန်းနှင့် ဖွံ့ဖြိုးတိုးတက်ရေးကော်မရှင်(NPDC) ၏ခွင့်ပြုချက်လိုအပ်သည်။ ထို့ကြောင့် တံတားစီမံကိန်း ခွင့်ပြုချက် တောင်းရန်အတွက် အယ်နီကိုပီယာတွင် ပညာအရှိဆုံး သူဖြစ်သည့် ဇီးကွက်ကို စေလွှတ်ရန် ဆုံးဖြတ်လိုက်သည်။ ဇီးကွက်သည် သူ၏တာဝန်ကို အကောင်းမြင်သည်။ သူသည် နံနက်လေယာဉ်ဖြင့် မြို့တော်သို့သွားမည်ဖြစ်ကြောင်း၊ တနာ ရီအတွင်း ထုပ်ပိုးပြင်ဆင်မည်ဖြစ်ကြောင်း၊ အမျိုးသားဥယျာဉ်တွင် လေအေးပေးစက်နှင့်ဇိမ်ကျကျနေသော သူ၏ မိတ်ဆွေ ပင်ဂွင်းနှင့် နေ့လယ်စာ စားမည်ဖြစ်ကြောင်း ညနေခင်း လေယာဉ်ခရီးစဉ်ဖြင့် ပြန်လာမည်ဖြစ်ကြောင်း ဇီးကွက်က သူ၏ လုပ်ဖော်ကိုင်ဖက်များကို ပြောခဲ့သည်။ သို့သော် သူသည် နေ့လယ် လေယာဉ်ခရီးစဉ်နှင့် ပြန်ရောက်လာတော့ အားလုံး အံ့သြကုန်ကြသည်။ သူ၏အမွေး အ တောင်များလည်း ဖရိုဖရဲဖြစ်နေပြီး တုန်လှုပ်နေပုံလည်း ရသည်။ မည်သည်တို့ ဖြစ်ပျက်ခဲ့ပါသနည်း။ NPDC အဝင်ဂိတ်သို့ သူ ရောက်သွားသောအခါ ဂိတ်ပေါက်စောင့်သူက မှတ်ပုံတင် ကတ်ပြရန် ပြောသည်ဟု ဇီးကွက်က ပြန်ပြောပြသည်။ သူ့တွင် မှတ်ပုံတင်မရှိပေ။ သူ၏မိဘများသည် မည်သူမည်ဝါဖြစ် သည်ကိုလည်း အမေးခံရသည်။ သူ၏ဖခင်သည် ပေါ့ ဖြစ်ပြီး မိခင်မှာ မမ် ဖြစ်သည်ဟု သူ ရှင်းပြသည်။ သို့သော် ဂိတ်ပေါက်စောင့်သည် ကျေနပ်ပုံမရဘဲ သူ၏ အဖိုးအဖွားများသည် မည်သူမည်ဝါတို့ ဖြစ်ကြသည်ကို ဆက်လက် မေးမြန်းသည်။ နိုင်ငံတွင် နေထိုင်သူအများစုကဲ့သို့ပင် အယ်နီကိုပီယာဒေသခံများ၏ ဘိုးဘေးဘီဘင်များသည် မြောက်ဘက်တောင်တန်း များနှင့် တောင်ဘက်ပင်လယ်များကို ဖြတ်သန်းပြီး ထိုနိုင်ငံသို့ ရောက်လာကြခြင်းဖြစ်သည်။ ထိုစဉ်က ပုံနှိပ်စက် မပေါ်သေးသောကြောင့် သူတို့တွင် မည်သည့်တရားဝင်စာရွက်စာတမ်းမျှ မရှိကြပေ။ အချို့သော အချက်အလက်များကိုမူ ပေရွက်ပေါ်တွင် လက်နှင့်ရေးထိုးထားသည်ရှိသော်လည်း ထိုပေရွက်များသည်လည်း နာဂစ်မုန်တိုင်းအတွင်း ပင်လယ်ပြင်သို့ မျောပါသွားခဲ့သည်။ မေးခွန်းပေါင်းများစွာကို ဖြေဆိုနေရသောကြောင့် နောက်ဆုံး တွင် ဇီးကွက်သည် စိတ်မရှည်တော့ဘဲ ဒေါသမပေါက်ကွဲမီ အမြန်ပြန်ရန် ဆုံးဖြတ်ခဲ့သည်ဟု သူက ရှင်းပြသည်။ ဇီးကွက်၏တာဝန် မအောင်မြင်သောကြောင့် ဒေသခံများသည် မည်သူ့ကို နောက်တကြိမ် လွှတ်ရမည်ကို စဉ်းစားကြ သည်။ မြေခွေးကို ရွေးချယ်လိုက်ခြင်းသည် ကျိုးကြောင်းဆီလျော်သောရွေးချယ်မှုဖြစ်သည်။ သူသည် ပရိယာယ်များကာ ထိုးထွင်းလုပ်ဆောင်တတ်ပြီး သူ၏မြေခွေးလုပ်နည်းလုပ်ဟန်များကို သုံးပြီး လူလို ဆောင်ရွက်နိုင်သူဖြစ်သည်။ ထို့ကြောင့် သူ့ကို နိုင်ငံ၏မြို့တော်သို့ စေလွှတ်လိုက်သည်။ မြေခွေးသည် ဂိတ်ပေါက်စောင့်သူနှင့် ပြဿနာမရှိပေ။ သူက ဂိတ်ပေါက်စောင့်ကြေး ၂၅၀၀၀ ကျပ်ပေးလိုက်ပြီးနောက် မကြာမီမှာပင် NPDC ကော်မရှင်နာမင်းကြီး၏ရှေ့တွင် ထိုင်ခွင့်ရလိုက်သည်။ ကော်မရှင်နာမင်းကြီးသည် တက္ကသိုလ်ပါမော က္ခဟောင်းဖြစ်ပြီး မရမ်းကုန်း နည်းပညာတက္ကသိုလ် MIT မှ သင်္ချာဘောဂဗေဒ ပါရဂူဘွဲ့ Ph.D ရရှိထားသူဖြစ်သည်။ ကော်မရှင်နာမင်းကြီးသည် ကျက်သရေရှိလှပြီး ဆွဲဆောင်မှု ရှိသူလည်း ဖြစ်သည်။ သူသည် မြေခွေးပြောသော တံတား စီမံ ကိန်းကို စိတ်အားထက်သန်စွာ နားထောင်ပြီး သူသည် နောက်ဆုံးပေါ် အဖြောင့်သွားစီးပွားရေးပုံစံများ (linear econometric models) ကို သုံးပြီး သယ်ယူပို့ဆောင်ရေး မဟာစီမံချက် ရေးဆွဲနေသည်ဟု ရှင်းပြသည်။ အဆိုပါ တံတား စီမံကိန်းကိုလည်း ထိုသို့သော မော်ဒယ်များအသုံးပြု ရေးဆွဲထားခြင်းရှိမရှိ သူူက မြေခွေးကို မေးသည်။ တံတားစီမံကိန်းတွင် အဖြောင့်သွား မော်ဒယ်များကို အများအပြား သုံးထားကြောင်း၊ အထူးသဖြင့် လူထုထောက်ခံမှု လှုံ့ ဆော်ရေးတွင် ထိုမော်ဒယ်များသုံးကြောင်း မြေခွေးက အတည်ပြုဖြေကြားသည်။ ထိုမော်ဒယ်များသည် အယ်နီကိုပီယာတွင် ဖက်ရှင်နှင့် ကြော်ငြာလုပ်ငန်းများတိုးတက်ရေးအတွက် လုပ်ဆောင်ရာတွင် အလွန်အသုံးဝင်ကြောင်းလည်း သူ ရှင်းပြသည်။ အမှန်တွင် သူသည် အာဆီယံအလှမယ်ပြိုင်ပွဲတွင် နိုင်ငံကို ကိုယ်စား ပြုမည့် ချောမောလှပသည့် အဖြောင့်သွားမော်ဒယ်တဦးကို ရွေးချယ်ခဲ့သော အကဲဖြတ်ဒိုင်များအနက် တဦးပင်ဖြစ်သည်။ မြေခွေး၏ အဖြောင့်သွားမော်ဒယ်သည် အာဆီယံအလှမယ်ဖြစ်ခဲ့လျှင်ပင် သယ်ယူပို့ဆောင်ရေး မဟာစီမံချက်ကို များစွာ အထောက်အကူပြုမည် မဟုတ်ကြောင်း ကော်မရှင်နာမင်းကြီးက သဘောပေါက်သည်။ ထို့ကြောင့် သူသည် မြေခွေးရှင်းလင်းတင်ပြချက်များအတွက် ကျေးဇူးတင်ကြောင်း ယဉ်ကျေးစွာ ပြောပြီး စီမံကိန်းကြိုတင် ပြင်ဆင်မှုအတွက် NPDC ၏လမ်းညွှန်ချက်များနှင့် ပိုမို ညီညွတ်စေရန် စီမံကိန်းစာရွက်စာတမ်းများတွင် ဖြည့်စွက်ပြင်ဆင် ရန် ပြောလိုက်သည်။ ဇီးကွက်နှင့် ပရိယာယ်များသော မြေခွေးတို့၏ မအောင်မြင်သောတံတားတည်ဆောက်ရေးကြောင့် အန်နီကိုပီယာ အစိုးရ အသိုင်းအဝန်းတွင် အကျပ်အတည်းဖြစ်စေခဲ့သည်။ အစိုးရအဖွဲ့ အရေးပေါ်အစည်းအဝေး ခေါ်ယူရသည်။ အစိုးရအဖွဲ့၏ စဉ်းစားသုံးသပ်ဆွေးနွေးမှုများသည် လိုရင်းတိုရှင်းသာ ဖြစ်ပြီး အောက်ပါအတိုင်း ဆုံးဖြတ်ချက်ချလိုက်သည်။ “မည်သည့်နည်းနှင့်မျှ မအောင်မြင်လျှင် ရိုးရိုးရှင်းရှင်း စဉ်းစားပါ” ဟုဖြစ်သည်။ ရိုးရိုးရှင်းရှင်း ချည်းကပ်သောနည်းလမ်းမှာ ရိုးရှင်းပြီး ထည်ထည်ဝါဝါမနေတတ်သော်လည်း ငြိမ်းချမ်းရေးနှင့် သဟဇာတဖြစ်ခြင်း၏သင်္ကေတဖြစ်သူကို မြို့တော်သို့ စေလွှတ်ရေးပင်ဖြစ်ကြောင်း သူတို့ သဘောတူလိုက်သည်။ ထို့ကြောင့် ချိုးငှက်ကို ထိုကိစ္စအတွက် ရွေချယ်ကာ ချက်ချင်း စေလွှတ်လိုက်သည်။ တပတ်ကြာပြီး နောက်တပတ်ကြာသွားသည့်တိုင် ချိုးငှက်ထံမှ မည်သည့်သတင်းမျှ မကြားရပေ။ တတိယမြောက်အပတ်တွင်မူ အဝေးလယ်ကွင်းများကို ဖြတ်ကာ သူတို့ထံသို့ ဖုန်လုံးကြီးတလုံး လွင့်မျောလာနေသည်ကို ဒေသခံများ တွေ့ကြရသည်။ ပိုမိုနီးကပ်လာသောအခါ ဂီတသံများကို ကြားလာရသည်။ နောက်ဆုံးတွင် သူတို့ထံသို့ ဖုန်လုံးကြီးရောက်လာသောအခါတွင်မူ ချိုးငှက်သည် အမိုးဖွင့် ဗင်ကားဖြင့် ထရပ်ကားများ၊ မြေ တူးစက်ကြီးများ၊ မြေသယ်ယာဉ်ကြီးများ၊ ကရိန်းကြီးများ၊ ဆောက်လုပ်ရေးပစ္စည်းများနှင့် လုပ်သားများပါသောယာဉ်တန်း ကို ဦးဆောင်ခေါ်ယူလာသည်ကို တွေ့ကြရသည်။ လည်ပင်းတွင် ပန်းကုံးများ စွပ်ခံထားရပြီး အဖြောင့်သွားမော်ဒယ်များ ဝန်းရံနေသော ချိုးငှက်က သူ့ကိုကြိုဆိုနေသည့် ကြီးမားလှသောဒေသခံအုပ်စုကြီးကို အောင်မြင်မှုအထိမ်းအမှတ်အဖြစ် လက်ကို ဝှေ့ရမ်းပြရင်း ပြောလိုက်သည်။ “ရောင်းရင်းတို့ မြို့တော်ကို သွားတဲ့ခရီးစဉ်အတွင်းမှာ NPDC အရာရှိတွေ အောင်မြင်တဲ့ အမြင်ချင်းဖလှယ်မှုတွေ လုပ် ဆောင်ခဲ့ပါတယ်။ ဆွေးနွေးညှိနှိုင်းမှုတွေဟာလည်း မျှော်မှန်းထားတာထက် များစွာသာလွန်မြင့်မားတဲ့ ရလဒ်တွေကို ရရှိခဲ့ ပါတယ်။ တည်ဆောက်ရေးလုပ်ငန်းကို ချက်ချင်းစတင်မှာ ဖြစ်ပြီး အာဏာပိုင်တွေက တံတားတခုသာမက မြစ်ကြောင်း တ လျှောက်လုံးမှာပါ တံတားတွေတည်ဆောင်ဖို့ သဘောတူလိုက်ပါတယ်” ဟုပြောသည်။ ချိုးငှက်၏ မြို့တော်ခရီးစဉ် အောင်မြင်မှုကြောင့် အန်နီကိုပီယာတွင် လူတိုင်းလူတိုင်း စိတ်လှုပ်ရှားနေကြသည်။ ဇီးကွက် ခေါင်းဆောင်ပြီး သတင်းစာရှင်းလင်းပွဲကျင်းပသည်။ သူက ချိုးငှက်၏ဆောင်ရွက်ချက်များကို ကျေးဇူးတင်သည်။ သို့သော် တံတားတည်ဆောက်ခြင်းသည် အန်နီကိုပီယာသို့ ငြိမ်းချမ်းရေးနှင့်ကြွယ်ဝချမ်းသာမှုများ ပြန်လည်ဆောင်ယူရန် လိုအပ်သောအခြေအနေတခုမျှသာ ဖြစ်ကြောင်း ထောက်ပြသည်။ လိုအပ်သောအခြေအနေကို ဖြည့်ဆည်းရမည်။ သတင်းထောက်ငယ်များသည် ရှုပ်ထွေးနားမလည်ဖြစ်သွားသည်။ ထို့ကြောင့် သူက ဥပမာနှင့် ရှင်းပြရသည်။ ကလေးမွေးရန် မိဘသည် လိုအပ်သောအခြေအနေဖြစ်သည်ကို အားလုံးသိသည်ဟု ဇီးကွက်က သတင်းထောက်များကို ပြောသည်။ သို့သော် မိဘတဦးတည်းနှင့် လိုအပ်သောအခြေအနေကို မဖြည့်ဆည်းနိုင်ပေ။ မိဘတဦးနှင့် ဆန့်ကျင်ဘက် လိင် အခြားမိဘတဦးရှိလျှင် ကလေးမွေးရန်အခြေအနေ ပြည့်စုံသည်။ အလားတူ စဉ်းစားပါက တံတားတည်ဆောက်ခြင်းသည် အန်နီကိုပီယာအတွက် လိုအပ်သောအခြေအနေဖြစ်သည်။ အန်နီကိုပီယာအတွက်သာမက တနိုင်ငံလုံးအတွက် ငြိမ်းချမ်းမှုနှင့် သာယာဝပြောမှုပြန်လည်ဆောင်ယူပေးရန် ပြည့်စုံလုံ လောက်သောအခြေအနေမှာ ဧရာဝတီမြစ်ကို ယခင်ကတိုင်း ပြန်လည်ထိန်းသိမ်းနိုင်ရေး အရေးပါသော ထပ်မံလိုအပ်သည့် အခြေအနေဖြစ်သည်ဟု သူ ပြောသည်။ ထိုစကားကို ကြားသောအခါ သတင်းထောက်များ ရုတ်ရုတ်သဲသဲ ဖြစ်သွားသည်။ ၎င်းတို့၏ဌာနချုပ်များသို့ သတင်းများ၊ အီးမေးများပေးပို့ရန် အမြန်လုပ်ဆောင်နေကြသည်။ ဧရာဝတီမြစ်ကို ယခင်ပုံစံအတိုင်း ပြန်လည်ထိန်းသိမ်းရန် တနိုင်ငံလုံးရှိ ပြည်သူများ၏ ခိုင်မာသောထောက်ခံမှုနှင့် စိတ်ပိုင်းဖြတ်မှုရရှိအောင် လုပ်ဆောင်ရာတွင် အမျိုးသမီးများနှင့် လူငယ်များ သည် အဓိကအခန်းမှ ပါဝင်သည်။ .(ဦးမြင့်သည် ရန်ကုန်တက္ကသိုလ် ဘောဂဗေဒဌာနမှ ကထိကဟောင်း၊ မြန်မာနိုင်ငံခြားရေး ဝန်ကြီးဌာန စီးပွားရေးဌာနခွဲ အကြီးအကဲ၊ အာရှနှင့်ပစိဖိတ်ဒေသများအတွက် ကုလသမဂ္ဂ၏ စီးပွားရေးနှင့် လူမှုရေးကော်မရှင်တွင် အကြီးတန်း စီးပွားရေး အရာရှိတဦးဖြစ်သည်။ အင်္ဂလိပ်ဘာသာဖြင့် ၎င်းပေးပို့လာသော Bridge Over Trouble Water ကို ဆီလျော်အောင် ဘာသာပြန်ဆိုသည်) The post ဒုက္ခရေပြင်တွင် တံတားထိုးသကဲ့သို့ appeared first on ဧရာဝတီ.
Source : http://ift.tt/2vULbDE
via IFTTT