ကွဲသွားလျှင် အလိုအလျောက် ပြန်ဆက်သည့်မှန် ဂျပန်တီထွင် တိုကျို၊ ဒီဇင်ဘာ ၂၈ ဂျပန်နိုင်ငံမှ သုတေသီတစ်ဦးသည် မတော်တဆ ကွဲသွားသည့်မှန်ကို လက်နှင့်ဖိလိုက်လျှင် အလိုအလျောက် ပြန်ဆက်ကာ အကောင်းအတိုင်းဖြစ်သွားစေရန် တီထွင်နိုင်ခဲ့ကြောင်း The Citizen သတင်းတွင် ဖော်ပြထားသည်။ အနာဂတ်တွင် ကားမှန်များ၊ ဆောက်လုပ်ရေးလုပ်ငန်းသုံး မှန်များ၊ ငါးကန်များကို ပြုလုပ်သည့်မှန်များသည် လက်ရှိ သက်တမ်းထက် သုံးဆပိုခံနိုင်သည့် ဆူပါမှန်များအဖြစ် ထုတ်လုပ်နိုင်တော့မည်ဖြစ်ကြောင်း ယင်းသတင်းကဆိုသည်။ ဂျပန်နိုင်ငံ၊ တိုကျိုတက္ကသိုလ်မှ ဓာတုဗေဒသုတေသီ ယာနာဂီဆာဝါသည် ကွဲအက်သည့်မှန်များကို ပြန်ဆက်နိုင်သည့် နည်းပညာဖြင့် တီထွင်ထုတ်လုပ်နိုင်ခဲ့ပြီး ရေစိုခံ၊ ရေလုံသည့် မှန်မျိုးလည်းဖြစ်ကြောင်း ပြောကြားသည်။ ဤတီထွင်မှုကြောင့် မကြာသောကာလတွင် စမတ်ဖုန်းမှန်များသည် ကွဲသွားလျှင်လည်း ပြန်ဆက်စေရန် လုပ်ဆောင်နိုင်တော့မည် ဖြစ်ပြီး ကွဲအက်သွားသော နေရာကို ဖိလိုက်သည်နှင့် ပြန်လည် အကောင်းအတိုင်း ဖြစ်နိုင်ကြောင်း ယာနာဂီဆာဝါက ဆိုသည်။ ယခုတွေ့ရှိမှုအတွက် ဖော်ထုတ်ရန် ကြာဦးမည်ဆိုသော်လည်း အနာဂတ်တွင် မကွဲနိုင်သည့် မှန်များကို တီထွင်ထုတ်လုပ်ရန်အတွက် လမ်းစတစ်ခုဖြစ်ကြောင်း၊ ပေါ့ပါးပြီး မှန်ကဲ့သို့ မကွဲနိုင်သည့် ကားမှန်တစ်မျိုးကိုလည်း တီထွင်နိုင်တော့မည်ဟု ယူဆကြောင်း AFP သတင်းတွင် ရေးသားထားသည်။ သရုပ်ပြပွဲတွင် ယာနာဂီဆာဝါက မှန်ကွဲစနှစ်စကို စက္ကန့် ၃၀ အတွင်း ပြန်ဆက်သွားစေရန်လည်းကောင်း၊ Polyether Thioureas ဟုခေါ်သည့် အော်ဂဲနစ် ဖန်တစ်မျိုးနှင့် ပြုလုပ်ထားသော ရေပုလင်းများကို ခွဲလိုက်သော်လည်း အစများ လွင့်မထွက်သွားဘဲ အက်ကြောင်းများနှင့် ရေကိုထိန်းသိမ်းထားနိုင်မှုတို့ကိုလည်းကောင်း ဖော်ထုတ်ပြနိုင်ခဲ့သည်။ မိမိအနေနှင့် ကွဲသွားလျှင် ပြန်ဆက်မည့်မှန်ကို တီထွင်ရခြင်းထက် မကွဲနိုင်သည့်မှန်ကိုသာ တီထွင်ရန် ဆန္ဒရှိကြောင်း၊ မှန်ကိုကြည့်ပြီး ကွဲသွားမှာလားဆိုသော စိုးရိမ်စိတ်မျိုး အနာဂတ်တွင် မဖြစ်ပေါ်စေရန် လုပ်ဆောင်လိုခြင်း ဖြစ်ကြောင်း ယာနာဂီဆာဝါက ပြောကြားသည်။ လက်ရှိအသုံးပြုနေသည့် မှန်များထက် သုံးဆပိုခံနိုင်ရည်ရှိသော မှန်မျိုးထုတ်လုပ်ရန် နောက်ထပ် ၁၀ နှစ်ခန့် ကြာနိုင်သေးကြောင်း AFP တွင် ရေးသားထားသည်။
Source : https://goo.gl/Acdwgo
via IFTTT
No comments:
Post a Comment