ၿပိဳင္ပြဲဝင္ခါနီး သရဖူအသိမ္းခံလိုက္ရတဲ့ Miss Grand Myanmar ေ႐ႊအိမ္စည္

ပြိုင်ပွဲဝင်ခါနီး သရဖူအသိမ်းခံလိုက်ရတဲ့ Miss Grand Myanmar ရွှေအိမ်စည် Miss Universe Myanmar 2017 ရဲ့ 1st Runner ဆုရှင် ရွှေအိမ်စည်ကို Miss Universe Myanmar Organization မှ သူမကို ပေးအပ်ထားတဲ့ သရဖူကို ပြန်လည်သိမ်းယူကာ ဗီယက်နမ်နိုင်ငံမှာ သွားရောက်ယှဉ်ပြိုင်ရမယ့် Miss Grand International 2017 ပြိုင်ပွဲသို့ စေလွှတ်ယှဉ်ပြိုင်စေမှုကိုလည်း လူအစားထိုးယှဉ်ပြိုင်ရန် ဆောင်ရွက်ခဲ့တယ်လို့ သိရပါတယ်။ အလှမယ် ရွှေအိမ်စည်မှ ပြိုင်ပွဲစတင်သည့်အချိန်မှ အောက်တိုဘာ ၁ ရက်နေ့အထိ လိုအပ်တဲ့ ပညာရေး အထောက်အထား စာရွက်စာတမ်းများတင်ပြမှုမရှိခြင်း၊၊ ၂၀၁၇ ခုနှစ် စက်တင်ဘာ ၂၁ ရက်နေ့တွင် Miss Universe Myanmar Organization ကို နိုင်ငံကိုယ်စားပြု အလှမယ်တဦးရဲ့ ဂုဏ်ပုဒ်နဲ့လျော်ညီမှုမရှိသော ရိုင်းစိုင်းကြမ်းတမ်းသည့် အပြောအဆို အသုံးအနှုန်းများဖြင့် ပြောဆိုခြင်း၊ မကြာမီသွားရောက် ယှဉ်ပြိုင်ရမယ့် ပြိုင်ပွဲခရီးစဉ်အတွက် လိုအပ်သည်များကို အချိန်မီ ဆောင်ရွက်နိုင်မှုမရှိခြင်း စတဲ့အချက်များအပါအဝင် စုစုပေါင်းကြေညာချက် ၅ ချက်ဖြင့် သရဖူကို ပြန်လည်ရုတ်သိမ်းရတာဖြစ်တယ်လို့ Miss Universe Myanmar Organization က ၎င်းရဲ့ထုတ်ပြန်ချက်တွင် ဖော်ပြထားပါတယ်။ သူမအား Miss Universe Myanmar Organization မှ ချီးမြှင့်ထားတဲ့ ဆုကြေး၊ သရဖူ၊ စလွယ်နဲ့ ဆုတံဆိပ် တို့ကိုလည်း ၂၀၁၇ အောက်တိုဘာ ၁၀ ရက်နေ့ နောက်ဆုံးထားပြီး လာရောက်အပ်နှံရန်အတွက်လည်း အသိပေးထားပါတယ်။ အလှမယ် ရွှေအိမ်စည်အနေနဲ့ Miss Universe Myanmar Organization ရဲ့ထုတ်ပြန်ချက်ဟာ မှန်ကန်မှုမရှိကြောင်း ၊ ထိုအဖွဲ့အစည်းရဲ့ မှန်ကန်မှုမရှိသည့် အပြုအမူများကို သက်ဆိုင်ရာဝန်ကြီးဌာနသို့ လိပ်မူကာ အစီရင်ခံတင်ပြသွားမှာ ဖြစ်ကြောင်း၊ ပြိုင်ပွဲဝင်ရန်အတွက် ပြင်ဆင်ထားသည့် ကုန်ကျစရိတ်များအတွက် လိုအပ်ပါက ပြန်လည်တရားစွဲဆိုကာ လိုအပ်သည့် ပရဟိတအဖွဲ့အသီးသီးကို လှူဒါန်းသွားမှာဖြစ်ကြောင်း သူမရဲ့ လူမှုကွန်ရက်စာမျက်နှာမှ တဆင့် ဖော်ပြထားပါတယ်။ “အိမ်စည်နဲ့ organization ချုပ်ဆိုထားတဲ့ စာချုပ်ကို အိမ်စည့်ဖက်က မည်သည့်အချက်ကိုမှ ချိုးဖောက်ခဲ့ခြင်းမရှိသလို အပြစ်တစ်စုံတစ်ရာ ကျူးလွန်ခဲ့ခြင်းလည်း လုံးဝမရှိကြောင်း ပရိသတ်များကို အာမခံနိုင်ပါတယ်” လို့ ရွှေအိမ်စည်က သူမရဲ့လူမှုကွန်ရက်စာမျက်နှာတွင် ရေးသားထားပါတယ်။ အလှမယ် ရွှေအိမ်စည်ဟာ စက်တင်ဘာလ ၂၆ ရက်နေ့က ရခိုင်ပြည်နယ်တွင် ဖြစ်ပွားခဲ့သော အကြမ်းဖက်ကိစ္စများနဲ့ ပတ်သက်ပြီး အမှန်ကိုသိရှိစေရန်ဟုဆိုကာ အင်္ဂလိပ်စကားပြောဖြင့် ရိုက်ကူးထားတဲ့ ဗီဒီယိုဖိုင်ကို တင်ခဲ့တဲ့အတွက် ပရိသတ်တချို့က အဆိုပါ ဗီဒီယိုဖိုင်ကြောင့် အခုလို ထုတ်ပယ်ခံရခြင်းမျိုး ဖြစ်နိုင်တယ်လို့လည်း ဝေဖန် ပြောဆိုနေကြပါတယ်။ ရွှေအိမ်စည်ကို Miss Grand International 2017 သို့သွားရောက်ယှဉ်ပြိုင်စေမှုကို ရုတ်သိမ်းပြီးနောက်တွင် သူမရဲ့နေရာတွင် Miss Universe Myanmar 2013 တွင် 1st Runner Up ရရှိခဲ့တဲ့ အလှမယ် အေးချမ်းမိုးက သွားရောက်ယှဉ်ပြိုင်ရမှာ ဖြစ်တယ်လို့ သိရပါတယ်။ Miss Grand International ပြိုင်ပွဲကို ၂၀၁၃ ခုနှစ်မှ စတင်ပြီး မြန်မာနိုင်ငံကိုယ်စားပြုအနေနဲ့ အလှမယ်များ နှစ်စဉ် ဝင်ရောက်ယှဉ်ပြိုင်ခဲ့တာဖြစ်ပြီး Miss Universe Myanmar Organization အနေနဲ့ကတော့ ယခုနှစ်မှဦးစီးကာ ပြိုင်ပွဲဝင် အလှမယ်ကို ပထမဆုံးအကြိမ်အဖြစ် ပို့ဆောင်ယှဉ်ပြိုင်မှာဖြစ်ပါတယ်။ အဆိုပါ ပြိုင်ပွဲကို အောက်တိုဘာလ ၂၅ ရက်နေ့တွင် ဗီယက်နမ်နိုင်ငံတွင် ကျင်းပမှာဖြစ်ပြီး ကမ္ဘာ့နိုင်ငံအသီးသီးရှိ နိုင်ငံပေါင်း ၈ဝ ကျော်မှ အလှမယ်များ ယှဉ်ပြိုင်သွားမှာဖြစ်ပါတယ်။ ပြိုင်ပွဲရဲ့ အဓိကရည်ရွယ်ချက်ကတော့ စစ်နဲ့ငြိမ်းချမ်းရေးကို ရည်ရွယ်ပြုလုပ်ခြင်း ဖြစ်တယ်လို့ သိရပါတယ်။ The post ပြိုင်ပွဲဝင်ခါနီး သရဖူအသိမ်းခံလိုက်ရတဲ့ Miss Grand Myanmar ရွှေအိမ်စည် appeared first on ဧရာဝတီ.
Source : http://ift.tt/2xWoanT
via IFTTT