အခ်င္းခ်င္း အိမ္နီးခ်င္းေကာင္းေတြ ျဖစ္ေစခ်င္သူ ခ်င္းမိုင္က ႐ြာသူႀကီး

အချင်းချင်း အိမ်နီးချင်းကောင်းတွေ ဖြစ်စေချင်သူ ချင်းမိုင်က ရွာသူကြီး ချင်းမိုင်တွင် ရှီနာဝပ်တြာ Shinawatra (ဝန်ကြီးချုပ်ဟောင်း ဘီလီယံနာ သူဌေးကြီး သက်ဆင် Thaksin ၏ မိသားစု) ဆိုသည့် အမည်က နက်နက်ရှိုင်းရှိုင်း အမြစ်တွယ်နေသည်။ ရှီနာဝပ်တြာ ပိုးထည်က လူတိုင်းသိသည့် အမှတ်တံဆိပ်တခု ဖြစ်သည်။ လက်ရက်ထည်များကို ဒေသတွင်း လက်မှု ပစ္စည်း တခုမှနေ၍ ဒေသ၏ လုပ်ငန်းတခုအဖြစ် အသွင်ပြောင်းရာတွင် ရှေ့ဆုံးက ဦးဆောင်ခဲ့သည့် အမှတ်တံဆိပ် လည်း ဖြစ်ပါသည်။ သက်ဆင်၏ ဖခင် ဖြစ်သူ လွက် Loet က ထိုင်းပါလီမန်တွင် ချင်းမိုင် အမတ်အဖြစ် ၁၉၆၉ နှင့် ၁၉၇၆ တို့တွင် တာဝန်ယူခဲ့ သည်။ သူ၏ ဦးလေးဖြစ်သူ ဆူဂျိတ် Sujate က ချင်းမိုင် မြို့တော်ဝန် ဖြစ်ခဲ့ဖူးသည်။ ထိုင်းနိုင်ငံကို ဆယ်စုနှစ် တခုကျော် ခွဲခြားခဲ့သည်မှာ ထိုအမည် (ရှီနာဝပ်တြာ) ပင် ဖြစ်သည်။ ဗုဒ္ဓဘာသာကို ရိုသေ ကိုင်းရှိုင်းသည့် ထိုင်းနိုင်ငံတွင် သက်ဆင်ကို ထောက်ခံသည့် ရှပ်နီများနှင့် သူတို့၏ ပြိုင်ဖက် ဖြစ်သော ရှပ်ဝါများ အဖြစ် ကွဲပြားသွားခဲ့ရသည်။ အစဉ်အလာအရ သက်ဆင်၏ ခြေကုပ်စခန်းတခုဖြစ်သော ချင်းမိုင် (၂၀၁၄ ခုနှစ်တွင် The Australian သတင်းစာက ချင်းမိုင်တွင် နေထိုင်သူ ၇၀ ရာခိုင်နှုန်းခန့် က သူ့ကို ထောက်ခံသည်ဟု ခန့်မှန်းခဲ့သည်) သည် ထိုအကြောင်းကြောင့် ပင် နစ်နာခဲ့ရသည်။ ၂၀၁၄ ခုနှစ်တွင် သက်ဆင်၏ ညီမဖြစ်သူ ယင်လပ် Yingluck ထံမှ စစ်တပ်က အာဏာသိမ်းယူခဲ့ပြီးနောက်တွင် တနိုင်ငံလုံး အတိုင်းအတာဖြင့် (သက်ဆင်နှင့် နီးစပ်သူများကို) ရှင်းလင်းဖယ်ရှားမှုများ ပြုလုပ်ရာတွင် ပြည်နယ် အုပ်ချုပ်ရေးမှူးကို ထိုင်းနိုင်ငံ အလယ်ပိုင်းသို့ ရွှေ့ပြောင်းပစ်ခဲ့ပြီး ချင်းမိုင် ရဲတပ်ဖွဲ့ အကြီးအကဲကိုလည်း တခြားရာထူး နေရာတခုသို့ ပြောင်းရွှေ့ပစ်ခဲ့သည်ကို တွေ့ရသည်။ ကွဲပြားမှုက ကျေးရွာ အဆင့်အထိပင် ရောက်ရှိခဲ့သည်။ မူဆုံ Mu Song ကျေးရွာမှ ရွာလူကြီး ဖြစ်သည့် အသက် ၅၅ နှစ်အရွယ် ဘွန်ထဝီ Boonthawee အနေဖြင့် ထိုကဲ့သို့သော ကွဲပြားမှုများကို နေ့စဉ် ဖြေရှင်းနေရသည်။ “ဒီရွာက လူ ၁၂၀၀ အတွက် ကျနော် အလုပ်လုပ်လာတာ အခုဆိုရင် ၁၁ နှစ်ရှိပါပြီ။ ရာဇဝတ်မှု၊ မူးယစ်ဆေး၊ တရား မဝင် ရွှေ့ပြောင်း အခြေချတာ၊ အရက်မူးပြီး ရန်ဖြစ်တာ မီးလောင်တာ အစရှိတဲ့ ပြဿနာမျိုးတွေ အားလုံးကို ကိုင်တွယ်ခဲ့ရပါတယ်။ ဒါပေမယ့် အခုအချိန် အထိ အခက်ခဲဆုံး ဖြစ်နေတာကတော့ နိုင်ငံရေးအရ ကွဲပြားတာကို တံတားထိုးပေးဖို့ပါပဲ။” ရုံးအလုပ်သမားတဦး နှင့် ထီသည်တဦးတို့မှ ချင်းမိုင်တွင် မွေးဖွားခဲ့သည့် ဘွန်ထဝီက ဆန်စပါး စိုက်ပျိုးသည့် အသိုင်းအဝိုင်း တခု အဖြစ်မှ ဆင်ခြေဖုံး တခုအဖြစ်သို့ ရွာ ပြောင်းလဲသွားသည်ကို မြင်တွေ့ခဲ့ရသည်။ င်းမိုင်တွင် ရှီနာဝပ်တြာ (ဝန်ကြီးချုပ်ဟောင်း သက်ဆင်၏ မိသားစု) အမည်က နက်နက်ရှိုင်းရှိုင်း အမြစ်တွယ်နေသည် “ကျနော် ငယ်ငယ်တုန်းက ကျနော့် အမေက အပိုဝင်ငွေရဖို့ စပါးနဲ့ ဟင်းသီးဟင်းရွက်တွေ စိုက်တာကို ကူညီပေးရတယ်။ မနက်ပိုင်းမှာ ဆိုရင် ဘုန်းကြီးကျောင်းမှာ ရှိတဲ့ ကျောင်းကို သွားရတယ်။ ပြီးရင် သူ ဈေးရောင်းတာကို ကျနော်က ဝိုင်းကူရတယ်။” အလယ်တန်း အောင်မြင်ပြီးသောအခါ ဘွန်ထဝီက နယ်လှည့်ဈေးရောင်းသူ ဖြစ်လာသည်။ ထို့နောက် ထိုင်း-မြန်မာ နယ်စပ်တွင် အစောင့်တပ်ဖွဲ့ဝင် တဦး ဖြစ်လာသည်။ ချင်းမိုင်နှင့် ဝေးရာတွင် ၁၇ နှစ်ကြာခဲ့ပြီး နောက်ဆုံးတွင် သူ ပြန်ရောက်လာ၍ လက်ထောက် ကျေးရွာလူကြီး အဖြစ် စတင် တာဝန်ယူခဲ့သည်။ “အလွန်ကွဲပြားခြားနားနေတဲ့ ချင်းမိုင်ကို ကျနော် ပြန်ရောက်လာတာပါ။ အခုအချိန်မှာ လူအများစုက ဝန်ဆောင်မှု လုပ်ငန်းတွေမှာ အလုပ်လုပ်နေကြတယ်။ ကျနော်တို့ရဲ့ အသက်မွေးဝမ်းကျောင်းတွေက နိုင်ငံခြားသားတွေနဲ့ ကမ္ဘာလှည့် ခရီးသည်တွေ အပေါ်မှာ မှီခိုနေကြရတယ်။ ကျနော့် ဇနီးက နိုင်ငံခြားသားတွေကို ထိုင်းစကား သင်ပေးတယ်။ ကျနော့် အိမ်နီးချင်းက ဟိုတယ်မှာ ဒရိုင်ဘာ လုပ်တယ်။” “နေထိုင်တဲ့ သူတွေကလည်း ပြောင်းသွားတယ်။ ပြီးခဲ့တဲ့ ဆယ်စုနှစ်ထဲမှာ ထိုင်းနိုင်ငံ တခြားနေရာက လူတွေနဲ့ မြန်မာ နိုင်ငံက လူတွေ ရွှေ့ပြောင်းရောက်လာကြတယ်။ ဒီမှာနေတဲ့ သူတွေရဲ့ တဝက်လောက်က မူလကထဲက ဒီမှာ နေတဲ့ သူတွေ မဟုတ်တော့ဘူး။” “မြန်မာ အများစုက ဆောက်လုပ်ရေး လုပ်ငန်းတွေမှာ အလုပ်လုပ်ဖို့ ဒီကို လာကြတယ်။ တခါတလေကျရင် ပိုက်ဆံ ချွေတာတဲ့ အနေနဲ့ အိပ်ခန်း တခန်းထဲမှာ လူ ၈ ယောက်လောက် အထိ နေကြတယ်။” “အစိုးရက သူတို့ကို အများကြီးကူညီပါတယ်။ သူတို့ကို မှတ်ပုံတင် စာရင်းသွင်းပေးတယ်။ သူတို့ ကျန်းမာရေး စောင့် ရှောက်မှုတွေရတယ်။ သူတို့ကလေးတွေ ကျောင်းတက်နိုင်တယ်။ အားလုံးက ထိုင်း အခွန်ထမ်းတွေရဲ့ ငွေတွေနဲ့ပါ။ ဗုဒ္ဓ ဘာသာဝင် အနေနဲ့ ကူညီရတာ ကျနော်တို့ ပျော်ပါတယ်။ ဒါပေမယ့် ထိုင်း အသိုင်းအဝိုင်း အပေါ်မှာတော့ ဖိအားတွေ ရှိလာတယ်။” လူဦးရေဆိုင်ရာ နှင့် စီးပွားရေးဆိုင်ရာ အကြောင်းရင်းများက ချင်းမိုင်အပေါ် ကြီးမားသော ဖိအားများ ရှိလာစေခြင်းကို ခံစား၍ ရနိုင်ပါသည်။ “အဲဒါက မလွယ်ဘူး။ တခါတလေကျရင် ပဋိပက္ခ အဖြစ် ပြောင်းသွားတယ်။ လူတွေက အလွန် စိတ်ပျက်လာကြတော့ ကျေးရွာလူကြီး တယောက်အနေနဲ့ ကျနော်က စေ့စပ်ဖြေရှင်းပေးရဖို့ ဖြစ်လာတယ်။” ရွာအတွင်းတွင် လျှောက်သွားရင်း အိမ်တိုင်းတွင် နေထိုင်သူများ၏ အမည်များ နှင့် သူတို့ ဘဝအသေးစိတ်ကို ဘွန်ထဝီက ရှင်းပြနိုင်ပါသည်။ သူက သူ့ရွာ အကြောင်းကို နောကျေအောင် သိသူဖြစ်သည်။ သူတို့၏ နေ့စဉ် စိုးရိမ်မှုများနှင့် ထိတွေ့နိုင်ရန်လည်း ဂရုစိုက်သည်။ မူဆုံ Mu Song ကျေးရွာမှ ရွာလူကြီး ဖြစ်သည့် အသက် ၅၅ နှစ်အရွယ် ဘွန်ထဝီ/ Karim Raslan “တကယ်လို့ မီးလောင်တယ်။ ရန်ဖြစ်တယ် သို့မဟုတ် အနှောက်အယှက် ရှိတယ်ဆိုရင် ရွာသားတွေက အာဏာပိုင် တွေကို အကြောင်း မကြားခင် ကျနော့်ကို ခေါ်ကြတယ်။ ကျနော်က လူတိုင်းထက် ပိုပြီး မြန်မြန်ဆန်ဆန် တုန့်ပြန် လိမ့်မယ်၊ ကျနော်က အမြဲတမ်း အသင့်ရှိတယ်ဆိုတာ သူတို့ သိကြတယ်။ ဒါကြောင့် ကျနော်က တယ်လီဖုန်းဘေးမှာ အိပ်ရတယ်။ ဖုန်းကိုလည်း အသံအကျယ်ကြီး မြည်အောင် အမြဲလုပ်ထားရတယ်။” ကျေးရွာတွင် နေထိုင်သူတို့၏ နေ့စဉ်ဘဝ နှင့် ထိတွေ့ ပတ်သက်နေရသည့် ကျေးရွာ အာဏာပိုင်တဦး အနေဖြင့် သက်ဆင်နှင့် ထိုင်းနိုင်ငံ မြောက်ပိုင်းအပေါ် သက်ဆင်၏ ထိန်းချုပ်နိုင်မှု မည်သို့ထင်သနည်းဟု သူ့ကို ကျနော် မေးကြည့် မိပါသည်။ ဘွန်ထဝီက မေးခွန်းကို ရှောင်လွှဲခဲ့ပါသည်။ သူ့တာဝန် အကြောင်းကိုသာ ပြောသည်။ “ကျေးရွာ လူကြီးတယောက် အနေနဲ့ ကျနော့် တာဝန်က အသိုင်းအဝိုင်းကို အတူတကွ ရှိစေဖို့ပါ။ ခွဲခြားပစ်ဖို့ မဟုတ်ပါဘူး။ ရှပ်နီ ဖြစ်စေ ရှပ်ဝါ ဖြစ်စေ ကျနော်တို့ အားလုံး နေနိုင်ဖို့ လိုပါတယ်။ ကျနော့်ရဲ့ နိုင်ငံရေး အယူအဆက ကျနော့်ရဲ့ ကိုယ်ပိုင် ဆုံးဖြတ်ချက်ကို အရောင်ဆိုးခွင့် မပြုနိုင်ပါဘူး။ ကျနော့်ရဲ့ အသိုင်းအဝိုင်းကို ကွဲပြားသွားအောင် လုပ်သလို ဖြစ်သွားပါလိမ့်မယ်။ သူတို့ကို အလုပ်အကျွေးပြုရမယ့် ကျနော့် စွမ်းဆောင်မှုကို ထိခိုက်စေပါလိမ့်မယ်။” “အစိုးရက အမိန့်တွေ ထုတ်နိုင်တယ်။ ဒါပေမယ့် အကောင်အထည် ဖော်ရတာက ကျနော့် တာဝန်ဖြစ်ပါတယ်။ ကျေးရွာလူကြီးတွေက ဒေသခံအသိုင်းအဝိုင်းထဲမှာ ရှိနေဆဲ သူတွေပါ။ မူဝါဒတွေ လက်တွေ့ဖြစ်အောင်လုပ်ဖို့ လိုအပ်တဲ့ ဆက်ဆံရေးတွေ ရှိကြပါတယ်။” “ကျနော်တို့နိုင်ငံက ပြီးခဲ့တဲ့ ၁၀ နှစ်အတွင်းမှာ တယောက်နဲ့ တယောက် ငြင်းခုန်တာက လွဲရင် ဘာမှ မဖြစ်ခဲ့ပါဘူး။ ကျနော်နဲ့ ခင်ဗျား သဘောမတူညီမှုတွေ ရှိနိုင်တယ် ဒါပေမယ့် နောက်ဆုံးမှာတော့ ကျနော်တို့က အိမ်နီးချင်းတွေ ဖြစ်နေတုန်းပဲ ဆိုတဲ့ ဒီကျေးရွာရဲ့ ဆက်ဆံရေးက ပျက်စီးသွားခဲ့တယ်။” မည်သို့ပင် ဖြစ်စေ လျှို့ဝှက်တတ်ပုံရသော ဘွန်ထဝီက သူ့တွင် နိုင်ငံရေး ရည်မှန်းချက်ရှိကြောင်း ကျနော့်ကို ထုတ်ဖော်ပြောဆိုခဲ့သည်။ “နောက် ၅ နှစ်ဆိုရင် ကျနော် အသက် ၆၀ ပြည့်ပြီ။ ကျနော် ကျေးရွာကောင်စီကနေ အနားယူမယ်။ အဲဒီအခါကျရင် ကျနော် ခရိုင်ခွဲ အဆင့်မှာ ဝင်ပြီး ယှဉ်ပြိုင်ချင်တယ်။ ပိုကြီးတဲ့ ပလက်ဖောင်းတခုကနေ ကွဲပြားတာတခု လုပ်ဖို့ ကြိုးစားချင်တယ်။” ဟုတ်ပါသည်။ ရွေးကောက်ပွဲတွင် ဝင်ရောက်ယှဉ်ပြိုင်ခြင်းက နိုင်ငံရေးပါတီတခုကို ကိုယ်စားပြုခြင်း ဖြစ်လာပါလိမ့် မည်။ မူဝါဒ အဖြေများအတွက် တောင်းဆို လှုပ်ရှားခြင်း ဖြစ်လာပါလိမ့်မည်။ “ကျနော့်မှာ ကျနော့်အမြင်တွေ၊ အယူအဆတွေ ရှိတယ်။ ဒါပေမယ့် စောင့်တာက အကောင်းဆုံးပဲလို့ ကျနော် ထင်တယ်။ အားလုံးက အခုထိ မသေချာသေးဘူး။ ဆုံးဖြတ်ချက်ချဖို့နဲ့ ဖြစ်ချင်မှ ဖြစ်လာမယ့် အရာကို ထုတ်ကြေညာဖို့ အကြောင်းမရှိသေးပါဘူး။” တချိန်က လယ်ကွင်းတွေက အခု မြို့ဆင်ခြေဖုံး/ Karim Raslan အထွေထွေရွေးကောက်ပွဲကို ၂၀၁၈ ခုနှစ် နိုဝင်ဘာလတွင် ပြုလုပ်ရန် စီစဉ်ထားပါသည်။ ၂၀၁၄ ခုနှစ်တွင် စစ်တပ်က အာဏာသိမ်းယူလိုက်ပြီးနောက် ဝန်ကြီးချုပ် ဖြစ်လာသည့် ဗိုလ်ချုပ်ကြီးဟောင်း ပရာရွတ် ချန်အုံချာ Prayut Chan-o-cha က ရွေးကောက်ပွဲများကို ၂၀၁၅ ခုနှစ် အစောပိုင်းတွင် ကျင်းပမည် ဖြစ်ကြောင်း ပြောကြားခဲ့သည်။ ထို့နောက် ၂၀၁၆ ခုနှစ်သို့ ရွှေ့ဆိုင်းခဲ့ပြီး လက်ရှိအချိန်တွင်မူ နောက်လာမည့်နှစ်တွင် ပြုလုပ်မည်ဟု သိရသည်။ ရွေးကောက်ပွဲက အမှန်တကယ်ဖြစ်လာပါမည်လား။ ဘွန်ထဝီကတော့ အကောင်းမြင်တတ်သူ ဖြစ်သည်။ “သူတို့ ကျင်းပပေးမယ်လို့ ကျနော် ယုံကြည်ပါတယ်။ ဖြေးဖြေးချင်းပေါ့။ ထိုင်းနိုင်ငံက ကွဲပြားမှုတွေကို ကုသနေရပါ တယ်။ ရန်ဖြစ်ရတာကြောင့် လူတိုင်းလည်း အရမ်း ပင်ပန်းနေမယ်လို့ ကျနော်ထင်ပါတယ်။ ကျနော်တို့တွေ ရှေ့ကိုဆက် သွားချင်တဲ့ စိတ်ဓာတ်တခု ရှိပါတယ်။ ဘုရင် အသစ်နဲ့ အတူ ထိုင်းနိုင်ငံရေးမှာ ခေတ်သစ်တခု ဖြစ်ရမယ့် အချိန်ပါ။” “ကျနော် တွန်း Toon (ရော့ခ်တီးဝိုင်း တခုဖြစ်သည့် Bodyslam ၏ ခေါင်းဆောင် အဆိုတော်) လိုမျိုး လူတွေကို ကြည့်တယ်။ သူက အခုဆိုရင် ဆေးရုံတွေကို ငွေကြေးထောက်ပံ့ဖို့ တိုင်းပြည်ကို ဖြတ်ပြီး ၂၁၉၂ ကီလိုမီတာ ပြေးနေတယ်။ သူက စည်းလုံးညီညွတ်မှုအတွက် သင်္ကေတပါ။ ထိုင်းနိုင်ငံမှာ သူလိုလူမျိုးတွေ ပိုပြီး ရှိဖို့လိုပါတယ်။” ထိုင်းနိုင်ငံ၏ နိုင်ငံရေးတွင် သူ၏ အိပ်မက်က မည်သို့ရှိသနည်းဟု ကျနော်မေးကြည့်ပါသည်။ စီးပွားရေး ပြန်လည်ဖွံ့ဖြိုး ရေးလား။ ထိုင်းနိုင်ငံက ဒေသတွင်း ခေါင်းဆောင် ဖြစ်လာရေးလား။ ကျေးလက်ဒေသမှ ဆင်းရဲနွမ်းပါးသူများ၏ ဘဝကို မြှင့်တင်ပေးရေး လား။ ငြီးငွေ့မှုတပိုင်း မျှော်လင့်မှုတပိုင်း ပါသော အပြုံးတခုဖြင့် သူက ဖြေသည်။ “ထိုင်းပြည်သူတွေ တယောက်နဲ့ တယောက် အိမ်နီးချင်းကောင်းတွေ ဖြစ်နေတာကို ကျနော် လိုချင်ပါတယ်။” (ကာရင်ရတ်စလန်သည် အာဆီယံရေးရာများကို အထူးပြုလေ့လာရေးသားနေသူ မလေးရှား စာရေးဆရာတဦး ဖြစ်သည်။ ကွာလာလမ်ပူ အခြေစိုက် အကြံပေးအဖွဲ့ Ceritalah ASEAN ကို တည်ထောင်သူ အမှုဆောင်အရာရှိချုပ်လည်း ဖြစ်သည်။) The post အချင်းချင်း အိမ်နီးချင်းကောင်းတွေ ဖြစ်စေချင်သူ ချင်းမိုင်က ရွာသူကြီး appeared first on ဧရာဝတီ.
Source : http://ift.tt/2zvqWxo
via IFTTT