Eleven Media Group

မျိုးချစ်ညီညွတ်ရေးပါတီ တည်ထောင်ခွင့် ပယ်ချမှုအပေါ် အချက်အလက် အတိအကျပေးရန် ပြည်ထောင်စု ရွေးကောက်ပွဲကော်မရှင်အား ပါတီတည်ထောင်သူများက ပြန်လည်မေးမြန်းမည် မျိုးချစ်ညီညွတ်ရေးပါတီ တည်ထောင်ခွင့် ပယ်ချမှုအပေါ် အချက်အလက် အတိအကျပေးရန် ပြည်ထောင်စုရွေးကောက်ပွဲကော်မရှင်အား ပြန်လည်မေးမြန်းမည်ဖြစ်ကြောင်း ပါတီတည်ထောင်ရာတွင် ဦးဆောင်ပါဝင်သည့် မောင်သွေးချွန် (ခ) ဦးမြင့်စိုးက ဒီဇင်ဘာ ၆ ရက်တွင် ပြောကြားသည်။ မဘသအဖွဲ့ဝင်ဟောင်းများ ပါဝင်တည်ထောင်သည့် မျိုးချစ်ညီညွတ်ရေးပါတီကို တည်ထောင်ခွင့်မပြုကြောင်းအား ပြည်ထောင်စုရွေးကောက်ပွဲကော်မရှင်က နိုဝင်ဘာ ၂၄ ရက် ရက်စွဲဖြင့် ပေးပို့ခဲ့ခြင်းပြီး နိုဝင်ဘာ ၂၇ ရက်က လက်ခံရရှိခဲ့ကြောင်း မောင်သွေးချွန်က ပြောကြားသည်။ ပြည်ထောင်စု ရွေးကောက်ပွဲ ကော်မရှင်၏ အကြောင်းကြားစာတွင် ပါတီတည်ထောင်လိုသူများထဲမှ ပုဂ္ဂိုလ်အချို့သည် နိုင်ငံရေးပါတီများ မှတ်ပုံတင်ခြင်းဥပဒေနှင့် မညီညွတ်ပါသဖြင့် အကြောင်းပြထားကြောင်း ၎င်းက ဆိုသည်။ မျိုးချစ်ညီညွတ်ရေးပါတီ တည်ထောင်ခွင့်အား ဩဂုတ် ၂ ရက်တွင် လျှောက်ထားခဲ့ပြီး တည်ထောင်သူ ၂၁ ဦးပါဝင်ခဲ့ကြောင်း၊ သို့သော် ၂၁ ဦးထဲမှ နှစ်ဦးသည် ဩဂုတ် ၅ ရက်တွင် မန္တလေး၌ အစိုးရဖြုတ်ချရေး သပိတ်စခန်းကို သွားခဲ့သည့်အတွက် ပုဒ်မ ၅၀၅ (ခ) ဖြင့် ဖမ်းဝရမ်းထုတ်ခံခဲ့ရကြောင်း၊ ထို့ကြောင့် ပါတီတည်ထောင်သူများ အမည်စာရင်းမှ အဆိုပါနှစ်ဦးအား ပယ်ဖျက်ပေးပါရန် ဩဂုတ် ၉ ရက်တွင် ပြည်ထောင်စုရွေးကောက်ပွဲကော်မရှင်အား တင်ပြခဲ့သဖြင့် တည်ထောင်သူ ၁၉ ဦးသာ ရှိတော့သဖြင့် မည်သည့်ပုဂ္ဂိုလ်ကို ရည်ညွှန်းသည်၊ မည်သည့် ဥပဒေပုဒ်မများနှင့် မညီသည်ကို အချက်အလက် အတိအကျပေးရန် ပြန်လည်မေးမြန်းမည်ဖြစ်ကြောင်း မောင်သွေးချွန်က ပြောကြားသည်။ “ကျွန်တော်တို့ ဆက်လုပ်ဖို့ကတော့ ကျွန်တော်တို့ အစည်းအဝေး ထိုင်ပြီးပြီပေါ့ဗျာ။ အစည်းအဝေးဆုံးဖြတ်ချက်အရ ကျွန်တော်တို့ထဲမှာပါဝင်တဲ့ တင်ထားတဲ့ပုဂ္ဂိုလ် ၁၉ ဦး ထဲမှာ ဘယ်ပုဂ္ဂိုလ်သည် ဥပဒေနဲ့ ငြိစွန်းနေသလဲ။ အဲဒါကို ကျွန်တော်တို့ကိုအကြောင်းပြန်ပါ။ နံပါတ်နှစ်ကတော့ ရွေးကောက်ပွဲကော်မရှင်ရဲ့ ဥပဒေနဲ့ ငြိတယ်ဆိုရင် ဘယ်အချက်တွေနဲ့ငြိသလဲ။ အဲဒီငြိစွန်းတဲ့ ဥပဒေအကြောင်းအရာတွေကို ကျွန်တော်တို့ကို အကြောင်းပြန်ရမယ်။ နံပါတ်သုံးအချက်က အဲဒီငြိစွန်းတဲ့ပုဂ္ဂိုလ်တွေရဲ့နေရာမှာ လူစားထိုးပြီးတော့ ကျွန်တော်တို့ မျိုးချစ်ညီညွတ်ရေး ပါတီကို ကျွန်တော်တို့ထပ်မံပြီးတော့ တည်ထောင်ခွင့် ရှိ မရှိ ဒီသုံးချက်ကို အမြန်ဆုံး အကြောင်းပြန်ပါရန် ကျွန်တော်တို့ အခုမနက်ဖြန် သန်ဘက်ခါပဲ အဲဒီစာကိုပို့တော့မယ်”ဟု မောင်သွေးချွန်က ပြောကြားသည်။ မျိုးချစ် ညီညွတ်ရေးပါတီ တည်ထောင်သူများထဲတွင် ယခင် အမျိုးဘာသာ သာသနာ စောင့်ရှောက်ရေးအဖွဲ့ဝင်ဟောင်းများ၊ ၇၄၊ ၇၅ မျိုးဆက်နိုင်ငံရေးအကျဉ်းသားဟောင်းများ၊ တရားလွှတ်တော်ရှေ့နေများ၊ အမျိုးသားရေး တက်ကြွ လှုပ်ရှားသူများ ပါဝင်ကြောင်းသိရသည်။ “မဘသထဲက ပါသင့်သလောက်ပါတယ်။ ကျွန်တော်ကိုယ်တိုင်လည်း အရင်က မဘသ၊ နောက် ဝံသာနုဥက္ကဋ္ဌလေ။ အဲဒါတွေက ကျွန်တော်တို့က ဒီပါတီတည်ထောင်ချင်တဲ့အတွက် တရားဝင်နုတ်ထွက်ခဲ့ပြီ။ သူတို့ မဘသနဲ့ ဝံသာနုကိုလည်း မထိခိုက်စေချင်ဘူး။ ပါတီကိုလည်း မထိခိုက်စေချင်ဘူး။ ကင်း ကင်းရှင်းရှင်းဖြစ်အောင် နုတ်ထွက်ပြီးသားပါ” ဟု မောင်သွေးချွန်က ဆိုသည်။ ယခုကဲ့သို့ ပါတီတည်ထောင်ခွင့် ပယ်ချခြင်းသည် အမျိုးသားရေး ဖိနှိပ်မှုတစ်ရပ်ဖြစ်ကြောင်း၊ ဒီမိုကရေစီစံချိန်စံညွှန်းနှင့်လည်း မညီညွတ်ကြောင်း၊ အကြောင်းပြချက်သည်လည်း မခိုင်လုံကြောင်း ၎င်းက ဆိုသည်။ “အခုလက်ရှိမှာ တရားဝင်ပါတီပေါင်း ၉၀ ကျော် ရပ်တည်နေတယ်။ မှတ်ပုံတင်ချပြီးသား။ အဲဒီပါတီပေါင်း ၉၀ ကျော်သည် ဦးသန်းရွှေခေတ်။ ဦးသိန်းစိန်အစိုးရခေတ်မှာ ချပေးတဲ့ပါတီတွေက အများစုပဲ။ ဒီမိုကရေစီ အစိုးရလို့ပြောနေတဲ့ ဒီနေ့ခေတ်မှာ ပါတီတည်ထောင်ခြင်းကိုကြောက်နေရသလဲ။ ဘာဖြစ်လို့ နှိပ်ကွပ်နေရသလဲ။ အဲဒီလို ကျွန်တော်တို့က ပြန်ပြီးတော့ မေးချင်တယ်။ အမျိုးသားရေးမို့လို့ မချပေးတာလား။ အမျိုးသားရေးဟာ NLD ရဲ့ရန်သူလား အဲဒီလိုသုံးသပ်မိတယ်။ အဲဒီလိုမေးခွန်းထုတ်ရမယ်။ ကျွန်တော်တို့ ပါတီဖွဲ့စည်းတာ NLD အစိုးရကို ဆန့်ကျင်ဖို့ လည်းမဟုတ်ဘူး။ တခြားသောပါတီတွေကို တိုက်ခိုက်ဖို့လည်းမဟုတ်ဘူး။ အမျိုးသားရေး အကျိုးစီးပွားနဲ့ပတ်သက်လာရင် တူညီတဲ့ အနေအထားတွေပေါ့။ ဥပမာ ဘင်္ဂါလီကိစ္စ၊ ရခိုင်ဆိုရင် NLD နဲ့တူညီတာရှိရင် ကျွန်တော်တို့ပေါင်းပြီး ဆောင်ရွက်မှာပဲ။ သူ့ကို လုံးလုံးကြီး ဆန့်ကျင်ဖို့မဟုတ်ဘူး။ သူမကောင်းတာရှိရင် ထောက်ပြရမှာပေါ့ဗျာ” ဟု မောင်သွေးချွန်က ပြောကြားသည်။ အမျိုးဘာသာသာသနာ စောင့်ရှောက်ရေးအဖွဲ့သည် တရားမဝင်ဖွဲ့စည်းထားသော အဖွဲ့အစည်းသာဖြစ်ကြောင်း ဆုံးဖြတ်ထားပြီး ဖြစ်သောကြောင့် အမျိုးဘာသာ သာသနာ စောင့်ရှောက်ရေးအဖွဲ့ (မဘသ) အမည်ခံ ပုဂ္ဂိုလ်များသည် တစ်ဦးချင်းဖြစ်စေ၊ အဖွဲ့လိုက်ဖြစ်စေ (မဘသ) အမည်သုံးစွဲလျက် မည်သည့်အမှုကိစ္စကိုမျှ ဆောင်ရွက်ခြင်းမပြုရန်နှင့် မြန်မာပြည်အနှံ့အပြား စိုက်ထူထား သော အမျိုးဘာသာသာသနာ စောင့်ရှောက်ရေး (မဘသ) အဖွဲ့ဆိုင်းဘုတ်များကို အပြီးတိုင်ဖြုတ်သိမ်းရန် ၂၀၁၇ ခုနှစ် မေ ၂၃ ရက် တွင် ကျင်းပသော သတ္တမအကြိမ် နိုင်ငံတော် သံဃမဟာနာယကအဖွဲ့ (၄၇) ပါးစုံညီ ပဉ္စမ အထူးအစည်းအဝေးတွင် ဆုံးဖြတ်ခဲ့သည်။ writer: ကျော်ဇင်ဝင်း
Source : http://ift.tt/2kxeBXS
via IFTTT