ဒီမိုကရေစီ ထွန်းကားလာပါက နိုင်ငံပိုင် သတင်းစာ ပျောက်ကွယ်နိုင်ဟု ပြန်ကြားရေး ဒု ဝန်ကြီး ပြော မြန်မာနိုင်ငံတွင် ဒီမိုကရေစီ စနစ်ထွန်းကားလာပါက နိုင်ငံပိုင်သတင်းစာများ ပျောက်ကွယ်သွားနိုင်ပြီး ပုဂ္ဂလိက မီဒီယာ အားကောင်း လာနိုင်ကြောင်း ပြန်ကြားရေး ဝန်ကြီးဌာနမှ ဒုဝန်ကြီး ဦးအောင်လှထွန်း က ပြောသည်။ ဇန်နဝါရီလ ၂၉ရက်၌ ကျင်းပသည့် အမျိုးသား လွှတ်တော် သတ္တမ ပုံမှန် အစည်းအဝေး အဋ္ဌမနေ့ အပြီးတွင် သတင်း ထောက်များ၏ မေးမြန်းမှုကို ထိုသို့ ပြန်လည် ပြောကြားခြင်း ဖြစ်သည်။ ဦးအောင်လှထွန်းက “ရေရှည်မှာတော့ အဲဒီလိုဖြစ်သင့်တာပေါ့။ နိုင်ငံပိုင် သတင်းစာ ဆိုတာလည်း ရှိချင်မှလည်း ရှိသင့် တာပေါ့၊ တကယ့်ကို ဒီမိုကရေစီ ထွန်းကားလာရင်လေ။ ပုဂ္ဂလိက မီဒီယာကလည်း နုနယ်နေသေးတယ်။ ပုဂ္ဂလိက သတင်းစာ ဆိုတာ ၃ နှစ်သားပဲ ရှိသေးတယ်” ဟု ပြောသည်။ ယခု အချိန်တွင် နိုင်ငံပိုင် သတင်းစာရော၊ ပုဂ္ဂလိက သတင်းစာကိုပါ မျှပြီး လုပ်ရမည့် အခြေအနေဖြစ်ကြောင်း၊ ဒီမိုကရေစီ လူ့ဘောင်တခုတွင် နိုင်ငံ၏ ဇာတ်ကြောင်း (Narrative) ကို ကမ္ဘာကို တင်ပြနိုင်ခြင်းသည် ပုဂ္ဂလိက မီဒီယာသာ ဖြစ်သဖြင့် ပုဂ္ဂလိကမီဒီယာ အားကောင်းရန် အရေးကြီးကြောင်းလည်း ၎င်း က ပြောဆိုသည်။ ဆက်လက်၍ “ပုဂ္ဂလိက သတင်းစာတွေ ပိုပြီးတေ့ာ လွတ်လွတ်လပ်လပ် အခက်အခဲမရှိ ရှင်သန်နိုင်အောင်လို့ အားပေးရမယ်။ နိုင်ငံပိုင် သတင်းစာကိုလည်း ပိုပြီးတေ့ာ ထက်မြက်အောင် လုပ်ရမယ်”ဟု ပြောသည်။ ပုဂ္ဂလိက မီဒီယာ အများစုသည်လည်း မြန်မာ ဘာသာ တခုတည်းဖြင့် ထွက်ရှိနေခြင်းကြောင့် နိုင်ငံတကာ ဘာသာနှင့် လည်း ထွက်ရှိရန် လိုအပ်လျက်ရှိကြောင်း ဦးအောင်လှထွန်းက ဆိုသည်။ မန္တလေးမြို့ အခြေစိုက် မန္တလေး သတင်းစာ ပညာကျောင်းမှ ကျောင်းတာဝန်ခံ တဦးဖြစ်သူ ဦးစန်းယုကျော်က “မီဒီယာ အသိုင်းအဝိုင်းက လာတဲ့ ဝန်ကြီးတွေ၊ ဒုဝန်ကြီးတွေ ဦးဆောင်နေတဲ့ ပြန်ကြားရေး ဝန်ကြီးဌာန အနေနဲ့ ပုဂ္ဂလိက မီဒီယာ ဖွံ့ဖြိုးရေးကို တကယ် လုပ်ပေးချင်တယ်ဆိုရင် လုပ်ပေးလို့ ရတဲ့ အပိုင်းကနေ စလုပ်ပေးပါ။ သူတို့ လုပ်ပေးလို့ ရတဲ့ အပိုင်း တွေ အများကြီး ရှိပါတယ်”ဟု ပြောသည်။ မြန်မာနိုင်ငံ၌ အစိုးရ သတင်းစာ လုံးဝမရှိသင့်ဟု မဆိုလိုကြောင်း မြန်မာ့ အလင်းနှင့် ကြေးမုံ သတင်းစာ၂ စောင်လုံး တွင် မျက်နှာဖုံးနှင့် နောက်ကျော၊ အာဘော် မှအစ အားလုံး တူညီနေသဖြင့် တစောင်ကို ရပ်နား၍ ရနိုင်ကြောင်း ၎င်းက ပြောဆိုသည်။ ထို့ပြင် နိုင်ငံပိုင် သတင်းစာများကို ပုဂ္ဂလိကနှင့် ပူးပေါင်းလုပ်မည်ဆိုပါက အစိုးရအာဘော်များ လျော့ကျလာနိုင်ကာ ပြန်ကြားရေး ဝန်ကြီးဌာန အနေနှင့် ယခုအချိန်ကတည်းက အစီအစဉ်တကျ ချမှတ်လုပ်သင့်ကြောင်းလည်း ဦးစန်းယုကျော် က ပြောသည်။ ပြည်သူလူထုက နိုင်ငံပိုင် သတင်းစာမှ ကြေညာချက်၊ ထုတ်ပြန်ချက် များကိုသာ အတည်ပြု မှတ်ချက်ယူသည့် အလေ့အထ သည်လည်း ယနေ့အထိ အရိုးစွဲနေသေးသည်ဟု ဆိုသည်။ မြန်မာနိုင်ငံ သတင်းမီဒီယာ ကောင်စီဝင် ဦးမြင့်ကျော်က “သတင်းစာတွေရဲ့ အခန်းကဏ္ဍ အရေးကြီး တယ်ဆိုတဲ့ ဟာကို ထည့်သွင်း စဉ်းစားပြီး မူဝါဒကို ထိန်းညှိပေးရမှာက အစိုးရရဲ့ အလုပ်လို့ ကျနော် မြင်တယ်။ ကိုယ့်ဟာကိုယ် မရပ်တည် နိုင်လို့ ရပ်ပေါ့ ဆိုတာမျိုးကတော့ အစိုးရတရပ်က သတင်း မီဒီယာရဲ့ အခန်းကဏ္ဍကို နားမလည်နိုင်ရာ ကျတယ်” ဟု ဧရာဝတီသို့ ပြောသည်။ နိုင်ငံပိုင် မီဒီယာများသည် ပုဂ္ဂလိက မီဒီယာများနှင့် ပြိုင်ဖက် ဖြစ်နေခြင်းသည် ကြီးမားသည့် အချက် တခုဖြစ်နေ ကြောင်း၊ နိုင်ငံတော် ဘတ်ဂျက်ဖြင့် ရပ်တည်နေသည့် အတွက် ရပ်တန့်သွားမည် မဟုတ်ကြောင်းလည်း ဦးမြင့်ကျော် က ပြောဆိုသည်။ ၂၀၁၃ ခုနှစ် ဧပြီ ၁ရက်မှစ၍ ပုဂ္ဂလိက သတင်းစာ ထုတ်ဝေခွင့်ပြုခဲ့ပြီး လက်ရှိအချိန်တွင် ဂျာနယ် ပေါင်း ၁၅၀ ခန့် နှင့် သတင်းစာ ပေါင်း ၁၀ စောင်ခန့် ရှိသည်ဟု သိရသည်။ The post ဒီမိုကရေစီ ထွန်းကားလာပါက နိုင်ငံပိုင် သတင်းစာ ပျောက်ကွယ်နိုင်ဟု ပြန်ကြားရေး ဒု ဝန်ကြီး ပြော appeared first on ဧရာဝတီ.
Source : http://ift.tt/2Eo8omS
via IFTTT
No comments:
Post a Comment