ဥပေဒ အက်ိဳးေဆာင္ကေန ငန္း႐ိုင္းတို႔ သခင္ ျဖစ္လာသူ ေဂ်ဆင္လီဗီယန္

ဥပဒေ အကျိုးဆောင်ကနေ ငန်းရိုင်းတို့ သခင် ဖြစ်လာသူ ဂျေဆင်လီဗီယန် ဂျေဆင်လီဗီယန် (Jason Levien)က ဆွမ်ဆီးစီးတီး (Swansea City) အသင်းကို တဦးတည်းပိုင် ဝယ်ထားတာ မဟုတ်သေးပေမယ့် သူနဲ့ စီးပွားဖက် အမေရိကန်သား စတီဖင်ကက်ပ်လန် (Stephen Kaplan) နဲ့ ပေါင်းပြီး အသင်းရဲ့ ရှယ်ယာ ၆၈ ရာ ခိုင်နှုန်းထိ ပိုင်ဆိုင်ထားပါတယ်။ ကျန်တဲ့ အသင်းရှယ်ယာ အများစုက Swansea City Supporters Trust ကနေ ၂၁ ဒသမ ၁ ရာခိုင်နှုန်း ပိုင်ဆိုင်ထားပြီး အခြားရှယ်ယာ ပိုင်ဆိုင်သူ အနည်းငယ်လည်း ရှိသေးတယ် လို့ သိရပါတယ်။ စတီဖင်ကက်ပ်လန်နဲ့ ဂျေဆင်လီဗီယန်တို့ရဲ့ ပိုင်ဆိုင်မှုက ၆၈ ရာခိုင်နှုန်း ရှိပေမယ့် နှစ်ဦးစပ်တူ ပိုင်ဆိုင်မှု ဖြစ်ပြီး သူတို့ နှစ်ယောက်မှာ ဘယ်သူက ရှယ်ယာ ဘယ်လောက် ပိုင်သလဲ ဆိုတာတော့ သေချာ မသိရပါဘူး။ ဂျေဆင်လီဗီယန် က အမေရိကန်သား၊ သူက အားကစားလုပ်ငန်းတွေမှာ ရင်းနှီးမြှပ်နှံသူ၊ စီမံ အုပ်ချုပ်သူ၊ အမေရိကန် အမှတ်ပေး ဘောလုံးပြိုင်ပွဲဝင် အသင်း တသင်း ဖြစ်တဲ့ D.C United မှာလည်း သူက ရှယ်ယာဝင် အဖြစ် ရှိနေသလို အသင်းရဲ့ CEO အဖြစ်ရော အုပ်ချုပ်မှု ဒါရိုက်တာ အဖြစ်ပါ တာဝန် ထမ်းဆောင်နေပါတယ်။ ဆွမ်ဆီးစီးတီး ဘောလုံးအသင်းမှာတော့ သူက ရှယ်ယာတွေပဲ ဝယ်ထားတဲ့ သဘောရှိပြီး အုပ်ချုပ်မှုကိုပဲ နောက်ကွယ်က လုပ်ကိုင်နေတယ် လို့ ယူဆရပါတယ်။ ဒါကလည်း မေဂျာလိဂ် အနေနဲ့က အခု ၂၀၁၀ ခုနှစ် နောက်ပိုင်းက စပြီး လူကြည့် များလာသလို ဝင်ငွေလည်းကောင်းလာလို့ D.C United ကို ပိုပြီး အလေးထား လုပ်ကိုင်နေပုံရပါတယ်။ ဆွမ်ဆီးကတော့ အင်္ဂလန် အသင်းတွေထဲမှာ အလယ်အလတ်၊ ဒါမှမဟုတ် အသင်းငယ် စာရင်း သွင်းမယ် ဆိုရင်တောင် ရနိုင်လို့ အာရုံ သိပ်ထားပုံ မရတာလည်း ဖြစ်နိုင်ပါတယ်။ အခုလို ဘောလုံး အသင်းတွေဆီမှာ ရှယ်ယာ မဝင်ခင် ဂျေဆင်က NBA ပြိုင်ပွဲဝင် Memphis Grizzlies အသင်းမှာလည်း CEO လုပ်ဖူးသေးတာ တွေ့ရပါတယ်။ သူ့ကို အားကစားနယ်ပယ်မှာ လူသိများရတဲ့ အကြောင်းကတော့ D.C United အတွက် အိမ်ကွင်း ဆောက်လုပ်မှုကို Audi ကုမ္ပဏီကနေ စပွန်ဆာ ရအောင် ဆောင်ရွက်နိုင်ခဲ့လို့၊ Memphis Grizzlies အသင်းကို ရင်းနှီးမြှပ်နှံလိုသူတွေ ရောက်လာအောင် ခေါ်ယူ မတည်နိုင်ခဲ့လို့၊ ၂၀၁၃ ခုနှစ်မှာ အသင်းကို အနောက်ပိုင်း ချန်ပီယံ ပွဲစဉ်မှာ ဗိုလ်လုပွဲအထိ ရောက်အောင် တွန်းအားပေးနိုင်ခဲ့လို့၊ ဒီလိုနဲ့ ကျော်ကြားအောင်မြင်လာတဲ့ Memphis အသင်းဟာ ESPN ကနေ ရွေးချယ်တဲ့ မြောက်အမေရိက တိုက်ရဲ့ လူကြိုက် အများဆုံး အသင်းတသင်း ဖြစ်လာအောင် ဆောင်ရွက်ပေးနိုင်တာတွေနဲ့ အတူ လူသိများတာ ဖြစ်ပါတယ်။ ၁၉၇၃ ခုနှစ်ကမှ မွေးဖွားခဲ့သူ ဖြစ်ပြီး လက်ရှိ နယူးယောက်မှာ နေထိုင်နေပါတယ်။ Pomona College ကနေ B.A ဘွဲ့ ရတယ်၊ မစ်ချီဂန် တက္ကသိုလ်ကနေလည်း ဥပဒေ ဒစ်ပလိုမာ ရထားပါသေးတယ်။ စီးပွားရေး လုပ်ကိုင်မှု အနေနဲ့ အားကစား အသင်းတွေ ထဲမှာ ရှယ်ယာတွေ ဝယ်ထည့်တယ်၊ အလုပ်အနေနဲ့တော့ အားကစား အသင်းတွေကို ကြီးကြပ် အုပ်ချုပ်ပြီး အသင်း အနေနဲ့ ဆုဖလားအောင်မြင်မှုရော ဘဏ္ဍာရေး အောင်မြင်မှုပါ ရရှိအောင် လုပ်ကိုင်နေသူ တဦးပါ။ ဂျေဆင်က ဂျုးမိသားစုကနေ မွေးဖွားလာသူပါ၊ တက္ကသိုလ် တက်နေချိန်က ဘတ်စကတ်ဘော ကစားတယ်။ မစ်ချီဂန် တက္ကသိုလ်မှာ ဥပဒေ ဒစ်ပလိုမာ တက်နေချိန် Diana Gribbon Motz မှာ တရားရုံးစာရေး အဖြစ်ပါ ဝင်လုပ်နေခဲ့ သေးတယ်။ ၁၉၉၈ ခုနှစ်မှာ အမှုလိုက်ခွင့် လိုင်စင်ရပြီး ဥပဒေ အကျိုးဆောင် လုပ်ငန်း Williams & Connolly မှာ အလုပ် ဝင်လုပ်ခဲ့တယ်။ ၂၀၀၃ ခုနှစ်မှာတော့ အကျိုးဆောင် လုပ်ငန်းကနေ ထွက်ခဲ့ပြီး သူ့ရဲ့ ကိုယ်ပိုင် အားကစား အေဂျင်စီ လုပ်ငန်းလေးကို တည်ထောင်ပြီးတော့ အမေရိကန် ဘတ်စကတ်ဘော၊ အမေရိကန် Football နဲ့ ဘောလုံး လောကမှာ အားကစားဆိုင်ရာ ဝန်ဆောင်မှု လုပ်ငန်းတွေကို တနိုင်တပိုင် စတင် လုပ်ကိုင်လာခဲ့ပါတယ်။ တဖြည်းဖြည်းနဲ့ သူ့ရဲ့ အေဂျင်စီက အမေရိကကနေ တကမ္ဘာလုံးကို ခြေဆန့်လာနိုင်ခဲ့ပါတယ်။ Sacramento Kings နဲ့ Memphis Grizzlies အသင်းတွေရဲ့ တာဝန်ခံ အဖြစ်လည်း ဝင်ရောက် လုပ်ကိုင် လာတယ်။ UC Berkeley School of Law မှာလည်း နည်းပြ တဦး အနေနဲ့ အားကစား ဆိုင်ရာ ဥပဒေ သင်ကြားရေးတွေ လုပ်နေခဲ့ပါတယ်။ ပြောရရင် ဂျေဆင်က အလုပ်နဲ့ လက်နဲ့ မပြတ်အောင် လုပ်ကိုင်နေခဲ့သူလည်း ဖြစ်ပါတယ်။ ၂၀၀၅ ခုနှစ်မှာ Miami Heat အတွက် Udonis Haslem ကို ခေါ်ပေးနိုင်ခဲ့လို့ အကျိုးဆောင်ခ ဒေါ်လာ ၃၃ သန်းရတယ်၊ ၂၀၀၇ ခုနှစ်မှာ Sacramento Kings အတွက် Kevin Martin ကို ခေါ်ပေးနိုင်လို့ ဒေါ်လာ ၅၅ သန်း ထပ်ရတယ်။ ၂၀၀၈ ခုနှစ် ဇူလိုင် ၃၁ မှာ Chicago Bulls အသင်းအတွက် Luol Deng ကို ခေါ်ပေးနိုင်လို့ သန်း ၈၀ ရပါသေးတယ်။ ဒီလိုနဲ့ တနိုင်တပိုင် အလုပ်ကနေ မီလီယံနာ ဖြစ်လာပါတယ်။ ၂၀၁၁ ခုနှစ်မှာ နာမည်ကျော် ရုပ်ရှင် မင်းသား Will Smith နဲ့ ပေါင်းပြီး Philadelphia 76ers ကို နှစ်ဦးစပ် ဝယ်တယ်။ ၂၀၁၂ ခုနှစ်မှာ လက်ရှိ ပိုင်ဆိုင်မှု ဖြစ်တဲ့ D.C United ရဲ့ ရှယ်ယာတွေ စတင် ပိုင်ဆိုင်မှု ရှိလာတယ်။ နောက်တော့ 76ers က ရှယ်ယာတွေကို ပြန်ရောင်းလိုက်ပြီး D.C United ထဲမှာ ရှယ်ယာ ပိုမို အားစိုက် ဝယ်ယူမှု လုပ်ဆောင် လာခဲ့ပါတယ်။ ၂၀၁၄ ခုနှစ် အတွင်း သူ့ရဲ့ အားစိုက်မှုနဲ့ ကိုလံဘီယာနယ်မှာ အများပိုင် စီးပွားရေး ဖွံ့ဖြိုးနယ် အစီအစဉ် အဖြစ် အားကစားကွင်း တကွင်းလည်း ဆောက်လုပ်ခွင့်ရခဲ့ပါသေးတယ်။ ဒါကတော့ ဒေသ ဖွံ့ဖြိုးရေး အတွက် လုပ်ဆောင်မှုပါ။ ၂၀၁၆ ခုနှစ် ဧပြီမှာတော့ သူနဲ့ တွဲဖက် စတီဖင်ကက်ပ်လန် တို့ ပေါင်းပြီး ဆွမ်ဆီးမှာ ရှယ်ယာဝင် အဖြစ် ရင်းနှီးမြှပ်နှံ ကြောင်း ကြေငြာလာပါတယ်။ အထူးသဖြင့်တော့ အသင်းရဲ့ အကျိုးအမြတ်ကို ခေါင်းဆောင် စီမံနိုင်လောက်အောင် ရှယ်ယာ ပမာဏ အများအပြား ဝယ်လိုက်တာ ဖြစ်ပြီး ၆၈ ရာခိုင်နှုန်း အထိ ပိုင်ဆိုင်သွားခဲ့ပါတယ်။ ဒါက ဂျေဆင်ရဲ့ ဘ၀ ဖြတ်သန်းမှုနဲ့ လက်ရှိ ပိုင်ဆိုင်မှု အကြောင်းအရာ တချို့ပါ။ သူဟာ ကြော်ငြာလုပ်ငန်းတခုက အုပ်ချုပ်သူ Meredith Kopit Levien ကို လက်ထပ်ခဲ့ပြီး ကလေး တယောက်ရှိပါတယ်။ ၂၀၀၆ ခုနှစ်အတွင်းက စပြီး မိုင်ယာမီရုပ်သံလိုင်း တစ်ခု ဖြစ်တဲ့ WFOR-TV မှာ ပါဝင် တင်ဆက်ခဲ့တယ်၊ နောက်တော့ ESPN, ESPNews နဲ့ National Public Radio တွေမှာလည်း ပါဝင် တင်ဆက်မှုတွေ လုပ်ဆောင်ခဲ့ပါတယ်။ အထူးသဖြင့် ဘတ်စကတ်ဘော အားကစားနယ်ပယ်က အကြောင်းတွေကို တင်ပြဆွေးနွေးသူ အဖြစ် ပါဝင်ခဲ့ဖူးတာလည်း တွေ့ရပါတယ်။ Ref: en.m.wikipedia.org The post ဥပဒေ အကျိုးဆောင်ကနေ ငန်းရိုင်းတို့ သခင် ဖြစ်လာသူ ဂျေဆင်လီဗီယန် appeared first on ဧရာဝတီ.
Source : http://ift.tt/2FpNGSU
via IFTTT