သရုပ်ဆောင်လွင်မိုးရဲ့ ကျိုက်ထိုမြေ အငြင်းပွားမှု ပြည်နယ်တရားလွှတ်တော် ရောက် မွန်ပြည်နယ် ကျိုက်ထိုမြို့ ကင်မွန်းချောင်းကျေးရွာရှိ ရုပ်ရှင် သရုပ်ဆောင် ဦးလွင်မိုးနှင့် ဒေါ်မေသူတို့ ဝယ်ယူ ထားသည့် မြေကွက် ကိစ္စနှင့် ပတ်သက်၍ ဦးစောနေဗလုမှ ဦးတိုက်လျှောက်ထားခဲ့သော နစ်နာကြေးရလိုမှုကို မွန်ပြည်နယ် တရားလွှတ်တော်၌ ယနေ့ စတင်ကြားနာသည်။ ယနေ့ရုံးချိန်းအား ဦးလွင်မိုးမှ တက်ရောက်ခဲ့ခြင်း မရှိပဲ ယင်း၏ ရှေ့နေကိုသာ အာဏာ လွှဲ၍ တက်ရောက် စေခဲ့သည်။ ဦးစောနေဗလုသည် ကျိုက်ထို့မြို့နယ် တရားရုံးတွင်လည်း ပိုင်နက်ကျူးကျော်မှုနှင့် ဖျက်ဆီးမှုတို့ဖြင့် ဦးလွင်မိုးကို တရားစွဲဆိုထားသေးကြောင်းလည်း သိရသည်။ “ကိုလွင်မိုးကတော့ ဒီအောက်တိုဘာလ ၁၇ ရက်နေ့မှာ ကျိုက်ထို တရားရုံးမှာ ကျူးကျော်ရယ် ဖျက်ဆီးမှုရယ် စတဲ့ ဥပဒေနဲ့ ကျိုက်ထို တရားသူကြီးက လက်ခံ ဆွေးနွေးမယ်၊ ဒီဘက် မွန်ပြည်နယ် တရားလွှတ်တော် မှာတော့ တရားမ မှုပေါ့နော်” ဟု ယနေ့တွင် မွန်ပြည်နယ် တရားလွှတ်တော်၌ လာရောက်၍ ရုံးချိန်း သက်သေ ထွက်ဆိုခဲ့သည့် ယခင် KNU တပ်ဖွဲ့ဝင် ယခု Kaw K’ Mu Khu Co.Ltd ၏ မန်နေးဂျင်း ဒါရိုက်တာ ဦးစောနေဗလုက ပြောသည်။ ကျိုက်ထို မြို့နယ် ကင်းမွန်ချောင် ကျေးရွာ ကဒတ်ချောင်းကွင်း ဦးပိုင်အမှတ် (၁၈) မြေဧရိယာ အကျယ်အဝန်း ၂ ဒသမ ၃ ဧကရှိ မြေအား မူလမြေပိုင်ရှင် ဦးသန်းအောင်သည်က ဦးစောနေဗလုထံမှ ပိုက်ဆံ ချေးယူထားပြီး ပြန်မဆပ် နိုင်ခဲ့သဖြင့် သိန်း ၂၀၀ ဖြင့် တန်ဖိုး ဖြတ်၍ ဦးစောနေဗလုထံသို့ ရောင်းချ ပေးခဲ့ကြောင်း၊ ၂၀၁၆ အောက်တိုဘာလတွင် ယင်းမြေကွက်ကို သရုပ်ဆောင် လွင်မိုးက တခြားသူတဦးထံမှ ဝယ်ယူခဲ့သည်ဆိုကာ ခြံခတ်ခဲ့ကြောင်း၊ သရုပ်ဆောင် လွင်မိုးနှင့် BGF တို့ ပူးပေါင်းကာ ၎င်းအပါအဝင် ခြံစောင့် ၃ ဦးကို ဖမ်းဆီး ရိုက်နှက်ခဲ့ကြောင်း ဦးစောနေဗလုက ဆိုသည်။ ယင်းကိစ္စကို ရန်ကုန်မြို့ တော်ဝင်နှင်းဆီခန်းမတွင် ဇန်နဝါရီလ ၅ ရက်နေ့က ဦးစောနေဗလုက စာနယ်ဇင်း ရှင်းလင်းပွဲ ပြုလုပ်ပြီး ပြောဆိုခဲ့ကာ ဦးလွင်မိုးကလည်း ဂုဏ်သိက္ခာကို ကာကွယ်သည့်အနေဖြင့်ဟုဆိုကာ ရန်ကုန်မြို့ Orchid Hotel တွင် ရှင်းလင်းခဲ့သေးသည်။ ယနေ့ မွန်ပြည်နယ် တရားလွှတ်တော်တွင် ဦးစောနေဗလုက ထိုမြေကွက်အား ကင်းမွန်ချောင် အုပ်ချုပ်ရေးမှူးဟောင်း ဦးကျော်သူရလှိုင်မှ ပုံစံ (၇) မြေပိုင်ဆိုင်ကြောင်း အထောက်အထား စာရွက်ထုတ်ယူ၍ ၂၀၁၆ ခုနှစ် နှစ်လယ်ခန့်တွင် သရုပ်ဆောင် လွင်မိုး၏ ဇနီး ဒေါ်မေသူမှ သိန်း ၁၁၅၀ ဖြင့် ဝယ်ယူကြောင်း လက်မှတ် ထိုးခဲ့ကာ ဦးလွင်မိုးမှ ဝယ်သူ အသိသက်သေ၊ ဦးကျော်သူရလှိုင်မှ ရောင်းသူ ၊ ဦးကျော်သူရလှိုင် အမျိုးသမီးမှ ရောင်းသူ သက်သေ နေရာတွင် အသီးသီး လက်မှတ် ရေးထိုး၍ အရောင်းအဝယ် ပြုခဲ့ကြောင်း ထွက်ဆိုသည်။ ၎င်းပိုင် ခြံစည်းရိုးများအား ၂၀၁၆ ခုနှစ် အောက်တိုဘာလ ၁၆ ရက်နေ့ ခန့်တွင် ဦးကျော်သူရလှိုင်နှင့် ဦးလွင်မိုးတို့မှ ဖျက်ဆီး၍ သွပ်အစိမ်းပြားများဖြင့် ခြံစည်းရိုးအား ပြန်လည် ကာရံ ခဲ့ပြီး မူလ ဦးစောနေဗလု ပစ္စည်း များကို ဖျောက်ဖျက်ခဲ့ကြောင်း၊ ပစ္စည်းများ ပြန်လည် ရလိုမှု နစ်နာကြေး သိန်း ၅၀၀၀ ရလိုကြောင်း မွန်ပြည်နယ် တရား လွှတ်တော်တွင် ဦးတိုက်စွဲဆို ထားခြင်း ဖြစ်ကြောင်း ဦးစောနေဗလုက ဧရာဝတီကို ပြောသည်။ ထို့ပြင် ယင်းမြေကွက် ကိစ္စနှင့် စပ်လျဉ်း၍ ကင်းမွန်ချောင် ကျေးရွာ အုပ်ချုပ်ရေးမှူးဟောင်းနှင့် လယ်ယာမြေ စီမံခန့်ခွဲရေးနှင့် စာရင်းအင်း ဦးစီး ဌာနမှူးဟောင်း ဦးမြင့်ဝေတို့အားလည်း အဂတိ လိုက်စားမှု တိုက်ဖျက်ရေး ကော်မရှင်ထံ တိုင်ကြားထားကြောင်းလည်း ၎င်းက ဆိုသည်။ မြန်မာနိုင်ငံ အဂတိ လိုက်စားမှု တိုက်ဖျက်ရေး ကော်မရှင်မှ ဦးစောနေဗလု ဦးတိုက် လျှောက်ထား ချက်ကို ၂၀၁၇ ခုနှစ် မေလ (၅) ရက်နေ့တွင် လက်ခံခဲ့ပြီး ပြည်နယ်အစိုးရအား နိုင်ငံတော်က တရားလိုပြု၍ တရားစွဲဆိုရန် အကြံပြုခဲ့၍ ဦးကျော်သူရလှိုင်နှင့် ဦးမြင့်ဝေတို့အား ၂၀၁၃ ခုနှစ် အဂတိ လိုက်စားမှု တိုက်ဖျက်ရေး ဥပဒေ မ (၁၆) အရ မွန်ပြည်နယ် တရားလွှတ်တော်တွင် အမှုဖွင့် တရားစွဲဆိုထားကြောင်းလည်း သိရသည်။ မွန်ပြည်နယ် တရား လွှတ်တော်မှ အဆိုပါ အမှုအတွက် နောက်ထပ် ရုံးချိန်းအား အောက်တိုဘာ ၂၆ ရက်နေ့သို့ ထပ်မံ ချိန်းဆို ထားပြီး ထိုရုံးချိန်းသို့ ရုပ်ရှင် သရုပ်ဆောင် ဦးလွင်မိုး လာရောက်ထွက်ဆိုရန် ရှိနေသည်။ ဆက်စပ်ကြည့်ရှုရန် – ကျိုက်ထိုမြို့မြေကွက်ကိစ္စ သရုပ်ဆောင်လွင်မိုးရှင်းလင်း The post သရုပ်ဆောင်လွင်မိုးရဲ့ ကျိုက်ထိုမြေ အငြင်းပွားမှု ပြည်နယ်တရားလွှတ်တော် ရောက် appeared first on ဧရာဝတီ.
Source : http://ift.tt/2yHti07
via IFTTT
No comments:
Post a Comment