လျှင်မြန်စွာ ကူးစက်နိုင် သော ကြက်ငှက်တုပ်ကွေးရောဂါ တစ်မျိုး နောက်ထပ်ပျံ့နှံ့မှုကို တားဆီးရန် ဂျပန်နိုင်ငံမြောက်ပိုင်း ဟော့ကိုင်းဒိုးကျွန်းတွင် မွေးမြူရေး ကြက်နှင့် ဘဲအကောင်ရေ ၂၁၀,၀၀၀ ခန့်ကို စတင်သုတ်သင် ရှင်းလင်းခဲ့သည်ဟု တာ၀န်ရှိသူတစ်ဦးက ဒီဇင်ဘာ ၁၈ ရက်တွင် ပြောသည်။ နိုင်ငံတစ်လွှားရှိ မွေးမြူရေးခြံအချို့၌ ဖြစ်ပွားလျက်ရှိသော ပြင်းထန်သည့် H5 ဗိုင်းရပ်စ်ပိုးပျံ့နှံ့မှုကို တားဆီးရန် တာ၀န်ရှိသူ ရာပေါင်းများစွာဖြင့် ကြက်နှင့် ဘဲများကို သုတ်သင်ခြင်းမှာ ဂျပန်နိုင်ငံတွင် ငါးကြိမ်မြောက် ပြုလုပ်ခြင်းဖြစ်သည်။ ထို့အပြင် ဟော့ကိုုင်းဒိုးကျွန်းတောင်ပိုင်း အေအိုမိုရီပြည်နယ်တွင် ဘဲအကောင်ရေ ၂၃,၀၀၀နှင့် နီဂါတာမြို့တွင် ကြက်အကောင်ရေ ၅၅၀,၀၀၀ ကိုလည်းသုတ်သင်ခဲ့သည်။ အာဏာပိုင်များက ရောဂါဖြစ်ပွားသော မွေးမြူရေးခြံအနီး ဧရိယာများတွင် ကြက်၊ ဘဲများ တင်ပို့မှုနှင့် ယင်းထွက်ကုန်များတင်ပို့မှုကို တားမြစ်ခဲ့သည်။ ဒီဇင်ဘာ ၁၇ ရက် ညနေက ဟော့ကိုင်းဒိုးကျွန်းမြောက်ပိုင်း ရှင်မ်ဇူမြို့ရှိ မွေးမြူရေးခြံတွင်လည်း ကြက်အကောင်ရေ ၃၂,၃၁၀ ကို သုတ်သင်ရှင်းလင်းခဲ့ကြောင်း ဒေသခံတာ၀န်ရှိသူများက ထုတ်ပြန်ချက်၌ ပြောသည်။ ‘‘ကျွန်တော်တို့ ဒီနေ့ကြက်တွေကို သုတ်သင်ရှင်းလင်းတာ ဆက်လုပ်ပါမယ်။ ဒါပေမဲ့ ညဘက်မှာ ၂၀ ဒီဂရီအထိ ကျဆင်းတဲ့အတွက်ကြောင့် အလုပ်လုပ်ရတာ ခက်ခဲပါတယ်’’ဟု နှင်းကျခြင်းကလည်း အလုပ်မတွင်ကြောင်း ထိုအရာရှိတစ်ဦးက အေအက်ဖ်ပီသတင်းဌာနအား ပြောသည်။ ဂျပန်နိုင်ငံတွင် ၂၀၁၅ ဇန်န၀ါရီကလည်း မွေးမြူရေးခြံတစ်ခု၌ ကြက်ငှက်တုပ်ကွေးရောဂါဖြစ်ပွားခဲ့သည်။ —Ref:AFP
Source : http://ift.tt/2hN15cG
via IFTTT
No comments:
Post a Comment