The Voice

ပုဂံတွင် အဂါရဝပုံ မရိုက်ရန် သတိပေး ရန်ကုန်၊ ဒီဇင်ဘာ ၁၇ ပုဂံယဉ်ကျေးမှုဒေသရှိ ဘုရားဆင်းတုတော်များကို နောက်ခံထား၍ အဂါရဝပုံများ ရိုက်ကူးခြင်း မပြုရန် သာသနာရေးနှင့် ယဉ်ကျေးမှု ဝန်ကြီးဌာနက သတိပေးစာ ထုတ်ပြန်ခဲ့သည်။ ပုဂံယဉ်ကျေးမှုဒေသတွင် ဘုရားဆင်းတုတော်များကို နောက်ခံထားပြီး အဂါရဝပုံ ရိုက်ကူးသည့် ဖိလစ်ပိုင် အခြေစိုက် Mymetrophoto ဓာတ်ပုံများ လူမှုကွန်ရက် စာမျက်နှာများတွင် ပျံ့နှံ့ပြီး သုံးရက်အကြာ ယဉ်ကျေးမှု ကာကွယ်ထိန်းသိမ်းရန် အင်္ဂလိပ်-မြန်မာ နှစ်ဘာသာဖြင့် သာသနာရေးနှင့် ယဉ်ကျေးမှု ဝန်ကြီးဌာနက ဒီဇင်ဘာလ ၁၆ ရက်တွင် သတိပေးစာ ထုတ်ပြန်ခဲ့ခြင်း ဖြစ်သည်။ ရှေးဟောင်းယဉ်ကျေးမှု အမွေအနှစ်များ ကာကွယ်ထိန်းသိမ်းရေးအတွက် ပြည်တွင်းပြည်ပ နိုင်ငံသားများအကြား ပြုမူနေထိုင်ပုံများနှင့် ပတ်သက်၍ ခေတ်ကာလ အခြေအနေနှင့် လိုက်လျောညီထွေမှု ရှိစေရန် လိုအပ်ချက်များကို ဖြည့်စွက်ကာ သတိပေးစာ ထုတ်ပြန်ထားခြင်း ဖြစ်ကြောင်း သာသနာရေးနှင့် ယဉ်ကျေးမှု ဝန်ကြီးဌာန၊ ပြည်တွင်းပြည်ပ ဆက်ဆံရေးနှင့် သတင်းပြန်ကြားရေးဌာနခွဲ ဒုတိယညွှန်ကြားရေးမှူး ဦးအာကာထွန်းက ပြောကြားသည်။ “လတ်တလော ဖြစ်ပွားနေတဲ့ ကိစ္စရပ်တွေနဲ့ ကိုက်ညီအောင် သတိပေးစာကို အသစ်ထုတ်ပြန်တာပါ။ ဒါကတော့ သတိပေး နှိုးဆော်စာပေါ့။ ပုဂံမှာတင် မဟုတ်ပါဘူး၊ တခြားယဉ်ကျေးမှု နေရာဒေသတွေမှာလည်း ဝိုင်းဝန်းထိန်းသိမ်းနိုင်အောင်ပါ” ဟု ၎င်းက ဆိုသည်။ အဂါရဝ နေထိုင်ပြုမှုများအတွက် စည်းကမ်းချက် ထုတ်ပြန်ခြင်းကို လူထုအသိပညာပေး ပုံစံများဖြင့် ဆောင်ရွက်မည် ဖြစ်ပြီး နိုင်ငံခြား ခရီးသည်များအတွက် မြန်မာ-အင်္ဂလိပ် နှစ်ဘာသာဖြင့် ထပ်မံထုတ်ပြန်ခြင်း ဖြစ်ကြောင်း ရှေးဟောင်းသုတေသနနှင့် အမျိုးသားပြတိုက် ဦးစီးဌာန (စီမံ) ထံမှ သိရသည်။ ရှေးဟောင်းယဉ်ကျေးမှု အမွေအနှစ်များ ကာကွယ်ထိန်းသိမ်းမှုများအတွက် သတိပေးစာတွင် အဂါရဝ ဖြစ်စေမည့် ဘုရားဆင်းတုတော်များနှင့် တွဲဖက်ဓာတ်ပုံရိုက်ခြင်း၊ ဗီဒီယိုရိုက်ခြင်း၊ ခြေကန်ခြင်း၊ မဖွယ်မရာ ပြုမူနေထိုင်ခြင်း၊ ဘုရားပုံတော်နှင့် ကိုးကွယ်မှုဆိုင်ရာ ပုံတော်များကို ခန္ဓာကိုယ်တွင် ဆေးမင်ကြောင်၊ တက်တူးထိုးခြင်းတို့ မပြုလုပ်ရဟူသော အချက်များ ပါဝင်ပြီး ရှေးဟောင်းအဆောက်အအုံ အတွင်းရှိ နံရံဆေးရေး ပန်းချီများကို ပွတ်သပ်ကိုင်တွယ်မှုများ၊ အညစ်အကြေးနှင့် အမှိုက်များ စွန့်ပစ်ခြင်းတို့ကို မပြုလုပ်ရဟူ၍ သာသနာရေးနှင့်ယဉ်ကျေးမှု ဝန်ကြီးဌာနက ထုတ်ပြန်ထားသည်။ ပုဂံယဉ်ကျေးမှု နယ်မြေအတွင်းရှိ အနော်ရထာလမ်းနှင့် ရွှေဆံတော်ဘုရားလမ်းဆုံ အနီးတွင် ယခုနှစ် မတ်လ ၂၄ ရက်က အဝတ်ဗလာဖြင့် သွားလာခဲ့သည့် အင်္ဂလန် နိုင်ငံသားကို မတ်လ ၂၈ ရက်တွင် ပြည်နှင်ဒဏ် ပေးခဲ့သည်။
Source : https://goo.gl/59Xa09
via IFTTT