The Voice

ဟီလာရီကလင်တန် အီးမေးလ်ကိစ္စ FBI ညွှန်ကြားရေးမှူး ဥပဒေ ချိုးဖောက်သည်ဟု အထက်လွှတ်တော် ဒီမိုကရက်ခေါင်းဆောင် စွပ်စွဲ ဝါရှင်တန်၊ အောက်တိုဘာ ၃၁ ဟီလာရီကလင်တန်နှင့် ဆက်စပ်မှု ရှိနိုင်သည်ဟု ယူဆရသော အီးမေးလ်များ စုံစမ်းစစ်ဆေးမှုနှင့် ပတ်သက်ပြီး FBI ညွှန်ကြားရေးမှူးက ထုတ်ဖော်ခဲ့ခြင်းမှာ ဥပဒေကို ချိုးဖောက်ရာ ရောက်သည်ဟု အထက်လွှတ်တော် ဒီမိုကရက်ခေါင်းဆောင် ဟာရီရိဒ်က ဝေဖန်ခဲ့ကြောင်း BBC သတင်းက ဖော်ပြသည်။ အစိုးရ တာဝန်ရှိသူများ ရွေးကောက်ပွဲအပေါ် လွှမ်းမိုးစွက်ဖက်မှုကို ပိတ်ပင်ထားသည့် အက်ဥပေဒကို FBI ညွှန်ကြားရေးမှူး ဂျိမ်းစ်ကမ်မေးက ချိုးဖောက်ခဲ့သည်ဟု ဟာရီရိဒ်က စွပ်စွဲခဲ့သည်။ အမေရိကန် ရွေးကောက်ပွဲ ကျင်းပရန် နှစ်ပတ်မျှပင် မလိုတော့သည့် အချိန်တွင် FBI ၏ စုံစမ်းစစ်ဆေးမှုနှင့် ပတ်သက်သည့် အကြောင်းကြားစာ ထွက်ပေါ်လာခဲ့ခြင်း ဖြစ်သည်။ ကလင်တန်၏ ထိပ်တန်းလက်ထောက်တစ်ဦး ဖြစ်သူ ဟူမာအဘီဒင်နှင့် ဆိုင်သော အီးမေးလ်မှတ်တမ်းကို ရှာဖွေရန် FBI တွင် ဝရမ်းရရှိသွားပြီ ဖြစ်သည်။ ဟူမာအဘာဒင်၏ အီးမေးလ်များကို လိင်ပိုင်းဆိုင်ရာ စော်ကားနှောင့်ယှက်သည့် စာတိုများ ပေးပို့မှုကြောင့် နာမည်ပျက်ခဲ့ရသည့် လွှတ်တော်အမတ်ဟောင်း ခင်ပွန်းသည် အန်ထိုနီဝေနာ၏ လက်ပ်တော့မှ တွေ့ရှိခြင်း ဖြစ်သည်ဟု ယူဆရသည်။ လက်ပ်တော့တွင် အီးမေးလ် ၆၅၀၀၀၀ အထိ စိစစ်ရှာဖွေရမည်ဖြစ်ရာ ရွေးကောက်ပွဲ မတိုင်မီ စုံစမ်းစစ်ဆေးရေးမှူးများက အဖြေတစ်ခု ထုတ်ပေးနိုင်မည် မဟုတ်ပေ။ ဟာရီရိဒ်က FBI ညွှန်ကြားရေးမှူးသည် ရီပတ်ဘလီကန် သမ္မတလောင်း ဒေါ်နယ်ထရမ့်၊ သူ၏ ထိပ်တန်းအကြံပေးများနှင့် ရုရှားအစိုးရအကြား နီးကပ်သော ဆက်ဆံရေးရှိသည် ဆိုသော သတင်းအချက်အလက်ကိုမူ ထိန်ချန်ထားသည်ဟုလည်း စွပ်စွဲခဲ့သည်။ “ဒီသတင်းအချက်အလက်ကတော့ လူထုက သိခွင့်ရှိပါတယ်။ ဒါကို လူထုရှေ့ချပြဖို့ ပြီးခဲ့တဲ့လတွေ ကတည်းက ကျွန်တော် တောင်းဆိုခဲ့တာပါ” ဟု ရိဒ်က ပြောကြားခဲ့သည်။ ယခုစစ်ဆေးနေသည့် အီးမေးလ်များသည့် ဟီလာရီကလင်တန် နိုင်ငံခြားရေးဝန်ကြီး ဖြစ်စဉ်က ကိုယ်ပိုင်အီးမေးလ် ဆာဗာသုံးစွဲခဲ့မှုအပေါ် စုံစမ်းစစ်ဆေးခဲ့မှုနှင့် အဆက်အစပ် ရှိနိုင်သည်ဟု FBI က ယူဆထားသည်။ ထိုစဉ်က ကိုယ်ပိုင်အီးမေးလ်ဆာဗာ အသုံးပြုခဲ့မှုအတွက် ကလင်တန်ကို စွဲချက်တင်ရန် မလိုအပ်ကြောင်း FBI က ဆုံးဖြတ်ပြီး ဇူလိုင်လကတည်းက အမှုပိတ်ထားခဲ့သည်။ ယခုစုံစမ်းမှုအသစ်မှာ လွှတ်တော်အမတ်ဟောင်း ဝေနာက အသက်မပြည့်သေးသည့် မိန်းကလေးတစ်ဦးကို လိင်ပိုင်းဆိုင်ရာ လှုံ့ဆော်သည့်စာတိုများ ပေးပို့သည်ဟု သံသယရှိမှုအပေါ် သီးခြားစစ်ဆေးမှုနှင့် ဆက်စပ်ပြီး ထွက်ပေါ်လာသည့် ကိစ္စ ဖြစ်သည်။ ရကမ်မေးသည် နိုင်ငံရေးပါတီတစ်ခုကို ကူညီလိုသော ရည်ရွယ်ချက်ဖြင့် စံနှစ်မျိုး ကျင့်သုံးခဲ့သည်ဟု ရိဒ်က စွပ်စွ ခဲ့သည်။ အစိုးရ တာဝန်ရှိသူများ ၎င်းတို့ ရာထူးတာဝန်ကို အသုံးပြုပြီး ရွေးကောက်ပွဲရလဒ်အပေါ် လွှမ်းမိုးစေရန် ဆောင်ရွက်မှုမှ တားမြစ်ထားသည့် ဟက်ချ်ဥပဒေကို ကမ်မေးက ချိုးဖောက်ခဲ့သည်ဟု ရိဒ်က စွပ်စွဲခဲ့သည်။ ၂၀၀၅ ခုနှစ်မှ ၂၀၀၇ ခုနှစ်အထိ အိမ်ဖြူတော် ကျင့်ဝတ်ပိုင်းဆိုင်ရာ ရှေ့နေအဖြစ် တာဝန်ယူခဲ့ဖူးသူ မင်နီဆိုးတား တက္ကသိုလ်၊ ဥပဒေကျောင်းမှ ပါမောက္ခ ရစ်ချတ်ပိန်တာက FBI ကို ဟက်ချ်အက် ဥပဒေ ချိုးဖောက်မှုဖြင့် အထူးအတိုင်ပင်ခံရုံးသို့ ကန့်ကွက်လွှာ တင်ပြလိုက်ပြီ ဖြစ်သည်ဟု ကြေညာခဲ့သည်။ အထူးအတိုင်ပင်ခံရုံး (Office of Special Counsel) မှာ ပြည်ထောင်စုအဆင့် လွတ်လပ်သည့် စုံစမ်းစစ်ဆေးရေးအဖွဲ့ ဖြစ်သည်။ “FBI ဟာ ဒီလိုမျိုး သူ့စုံစမ်းစစ်ဆေးမှု တစ်ခုကို နိုင်ငံရေးဆပ်ကပ်ပွဲထဲ ဆွဲသွင်းလိမ့်မယ်လို့ တစ်ခါမှ မတွေးခဲ့မိဘူး” ဟု ရစ်ချတ်ပိန်တာက နယူးယောက်တိုင်းမ် သတင်းစာတွင် ရေးသားခဲ့သည်။ ၁၉၃၉ ခုနှစ်တွင် အတည်ပြုခဲ့သော အဆိုပါ အက်ဥပဒေမှာ ပြည်ထောင်စုအစိုးရ ဝန်ထမ်းများ ၎င်းတို့၏ ရာထူးတာဝန်ကို အသုံးချပြီး ပါတီတစ်ခုခုအတွက် အကျိုးရှိအောင် ဆောင်ရွက်မှုကို တားမြစ်ထားသည်။ ရွေးကောက်ပွဲ ကျင်းပရန် တစ်ပတ်ကျော်သာ လိုတော့သည့် အချိန်တွင် အငြင်းပွားဖွယ်ရာ အီးမေးလ်ပြဿနာ ပေါ်မလာမီကပင် ကလင်တန်၏ ထရမ့်အပေါ် အသာရမှုမှာ ကျဉ်းမြောင်းလာခဲ့သည်ဟု စစ်တမ်းများက ဖော်ပြသည်။ ABC သတင်းဌာနနှင့် ဝါရှင်တန်ပို့စ် သတင်းစာတို့က ကောက်ယူသော စစ်တမ်းအရ ကလင်တန်သည် ထရမ့်ထက် တစ်ရာခိုင်နှုန်းသာ အသာရနေသည်ဟု သိရှိရသည်။
Source : https://goo.gl/ZjWExT
via IFTTT